11 جاسار الينا كۇلبايەۆا يتالياداعى تەلەۆيزيالىق ءان بايقاۋىنىڭ فينالىنا ءوتتى
الەمنىڭ دارىندى جەتكىنشەكتەرى تاۋەكەل ەتىپ، باق سىناعان كونكۋرستىڭ ىرىكتەۋ تۋرى يتاليانىڭ سكالا قالاسىندا ءوتتى. ول اتالمىش ەلدىڭ تانىمال وپەرا ءانشىسى ەنريكە كورۋزوعا ارنالعان شىعارمانى ورىنداپ، ونەرسۇيەر قاۋىمدى ءتانتى ەتتى. قازىلار القاسىنىڭ ءبىراۋىزدى شەشىمىمەن الينا بايقاۋدىڭ اقتىق سىنىنا جولداما الدى. سول ۋاقىتتا قازاق قىزى شىرقاعان ءان يتاليانىڭ راديوستانتسيالارى ارقىلى ءبىر اي بويى تاراتىلدى.
«تانىمال اۋەندى ورىنداۋ بالا ءۇشىن وڭاي ەمەس. ءبىزدىڭ تالانتتى جەتكىنشەكتەر حالىقارالىق بايقاۋلاردىڭ شىڭىن باعىندىرسا، ءبىز قۋانىمىز. ولاردى ماقتان ەتەمىز. الينا - ارپا ىشىندەگى ءبىر ءبيداي. ەڭبەكقورلىعىنا تاڭ قالامىز. مۋزىكا دەسە، جانىن بەرەدى»، - دەيدى مۋزىكالىق كوللەدج ديرەكتورىنىڭ ورىنباسارى ەلۆيرا كاشۋك.
ال الينا كۇلبايەۆا بايقاۋدا باسەكە جوعارى ەكەنىن ايتادى.
«ساحناعا شىققاندا بويىمداعى قوبالجۋ تەز باسىلادى. ءومىرىمدى ءانسىز ەلەستەتە المايمىن. بايقاۋدا مەن سياقتى دارىندىلار كوپ بولدى. دەسە دە، ولارعا دەس بەرمەي، ەلىمدى ەۋروپاعا تانىتتىم. بۇل مەن ءۇشىن ۇلكەن ابىروي. بۇگىندە الەمگە تانىمال جەرلەسىمىز ماريا مۋدرياكقا ۇقساعىم كەلەدى»، - دەيدى ول.
كارى قۇرلىقتا وتكەن حالىقارالىق بايقاۋ الينا باعىندىرعان بەلەستەردىڭ ءبىرى عانا. ول جەتى جاسىنان بەرى ونداعان حالىقارالىق كونكۋرسقا قاتىسقان. دەسە دە يتاليادا وتكەن بايقاۋدىڭ ورنى بولەك.
«يتالياندىقتار - ءانشى حالىق. بايقاۋلارعا كەلگەن بالالارىمىزدى كورگەندە قىزىعا دا، قىزعانا دا قارايتىنى سوندىقتان. سەبەبى تالانتتى جەتكىنشەكتەر وتە كوپ. قىزىم ساحناعا شىققانداعى سەزىمىمدى سوزبەن جەتكىزۋ مۇمكىن ەمەس. الينا «پامياتي كورۋزو» ءانىن تاڭدادى. بالا ءۇشىن كۇردەلى شىعارمانى ورىنداۋ وڭاي ەمەس»، - دەيدى وقۋشى قىزدىڭ اناسى الينۇر كۇلبايەۆا.
25 جىلدىق تاريحى بار بايقاۋدىڭ اقتىق سىنى قازان ايىندا وتەدى. بايراقتى دودانىڭ تالابى بويىنشا اندەر يتاليان تىلىندە ورىندالۋى شارت. قازىرگى ۋاقىتتا الينا تىڭعىلىقتى دايىندىق ۇستىندە. شەت ءتىلىن مەڭگەرۋدى دە ماقسات ەتەدى.
پاۆلودار مۋزىكالىق كوللەدجى 60 جىل ىشىندە قازاقستاندى الەمگە تانىمال ونەرپازداردىڭ تالاي تولقىنىن ءوسىردى. بۇگىندە وقۋ ورنىنان تۇلەپ ۇشقان جاستار حالىقارالىق ساحنالاردا قازاق ەلىنىڭ نامىسىن ابىرويمەن قورعاۋدا.