جۇرەگىڭىزدىڭ توقتاپ قالۋى مۇمكىن ەكەنىنىڭ 11 بەلگىسى
وكىندىرەتىنى سول، ءبارى ءبىز ويلاعانداي بولا بەرمەيدى. جۇرەكتىڭ دۇرىس سوقپاۋى جەڭىل- جەلپى سىرقات نەمەسە ورگانيزمنىڭ ەرەكشەلىگى سياقتى بولىپ كورىنەتىنى سيرەك ەمەس. مۇندا جۇرەك اۋىرىپ جۇرگەن بولۋى مۇمكىن ەكەنىنەن حابار بەرەتىن، ءبىراق ءاردايىم انىق بايقالا بەرمەيتىن سيمپتومدار ءتىزىمى بار.
نازار اۋدارىڭىزدار! 60 جاستان اسقاندار، سونداي- اق ارتىق سالماعى بار، ديابەتپەن، گيپەرتونيامەن اۋىراتىندار جانە قانىنداعى حولەستەرين دەڭگەيى جوعارى ادامدار ايرىقشا قىراعى جۇرگەنى ابزال.
1. كەۋدە تۇسىنداعى جايسىزدىق
بەدەلدى WebMD مەديتسينالىق رەسۋرسىنىڭ ساراپشىلارى بۇنى جۇرەكتە اقاۋ بارىن بىلدىرەتىن ەڭ كوپ كەزدەسەتىن بەلگى دەپ اتايدى.
بۇنىڭ ناقتى قالاي سەزىلەتىنىن سيپاتتاپ بەرۋ مۇمكىن ەمەس. بىرەۋ ازداپ قانا اۋىرسىنۋدى، ەكىنشى بىرەۋ - كەۋدەسىن بىردەڭە باسىپ، سىعىپ تۇرعانداي سەزىنەدى، تاعى بىرەۋلەر كەۋدەسى قىزىپ تۇرعانداي، اشىپ تۇرعانداي سەزىنەدى. قايتكەن كۇندە دە، ەگەر ءسىز كەي- كەيدە كەۋدە تۇسىڭىزدان تۇسىنىكسىز بىردەڭە سەزىنە باستاساڭىز، مەيلىنشە تەزىرەك تەراپيەۆتكە قارالىپ، ەلەكتروكارديوگرامماعا جانە جۇرەك ۋدز- عا (ۋلترا دىبىستىق زەرتتەۋ) جولداما الۋىڭىز قاجەت.
وسىلايشا ءبىزدىڭ باستى اعزامىزدى قانمەن قامتيتىن تامىرلاردىڭ اۋرۋلارى نەمەسە باستالىپ كەلە جاتقان جۇرەك ۇستاماسى بەلگى بەرەدى.
ەگەر اۋرۋ قاتتى جانە بىرنەشە مينۋتتان كوبىرەك بولسا، شۇعىل جەدەل جاردەمدى شاقىرىڭىز.
جاقسى حابار دا بار: كەۋدە تۇسى اۋراتىن كەزدەردىڭ % 80-90 جۇرەككە بايلانىستى ەمەس. ءبىراق بۇعان كوز جەتكىزۋ ءۇشىن دارىگەرگە كورىنىپ قايتقان دۇرىس.
2. تابەتتىڭ قاشۋى، جۇرەك اينۋى، اسقازانداعى اۋىرلىق سەزىمى نەمەسە اۋىرسىنۋى.
ارينە، اسقازان جۇرەككە قاتىسى جوق ءار ءتۇرلى سەبەپتەرمەن اۋىرۋى مۇمكىن. الايدا، كەي كەزدەرى اس قورىتۋ جۇيەسىنە قالىپتىدان از قان كەلىپ تۇرعاندىقتان اس دۇرىس قورىتىلماۋى مۇمكىن. ال قاننىڭ دۇرىس اينالماۋى - جۇرەكتىڭ ناشار ىستەگەنىنەن بولادى.
ەگەر سەبەپتەن سەبەپسىز جۇرەگىڭىز ايني بەرسە، اسىرەسە كەۋدە تۇسىڭىزدان جايسىزدىقتى جانە وسى تىزىمدەگى باسقا دا سيمپتومداردى سەزىنسەڭىز - تەراپيەۆتكە مىندەتتى تۇردە بارۋىڭىز كەرەك.
3. سول قولىڭىز اۋىرسىنىپ جۇرسە
جۇرەكتەن شىعاتىن نەرۆ تالشىقتارى دا، سول قولدان شىعاتىن نەرۆ تالشىقتارى دا سيگنالدى ميدىڭ ءبىر جەرىنە جىبەرىپ تۇرادى. وسىنىڭ ناتيجەسىندە مي جۇرەك اۋىرىپ تۇرعانىن نەمەسە سول قول اۋىرىپ تۇرعانىن ءاردايىم اجىراتىپ بىلە المايدى.
ەگەر ءسىز جاتتىعۋ كەزىندە قولىڭىزدى زورىقتىرىپ الساڭىز، ونى ۇرىپ الساڭىز نەمەسە سەرمەگەن كەزدە اۋىرتىم الساڭىز، ءوزىڭىزدى جامان سەزىنەرىڭىز انىق. ءبىراق سول جەردەگى اۋىرسىنۋ، ونىڭ ۇستىنە قاتتى اۋىرسىنۋ ءجوندى سەبەپسىز- اق بولا بەرسە، بۇل الاڭدايتىن جاعداي. دارىگەرلەر بۇنى ينفاركتتىڭ كلاسسيكالىق سيپمتومى دەپ اتايدى.
امەريكالىق كارديولوگيالىق اسسوتسياتسيا سول قولداعى كەنەت پايدا بولعان اۋىرسىنۋ بىرنەشە مينۋت بويى اۋىرسىنۋىن قويماسا، جەدەل جاردەمدى شاقىرۋعا كەڭەس بەرەدى.
ەگەر اۋىرسىنۋ سەزىمى تەز كەتىپ قالسا، ءبىراق قايتالانىپ تۇرسا، مىندەتتى تۇردە دارىگەرگە قارالىڭىز.
4. ءتىستىڭ جانە تومەنگى جاق سۇيەكتىڭ اۋىرسىنۋى
مي قاي جەردىڭ اۋىرىپ تۇرعانىن انىق اجىراتا المايتىن تاعى ءبىر جاعدايى - ءتىس پەن جۇرەكتىڭ اۋىرۋى. باقىتىمىزعا قاراي، ءتىس پەن جاقتىڭ اۋىراتىنى سالىستىرمالى تۇردە قاۋىپسىز سەبەپتەن اۋىرادى: ءتىستىڭ قۇرتتاۋى، جاق ەتىن سوزىپ الۋ نەمەسە سۋىق تيگەندىكتەن… ءبىراق سەبەبى جوق سياقتى بولىپ، ءتىس ۇدايى اۋىرۋىن قويماسا، كارديولوگقا كورىنۋ كەرەك.
كلينيكالىق پراكتيكادا جۇرتتى، كىنارات ولاردىڭ جۇرەگىندە بولعانىن ءبىلىپ الماي تۇرىپ، اۋرۋىنان ايىقتىرۋعا تىرىسىپ، تىستەرىن جۇلىپ تاستاعان جاعدايلار بولعان.
5. از ۋاقىتتىق باس اينالۋى نەمەسە كەڭىستىكتەگى باعىتىڭىزدان اداسىپ قالعانداي سەزىمدە ءجۇرۋ
اياق استىنان السىزدىك پايدا بولۋىنىڭ سەبەبى كوپ. مىسالى، تاماقتانباعالى كوپ بولدى. نەمەسە ءسىز ۇزاق ۋاقىت وتىرىپ- وتىرىپ، ديۆاننان جىلدام تۇرىپ كەتتىڭىز.
الايدا بۇنداي جاعدايعا ۇدايى تاپ بولىپ جۇرسەڭىز، تەزىرەك دارىگەرگە بارۋعا تىرىسىڭىز. بۇنداي جاعداي جۇرەك قاندى ميعا كەرەگىنشە جەتكىزە الماي جاتقانىن بىلدىرەدى. بۇل جاقىندا بولعالى جاتقان ينسۋلتتىڭ سيمپتومى بولۋى مۇمكىن.
6. ۇنەمى شارشاڭقى ءجۇرۋ
ءالسىز جۇرەك قان اينالىمىن تولىققاندى قامسىزداندىرا المايدى. وسى سەبەپتى اعزالار مەن تىندەر قورەكتىك زاتتاردان جانە وتتەگىنەن زارۋلىك كورىپ، تارىعا باستايدى. امان قالۋ ءۇشىن ورگانيزم ماڭىزدىلىق دەڭگەيى تومەنىرەك اعزالارعا - ەڭ اۋەلى قول- اياققا - اعاتىن قاندى ازايتىپ، ونى ماڭىزدىلىعى جوعارىراق اعزالارعا - جۇرەككە، ميعا، وكپەگە قاراي جىبەرىپ وتىرادى. ال قول مەن اياق بولسا...
سىزگە ادەتكە اينالعان كۇندەلىكتى ءىس- قيمىلدارىڭىزدى اتقارۋعا كۇش- قايراتىڭىز جەتپەي قالادى - مىسالى، دۋشقا ءتۇسۋدىڭ وزىنە شاماڭىز كەلمەي، ىدىس- اياقتى جۋۋ قيىنداپ، باسپالداقپەن جوعارى قاراي ءجۇرۋ قيىننىڭ قيامەتى بولىپ كەتەدى. ءتىپتى دەمالۋدىڭ ءوزى دەنەڭىزدى سەرگىتپەي، «كىرپىك قيمىلداتۋدىڭ وزىنە ەرىنىپ» تۇراسىز.
ەگەر بۇنداي جاعداي سىزگە تانىس بولسا جانە بىرنەشە كۇننەن نەمەسە ودان دا ۇزاق ۋاقىتتان بەرى كەلە جاتسا، جۇرەكتىڭ باستالىپ كەلە جاتقان اۋرۋ- سىرقاۋلارىن اسقىندىرىپ الماۋ ءۇشىن، كارديولوگپەن كەڭەسىن الىڭىز.
7. اياقتىڭ ءىسىنۋى
اياق پەن قولداعى قان اينالىمى دۇرىس بولماعاننىڭ كەسىرىنەن ليمفا اعىنى - تىندەردەگى ارتىق سۇيىقتىقتىڭ شىعارىلۋى دا - دۇرىس بولمايدى. بۇدان اياققا كوبىرەك زيان كەلەدى. سۇيىقتىق تەرى ىشىندە قوردالانىپ قالىپ، اياق دومبىعىپ كەتەدى.
ەگەر اياقتىڭ ءىسىنۋى ءسىزدىڭ اجىراماس سەرىگىڭىز بولىپ كەتسە، بۇل جايىندا تەراپيەۆتپەن نەمەسە كارديولوگپەن مىندەتتى تۇردە كەڭەسۋ قاجەت.
8. كوپتەن كەتپەي جۇرگەن جوتەل
كوبىنەسە جوتەل - سۋىق تيگەندە بىرگە جۇرەتىن سەرىگى. ءبىراق ءسىز تيگەن سۋىقتان ەكى- ءۇش اپتا بۇرىن امان- ەسەن قۇتىلساڭىز، ال بۇل سيمپتوم كەتپەي جۇرسە، دارىگەردىڭ قىزمەتىنە جۇگىنۋىڭىزدىڭ قاجەتتىگى انىق.
كەتپەي جۇرگەن جوتەل اللەرگيانىڭ نەمەسە، مىسالى، برونحيتتىڭ سەرىگى دە بولۋى مۇمكىن (بۇنىڭ كوڭىل كوتەرمەيتىنى بەلگىلى). ءبىراق كەي كەزدەرى جوتەلدى ىلعالدىڭ وكپەدەن شىعۋىن قيىنداتىپ تاستايتىن جۇرەك قاۋقارسىزدىعى قوزدىرىپ جىبەرەدى.
جوتەلگەندە ءبولىنىپ شىعاتىن قىزعىلتىم نەمەسە اق ءتۇستى شىرىش «جۇرەكتىك» جوتەلگە ءتان نىشان بولىپ تابىلادى. وسىنداي نارسەنى بايقاساڭىز - كارديولوگقا قاراي زاۋلاڭىز!
9. سەبەپسىز ەنتىگۋ
ەنتىگۋ (القىنۋ) — قان قۇرامىندا وتتەگىنىڭ ازدىعىن بىلدىرەتىن العاشقى بەلگى. ادەتتە ونىڭ سەبەبى فيزيكالىق اۋىر ءىس قيمىل بولادى. بۇلشىق ەتكە قيمىل- قوزعالىس ءۇشىن كوپ وتتەگى قاجەت جانە ول وتتەگىنى قاننان ءسىڭىرىپ الىپ وتىرادى. وتتەگى جەتپەي قالماۋى ءۇشىن مي وكپەگە جىلدامىراق تىنىستاۋدى بۇيىرادى.
سونىمەن قاتار، ەنتىگىسكە سالماقتىڭ ارتىقتىعى، ءبىر ورىننان قوزعالمايتىن ءومىر سالتى، كوڭىل شيرىعۋى (سترەسس)، قاپىرىق ءۇي- جايدا بولۋ... اپارىپ سوعۋى مۇمكىن.
ءبىراق سيمپتوم الىپ بارا جاتقان سەبەپسىز پايدا بولىپ جاتسا، ونىڭ ۇستىنە ۇنەمى شارشاڭقى جۇرەتىن بولساڭىز، كەۋدە تۇسىڭىزدا جايسىزدىقتى سەزىنسەڭىز جانە وسى تىزىمدەگى باسقا دا بەلگىلەر بار بولسا، كارديولوگقا باراتىن ۋاقىتىڭىز كەلگەنى انىق.
وتتەگى مولشەرىنىڭ جەتكىلىكسىز بولۋ ىقتيمالدىعى جۇرەك دۇرىس ىستەمەي، قان اينالىمىنىڭ ناشارلاپ كەتۋىنەن بولۋى مۇمكىن.
10. قاتتى قورىلداۋ
ۇيىقتاپ جاتىپ قورىلداۋ، جالپى العاندا، قالىپتى نارسە. ءبىراق ءسىز وتە قاتتى قورىلداپ ۇيىقتاپ جۇرسەڭىز، بۇل اپنوەنىڭ — ۇيقى كەزىندە دەمنىڭ از- كەم ۋاقىتقا توقتاپ قالىپ جاتقانىنىڭ بەلگىسى.
اپنوەنىڭ جۇرەك- قانتامىر جۇيەسىن ءبۇلدىرىپ جىبەرەتىن اسەرى بار. بىرىنشىدەن، جۇرەك بۇلشىق ەتىنىڭ گيپوكسياسىنا شالدىقتىرادى. ەكىنشىدەن، اپنوە ادامنىڭ باستى اعزاسىنىڭ جۇمىسىن قيىنداتىپ جىبەرەتىن گيپەرتونيانىڭ (جوعارى قان قىسىمى) الىپ كەتۋ قاۋىپىن ارتتىرادى. سالدارىنان ارتىق كۇش تۇسەتىن جۇرەك- قان تامىر جۇيەسى كەز كەلگەن ۋاقىتتا ىسكە جاراماي قالۋى مۇمكىن.
سوندىقتان، اپنوەنى ەمدەمەسە بولمايدى. قالاي ەمدەۋ كەرەك ەكەنىن اۋەلى تەراپيەۆتىڭىزدەن سۇراپ ءبىلىڭىز.
11. جۇرەك سوعىسىنىڭ جيىلەۋى جانە/نەمەسە بىركەلكى سوقپاۋى
جۇرەك جارىلىپ كەتەردەي سەزىم ءاربىر عاشىق ادامنىڭ نەمەسە، مىسالى، سپرينتەردىڭ باسىنان وتكەن. تىنىشىڭ كەتىپ، تولقىعان نەمەسە ۇلكەن فيزيكالىق كۇش تۇسكەن كەزدە بۇلاي سەزىنۋ قالىپتى جاعداي.
ءبىراق جۇرەك اسا ءبىر سەبەپسىز- اق كەۋدەدەن اتقىپ شىعىپ كەتەتىندەي بولعان كەزدە نەمەسە ونىڭ سوقپاي قالىپ جاتقانىن سەزسەڭىز، بۇل ءبىر گاپ بارىنىڭ انىق بەلگىسى. دەرەۋ دارىگەرگە جونەلىڭىز.