الەمدەگى 11 مىڭ عالىم كليماتتىڭ وزگەرىپ جاتقانىن ايتىپ دابىل قاقتى
«بۇكىل الەمنىڭ تۇكپىر تۇكپىرىنەن شىققان 11 مىڭ عالىم ادامزات ءوزىنىڭ قازىرگى جولىن وزگەرتپەسە، كليماتتىڭ وزگەرۋى قانداي ازاپ شەككىزۋى مۇمكىن ەكەنى تۋرالى حات جازدى. ولار عالىم رەتىندە باردى بار دەپ ايتۋعا مورالدىق قۇقىقتارى بار ەكەنىن مالىمدەدى» ، دەلىنگەن ماتەريالدا.
بايانداما اۆتورلارىنىڭ ءبىرى فيبي بارنارد بۇل قۇجات ەڭ الدىمەن ساياساتكەرلەرگە باعىتتالعانىن ايتقان.
«كەلەر ۇرپاق ساياساتكەرلەر تۋرالى جامان ويدا بولادى، سەبەبى ولار كليماتتىڭ وزگەرۋى وركەنيەتكە تونگەن قاۋىپ ەكەنىنە ءمان بەرمەدى» ، - دەيدى ول.
ايتا كەتۋ كەرەك، عالىمدار بۇعان دەيىن دە بىرىگىپ پىكىر بىلدىرگەن ەدى. 2017 -جىلى 184 مەملەكەتتەن جينالعان 16 مىڭ عالىم «ادامدار مەن الەم قاقتىعىس الدىندا تۇرعانىن» ەسكەرتىپ ۇندەۋ حات جازعان ەدى. ال بيىلعى حات BioScience عىلىمي جۋرنالىندا جاريالاندى. 150-دەن استام مەملەكەت عالىمدارىنىڭ ايتۋىنشا، كليماتتىق داعدارىس «باي ءومىر سۇرۋگە ۇمتىلۋعا» بايلانىستى.
«كليمات بەلسەندىسى گرەتا تۋنبەرگتىڭ سوزدەرىن قايتالاعان عالىمدار ءتيىستى شارالار قابىلدامايتىن ساياساتكەرلەردى سىنادى. سونىمەن قاتار ولار بۇل ماسەلەنى شەشۋگە كومەكتەسە الاتىن ءۇش نەگىزگى فاكتوردى ايتتى. ولار: قازبا وتىننان باس تارتۋ، كليماتتى لاستايتىن قالدىقتاردى ازايتۋ جانە ەتتى از تۇتىنۋ، كومىرتەكسىز ەكونوميكا قۇرۋ، قىزداردى وقىتۋ مەن وتباسىن قۇرۋ قىزمەتىنە ينۆەستيتسيا سالۋ ارقىلى حالىق سانىن ارتتىرۋ» ، - دەپ جازادى اۆتور.