12:38, 16 - قازان 2020 | GMT +6
جول اپاتىنان مەرت بولعان پوليتسەيلەردىڭ وتباسىنا 11 ميلليون تەڭگەدەن بەرىلەدى
كوكشەتاۋ. قازاقپارات - اقمولا وبلىسىندا جول اپاتىنان مەرت بولعان پوليتسيا قىزمەتكەرلەرىنىڭ ءارقايسىنىڭ وتباسىنا 11 ميلليون تەڭگە كولەمىندە كومەك بەرىلەدى، دەپ حابارلايدى قازاقپارات ءتىلشىسى وبلىستىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
قازىرگى كەزدە ەكى پوليتسيا قىزمەتكەرىنىڭ ولىمىنە اكەپ سوقتىرعان جول اپاتىنا بايلانىستى قىلمىستىق ءىس قوزعالىپ، سوتقا دەيىنگى تەرگەۋ امالدارى جۇرگىزىلىپ جاتىر. اتالمىش سانكسيا بويىنشا كۇدىكتى 10 جىلعا دەيىن باس بوستاندىعىنان ايىرىلۋى مۇمكىن.
«سونداي-اق وبلىستىق پوليتسيا دەپارتامەنتى قىزمەتتىك مىندەتىن ورىنداۋ بارىسىندا قازا بولعان پوليتسەيلەردىڭ وتباسىنا 11 ميلليون تەڭگە كولەمىندە ماتەريالدىق كومەك كورسەتەدى»، - دەدى وبلىستىق پ د باسپا ءسوز قىزمەتىنىڭ جەتەكشىسى گۇلنار پينچۋك.
اۆتور: اسلان وسپانوۆ