ەلوردالىق ەگىز وقۋشى الەمنىڭ 11 جوعارعى وقۋ ورنىنان گرانت ۇتىپ الدى

None
None
نۇر-سۇلتان. قازاقپارات - ەلورداداعى 59№ مەكتەپ-ليتسەيىنىڭ 11- سىنىپ وقۋشىلارى ءادينا جانە ءاديا كاكىم ا ق ش - تىڭ 10 جانە اۆستراليانىڭ 1 جوعارعى وقۋ ورنىنىڭ گرانتىن ۇتىپ الىپ، اتالعان ۋنيۆەرسيتەتتەردەن شاقىرتۋ الدى.

وسى ورايدا استانالىق وقۋشىلار قازاقپارات تىلشىسىمەن حالىقارالىق ءبىلىم گرانتىن ۇتىپ الۋدىڭ قىر- سىرىمەن بولىسكەن بولاتىن.

«ءبىز 9- سىنىپتان باستاپ، جوعارعى وقۋ ورنىنا ءتۇسۋ جايىن ويلاستىرا باستادىق. ماسەلە قانداي ماماندىقتى تاڭدايمىز دەگەن سۇراقتان باستالدى. دەگەنمەن قانداي ماماندىق، قاي وقۋ ورنىنا بولماسىن ءتۇسۋ ءۇشىن ەڭ الدىمەن تىنىمسىز دايىندىقتىڭ كەرەكتىگىن تۇسىندىك. ءسويتىپ دايىندىقتى شەت ءتىلىن ۇيرەنۋدەن باستادىق. ياعني قىتاي تىلىنەن باستاپ، 9- سىنىپتان سوڭ ءبىز قىتايدىڭ وقۋ ورنىنا شاقىرتۋ الدىق. سودان سوڭ عانا ناقتى ماماندىقتى تاڭداپ، سوعان سايكەس ءپاننىڭ دايىندىعىنا ءمان بەرە باستادىق»، - دەيدى ەگىزدىڭ سىڭارى ءاديا كاكىم.

جاس تۇلەكتىڭ ايتۋىنشا، ماماندىق پەن وعان ءتۇسۋ ءۇشىن دايىندىقتى ەرتە جاستان باستاعان ءجون.

«ءبىز 9- سىنىپتان باستاپ ماماندىقتى تاڭداپ، تولىق دايىندىققا كوشتىك. مەن حالىقارالىق قاتىناستار ماماندىعىن، ال سىڭارىم ءادينا پسيحولوگيانى تاڭدادى. 3 جىلعى تىنىمسىز دايىندىقتىڭ ناتيجەسىندە ءبىز بيىل ا ق ش- تىڭ 10 بىردەي ۋنيۆەرسيتەتىنىڭ جانە اۆستراليانىڭ 1 ۋنيۆەرسيتەتىنىڭ گرانتىن ۇتىپ الىپ، شاقىرتۋ الدىق. ولاردىڭ ىشىندە 5 وقۋ ورنى تولىق تۇردە گرانت ۇسىنىپ وتىر، ال قالعانى جارتىلاي گرانت پەن پرەزيدەنتتىك ستيپەنديا ۇسىنۋدا»، - دەدى ول.

ەگىزدەردىڭ سۇيىكتى پاندەرىنىڭ قاتارىندا اعىلشىن ءتىلى، ادام جانە قوعام، ورىس ءتىلى جانە گەوگرافيا ساباقتارى بار.

«ەكەۋمىز دە بيىلعى «التىن بەلگى» توسبەلگىسىنە ۇمىتكەرمىز. مەكتەپتى ءساتتى اياقتاعان سوڭ، قايسى ۋنيۆەرسيتەتتى تاڭدايتىنىمىزدى انىقتاۋ قاجەت. ءبىزدى شاقىرعان جوعارعى وقۋ ورنىنىڭ ءارقايسىسىنىڭ وزىندىك ەرەكشەلىگى بار. مىسالعا ايتار بولسام، Public Affairs - Syracuse University-نە بيىلعى جىلى جان-جاقتان 31 مىڭنان استام ءوتىنىم كەلىپ تۇسكەن، سونىڭ ىشىنەن 3600 تۇلەكتى تاڭداپ العان، ونىڭ قاتارىندا ءبىز دە بارمىز. جانە سول ۋنيۆەرسيتەتتە ا ق ش- قا جانە الەمگە تانىمال تۇلعالار ءبىلىم العان»، - دەيدى ەلوردالىق تۇلەك.

سونداي-اق، استانالىق قوس ۆۋندەركيند بوس ۋاقىتتارىن قالاي وتكىزەتىندىكتەرى تۋرالى ايتىپ بەردى.

«ساباق پەن دايىندىقتان تىس ۋاقىتتا ۆولونتەرلىك ىسپەن اينالىسامىز.

اتاپ ايتقاندا، IRONMAN70.3، Astana Finance Days، Global Blockchain Conference سول سياقتى ەلوردادا ءۇش جىلدا ءبىر وتەتىن الەمدىك جانە ءداستۇرلى دىندەر ليدەرلەرىنىڭ سەزى سەكىلدى ايتۋلى شارالاردا ۆولونتەر قىزمەتىن اتقاردىق.

سول ەڭبەگىمىز ءۇشىن قازاقستان رەسپۋبليكاسى پارلامەنتى سەناتىنىڭ العىس حاتىن الدىق. ودان بولەك، سۋرەت سالىپ جانە Instagram پاراقشاسىندا شەتەلدىك وقۋ ورىندارىنا قالاي ءتۇسۋ كەرەكتىگى جونىندە ءوزىمىزدىڭ تاجىريبەمىزبەن بولىسەمىز. قازىر يسپان ءتىلىن ۇيرەنىپ ءجۇرمىز»، - دەيدى ءا. كاكىم.


سوڭعى جاڭالىقتار