قازاقپارات كۇنتىزبەسى: 11- تامىز

None
None
نۇر-سۇلتان. قازاقپارات - قازاقپارات وقىرماندارىنا 2020-جىلعى 11- تامىزعا ارنالعان كۇنتىزبەسىن ۇسىنادى.

ەستە قالار وقيعالار

1995-جىلى جيدەباي قورىعىندا سالىنعان اباي مەن شاكارىم كۇمبەزدەرى مەموريالىنىڭ اشىلۋ سالتاناتى بولدى.

2009-جىلى ب ۇ ۇ- نىڭ نيۋ-يوركتەگى شتاب-پاتەرىندە «يادرولىق قارۋعا جول جوق» اتتى قازاق-جاپون كورمەسىنىڭ سالتاناتتى اشىلۋى بولدى.

قازاقستان مەن جاپونيانىڭ ب ۇ ۇ جانىنداعى تۇراقتى وكىلدىكتەرى كورمەنى يادرولىق قارۋسىزدانۋ جونىندەگى شارالاردىڭ اياسىندا جانە كەلەسى جىلى وتەتىن يادرولىق قارۋدى تاراتپاۋ جونىندەگى كەلىسىمشارتقا قاتىسۋشى ەلدەردىڭ شولۋ كونفەرەنتسياسى قارساڭىندا وتكىزىپ وتىر.

سەمەي سىناق الاڭىنداعى يادرولىق سىناقتاردىڭ توقتاتىلۋىنىڭ 20 جىلدىعى مەن حالىقارالىق «نيەۆادا-سەمەي» قوزعالىسىنىڭ قۇرىلۋىنا ارنالعان. كورمە جۇمىسىندا قازاقستان رەسپۋبليكاسى ۇلتتىق يادرولىق ورتالىعى جانە ورتالىق مەملەكەتتىك مۇراعات ماعلۇماتتارى قولدانىلعان. كورمەنى ۇيىمداستىرۋعا سەمەي، حيروسيما جانە ناگاساكي قالالارىنىڭ اكىمشىلىكتەرى، ساۋلەگە ۇشىراعانداردىڭ دەنساۋلىعى ماسەلەلەرى جونىندەگى حيروسيما حالىقارالىق كەڭەسى، قازاقستاننىڭ ۇلتتىق يادرولىق ورتالىعى مەن ورتالىق مەملەكەتتىك مۇراعاتى قاتىستى.

كورمەنىڭ اشىلۋ سالتاناتىنا ب ۇ ۇ- عا مۇشە ەلدەردىڭ، ب ۇ ۇ حاتشىلىعىنىڭ، ا ق ش- تىڭ قوعامدىق-ساياسي جانە ىسكەر توپتارىنىڭ وكىلدەرى، قازاقستاندىق دياسپورا مەن بۇقارالىق اقپارات قۇرالدارىنىڭ وكىلدەرى قاتىستى.

2010-جىلى قازاقستاننىڭ ساۋد ارابياسىنداعى ەلشىلىگى پرەزيدەنت نۇرسۇلتان نازاربايەۆتىڭ «جاھاندىق قاۋىمداستىقتى راديكالدى جاڭارتۋ ستراتەگياسى مەن وركەنيەتتەردىڭ سەرىكتەستىگى» كىتابىن اراب تىلىنە اۋدارىپ، باسىپ شىعاردى.

2011-جىلى 1931-1934-جىلدار ارالىعىندا تۇرار رىسقۇلوۆ تۇرعان ماسكەۋ ورتالىعىنداعى پوكروۆ ساياجولى بويىنشا 14№ ءۇيدىڭ الدىڭعى بەتىندە ونىڭ قۇرمەتىنە مەموريالدىق تاقتا ورناتىلدى.

مەموريالدىق تاقتانى ورناتۋ تۋرالى كەلىسىمدى ق ر ەلشىلىگى جانە ماسكەۋ بيلىگى 2010-جىلى جاساعان، كەيىن بۇل يدەيانى ماسكەۋ قالاسىنداعى كورنەكتى وقيعالار مەن وتاندىق تاريح جانە مادەنيەت قايراتكەرلەرىنىڭ ەسىمىن ماڭگى ەستە قالدىرۋ كوميسسياسى قولدادى.

2012-جىلى ق ر ۇلتتىق قاۋىپسىزدىك كوميتەتى شەكارا قىزمەتىنىڭ قۇرىلعانىنا 20 جىل تولۋىنا وراي ش ق قىزمەتكەرلەرى نۇرسۇلتان شىڭىنا شىعىپ، باسىنا ق ر ۇ ق ك شەكارا قىزمەتىنىڭ تۋىن تىكتى. ءارى بولاشاق ۇرپاققا ارناپ ەلدىڭ پاتريوتى بولۋعا شاقىرعان حاتى بار كاپسۋلانى قادادى.

نۇرسۇلتان شىڭى (4376 م) ىلە الاتاۋىنىڭ تۇيىقسۋ اۋدانىنان بوي كوتەرگەن. قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆتىڭ ەسىمىمەن اتالادى.

2016-جىلى استانا قالاسىندا قوشقاربايەۆ كوشەسى مەن مومىش ۇلى داڭعىلى قيىلىسىندا حالىق قاھارمانى راقىمجان قوشقاربايەۆتىڭ قولا ءمۇسىنى ورناتىلدى.

2016-جىلى شىعىس قازاقستان وبلىسىنىڭ ماقانشى كەنتىندە جاڭا ينفرادىبىستى ستانتسيا ىسكە قوسىلدى. ول الەمدەگى پوليگونداردا زاڭسىز جۇرگىزىلىپ جاتقان يادرولىق سىناقتاردى تىركەپ وتىرادى. قازاقستاندا جاڭا 9 ەلەمەنتتى ينفرادىبىستى ستانتسيانىڭ ىسكە قوسىلۋى جاھاندىق عىلىمداعى زور جەتىستىك بولدى.

ستانتسيا دالدىگى اسا جوعارى، ەڭ سوڭعى قوندىرعىلارمەن، اتاپ ايتقاندا، ميكروبارومەترلەرمەن، ديگيتايزەرلەرمەن، راديومودەمدىك دەرەكتەردى بەرۋ جۇيەلەرىمەن جابدىقتالعان.

2017-جىلى چيلي استاناسى سانتياگودا دزيۋدودان كادەتتەر اراسىنداعى الەم چەمپيوناتىندا قازاقستاندىق دزيۋدوشى نۇرزات سالىمبايەۆ 60 كيلوگرامعا دەيىنگى سالماق ساناتىندا كۇمىس جۇلدەگەر اتاندى. الەمدىك دوداعا 64 ەلدىڭ 428 سپورتشىسى قاتىستى.

2017-جىلى شىعىس قازاقستان وبلىسىنىڭ قاتونقاراعاي اۋدانىنداعى شىڭعىستاي اۋىلىندا 1907-جىلى سالىنعان مەكتەپ قالپىنا كەلتىرىلدى. ⅩⅩ عاسىردىڭ باسىندا بۇل مەكتەپتە ابدىكەرىم بولىستىڭ ارنايى شاقىرۋىمەن الاش ارداقتىسى، قازاقتىڭ كورنەكتى اقىنى سۇلتانماحمۇت تورايعىروۆ، كورنەكتى جازۋشى ورالحان بوكەي ساباق بەرگەنى بەلگىلى.

وسىنداي تاعىلىمدى تاريحى بار قارا شاڭىراق تاۋەلسىزدىكتىڭ ەلەڭ-الاڭ جىلدارىندا قاراۋسىز قالىپ، بىت-شىتى شىعىپ، بۇزىلىپ، تەك ىرگەتاسىنىڭ ورنى عانا قالىپ ەدى. كاتونقاراعايلىق ازاماتتار مەكتەپتىڭ اشىلعانىنا 100، مەكتەپتى ءوز قارجىسىنا سالعىزعان ابدىكەرىم ەرەجەپوۆتىڭ تۋعانىنا 150، الاش وردا ۇكىمەتىنىڭ قۇرىلۋىنىڭ 100 جىلدىعىنا وراي تاريحي عيماراتتى قالپىنا كەلتىرۋدى ءجون دەپ ۇيعاردى.

بۇدان تىس، 30- جىلدارى نكۆد ورنالاسقان اعاشتان سوعىلعان كونە مەكتەپتىڭ قابىرعالارىندا اتۋعا ۇكىم ەتىلگەندەردىڭ اتى-ءجونى كۇنى بۇگىنگە دەيىن ساقتاۋلى.

2018 -جىلى ماڭعىستاۋ وبلىسىندا قۇرىق پورتى سالتاناتتى تۇردە اشىلدى. قۇرىق پورتى حالىقارالىق كولىك دالىزىنە قوسىلدى. پورت ايدىنىنا تەمىرجول مەن اۆتوجول ماگيسترالدارى كەلىپ كىرەدى.

تەمىرجول پارومى مەن اۆتوكولىك كەشەنى جىلىنا 7 ميلليون توننادان استام جۇكتى قابىلداپ، وتكىزەدى. پورتتىڭ كەدەندىك قىزمەتى مەن قىزمەت كورسەتۋ ينفراقۇرىلىمى كولىك قۇرالدارىن 30-40 مينۋتتا وڭدەي الادى. قۇرىق پورتىنداعى ماڭىزدى نىساندار تەرمينالدىق-قويمالىق ينفراقۇرىلىمدى دامىتادى.

2018 -جىلى استانادا 5 دۇركىن الەم چەمپيونى، 4 دۇركىن ەۋروپا چەمپيونى اتانعان، اتى اڭىزعا اينالعان اۋىر اتلەت اناتولي حراپاتىيدىڭ قۇرمەتىنە ەسكەرتكىش تاقتا ورناتىلدى.

2018 -جىلى ت م د تۋريزم كەڭەسىنىڭ ءتوراعالىعى قازاقستان رەسپۋبليكاسىنا اۋىستى. ءبىر جىل بويى قازاقستان ءتوراعالىق ەتكەن كەڭەس ت م د ەلدەرىنىڭ تۋريزم سالاسىن دامىتۋ ءۇشىن جاقسى مۇمكىندىكتەر ەسىگىن اشتى.

2019 -جىلى قازاقستان استاناسىندا «مامىلە» قازاق ءتىلى كلۋبى اشىلدى. ونىڭ ماقساتى - ورىس ءتىلدى قازاقتار مەن باسقا ەتنوس وكىلدەرىنە مەملەكەتتىك ءتىلدى ۇيرەتۋ.

استاناداعى «مامىلە» بولىمشەسىنىڭ باسشىسى - لينگۆيست، پوليگلوت ۆلاديسلاۆ تەن. ول قازاق ءتىلىن ەكى جىل ىشىندە ۇيرەنىپ شىققان.

2019 -جىلى وسكەمەن قالاسىندا «حاليفا التاي» مەشىتىندە يسلام مادەنيەتى مۋزەيى اشىلدى. وندا قازاقستانداعى يسلام ءدىنىنىڭ دامۋى مەن پايدا بولۋ تاريحى كورسەتىلگەن. مۋزەيدە 500-600 جىلدىق كىتاپتار بار.

سوڭعى جاڭالىقتار