قازاقستان ەكسپورتى ءۇشىن پەرسپەكتيۆاعا يە 11 الەۋەتى باسىم تاۋار پوزيتسياسى اتالدى
باقىت سۇلتانوۆ Facebook - تەگى پاراقشاسىندا قازاقستاننىڭ ەكسپورتى تۋرالى پىكىر ءبىلدىردى.
«جاقىندا مەنىڭ ارىپتەسىم - ۇلتتىق ەكونوميكا ءمينيسترى 2025 -جىلعا دەيىنگى ستراتەگيالىق جوسپاردىڭ جاڭا رەداكتسياسى تۋرالى ايتىپ بەردى. وندا ەلىمىزدىڭ ەكسپورتتىق الەۋەتىن ارتتىرۋدى جانداندىرۋعا ۇلكەن كوڭىل بولىنەتىن بولادى. ءبىز ءبىر جىلدان استام ۋاقىت بويى الەمدىك نارىقتاردى سارالاپ، ەكسپورتتىق ونىمدەرىمىز ءۇشىن تاۋارلاردى ىزدەۋ بويىنشا بەلسەندى جۇمىس ىستەپ كەلەمىز. ايتقانىمداي، مەن ءاربىر ساپارىمدا شەتەلدىك ارىپتەستەرىمىزگە ونىمدەرىمىزدى ءتىزىم بويىنشا ۇسىنامىن. ءبىر جەردە ءبىز ا و ك ونىمدەرىن، ءبىر جەردە ماشينا قۇراستىرۋ، باسقا ەلدەردە مەتالل وڭدەۋ تاۋارلارىن وتكىزۋ الەۋەتىن كورىپ وتىرمىز»، - دەيدى باقىت سۇلتانوۆ.
ءمينيستردىڭ ايتۋىنشا، جالپى 11 الەۋەتى باسىم تاۋار پوزيتسيالارى اتالىپ وتىلگەن.
«ولار ءبىزدىڭ كوزقاراسىمىز بويىنشا تاياۋ جىلدارى ەكسپورت ءۇشىن ۇلكەن پەرسپەكتيۆاعا يە. بۇل تىزىمگە كەلەسى تاۋارلار جاتادى: وسىمدىك مايلارى؛ ۇن ونىمدەرى؛ ماكارون ونىمدەرى؛ قوي ەتى؛ شوشقا ەتى؛ سيىر ەتى؛ پەستيتسيدتەر؛ تىڭايتقىشتار؛ مۇناي حيمياسى؛ ترانسفورماتورلار؛ اككۋمۋلياتورلار»، - دەيدى باقىت سۇلتانوۆ.
ءمينيستردىڭ پىكىرىنشە، ەلىمىز ءۇشىن ەڭ جاقىن ۇلكەن نارىق - قىتاي.
«ەكسپورتتىڭ قوسىمشا الەۋەتىنىڭ %60 دان استامى قىتاي نارىعىنا باعىتتالماق. وعان سەبەپ - قىتاي نارىعىندا ا و ك تاۋارلارىنا (وسىمدىك مايلارى، ەت جانە ەت ونىمدەرى) ، سونداي- اق مۇناي- حيميا ونىمدەرىنە جوعارى سۇرانىس بولۋىندا. ەكىنشى ورىندا - رەسەي نارىعى (جالپى ەكسپورتتىق الەۋەتتىڭ شامامەن %10 تيەسىلى) . سولتۇستىكتەگى كورشىمىز اوك تاۋارلارى، پەستيتسيدتەر جانە ماشينا جاساۋ تاۋارلارىنا سۇرانىس بىلدىرۋدە. سونداي- اق، رەسەيگە سيىر ەتى مەن شوشقا ەتىنىڭ ەكسپورتىن ۇلعايتۋ جوسپارلانىپ وتىر» ،- دەدى مينيستر.
ونىڭ اتاپ وتۋىنشە، ەكسپورتتىق الەۋەتتىڭ شامامەن %30 ى باسقا ەلدەرگە - ورتالىق ازيا، تاياۋ شىعىس جانە الىس شەتەل نارىقتارىنا تيەسىلى. بۇل ەلدەرگە نەگىزىنەن تىڭايتقىشتار مەن مۇناي حيمياسى، سونداي- اق وسىمدىك مايى ەكسپورتىنىڭ كولەمى ۇلعايتىلاتىن بولادى.
«ايتا كەتەرلىگى، ءبىز تەك بۇل 11 تاۋار تۇرىمەن شەكتەلمەيمىز. ەكسپورتتى ۇلعايتۋ الەۋەتى جوعارى 10 ەل ىرىكتەلدى. ولارعا قىتاي، گەرمانيا، يندونەزيا، فرانسيا، ا ق ش، وڭتۇستىك كورەيا، يتاليا، جاپونيا، ۇلىبريتانيا جانە اۋستريا كىرەدى. بۇل ەلدەرگە باعىتتالعان جيىنتىق الەۋەت 87 تاۋار اتاۋى بويىنشا شامامەن 5 ميلليارد ا ق ش دوللارىن قۇرايدى. بۇل نەگىزىنەن فەرروقورىتپالار، ۋران، تەمىردەن جاسالعان شىبىقتار مەن جارتىلاي فابريكاتتار، قۇبىرلار، اليۋميني وكسيدى، قۇبىرلارعا ارنالعان ارماتۋرا، پوليپروپيلەن، بەيورگانيكالىق حيميا ونىمدەرى. تاماق ونەركاسىبىنەن ۇن، مينەرالدى سۋ، كۇنباعىس مايى، ماكارون ونىمدەرى، كونديتەرلىك ونىمدەر، شوكولاد جانە باسقا تاۋارلار جاتادى. بۇگىنگى تاڭدا پاندەميانىڭ تەرىس ەكونوميكالىق سالدارى جىلدارعا سوزىلۋى مۇمكىن ەكەنىن ءتۇسىنۋىمىز قاجەت. وتاندىق كاسىپورىندار شەتەلدىك نارىق تاۋاشالارىن يەلەنۋدى ۇيرەنۋى كەرەك. ارينە، بۇل رەتتە ءبىزدىڭ تاراپتان قولداۋ شارالارى قاراستىرىلادى»، - دەيدى باقىت سۇلتانوۆ.
جىل باسىنان بەرى مەملەكەت 114 كاسىپورىنعا ءوز ونىمدەرىن سىرتقى نارىقتارعا جىلجىتۋ بويىنشا قولداۋ كورسەتىلگەن.
«باسىم كوپشىلىگى شاعىن كاسىپورىندار بولدى. ازىق- تۇلىك سالاسىنىڭ كاسىپورىندارى وتە بەلسەندى ەكسپورتتاۋشىلار بولىپ تابىلادى، ولار نەگىزىنەن ورتا جانە جوعارى شەكتى وڭدەلگەن تاۋارلاردى ەكسپورتتايدى. بۇل قولداۋ قۇرالى رەسەي، وزبەكستان، قىرعىزستان، تاجىكستان، اۋعانستان، قىتاي جانە تۇركىمەنستان نارىقتارىندا ءبىزدىڭ ونىمدەرىمىزگە دەگەن جوعارى سۇرانىستى تاعى دا راستايدى. سونىمەن قاتار، وتكىزۋ نارىقتارىن كەڭەيتە وتىرىپ، وتاندىق ونىمدەر گەرمانيا، پولشا، يتاليا، شۆەيتساريا، مولدوۆا سياقتى ەۋروپا ەلدەرىنىڭ نارىقتارىنا دا جەتكىزىلەدى. دەمەك، الداعى ۋاقىتتا اتقارىلاتىن جۇمىس كوپ. اسىرەسە جاھاندىق ساۋدا كولەمىنىڭ تومەندەۋ ءۇردىسى جاعدايىندا ءاردايىم نازاردا بولۋ قاجەتپىز» ، دەيدى باقىت سۇلتانوۆ.