جامبىل وبلىسىندا ءىرى جول اپاتى: 11 ادام قازا بولدى
وقىس وقيعا تۋرالى وبلىس اكىمىنىڭ باسپا ءسوز قىزمەتى مالىمدەدى.
«20 -ءساۋىر كۇنى تاڭعى 04:15-تە «الماتى- تاشكەنت» اۆتوجولىنىڭ 181-شاقىرىمىندا Toyotа Camri جەڭىل اۆتوكولىگى وسى باعىتتا ءجۇرىپ بارا جاتقان Mersedes-Bens 814 جۇك كولىگىنىڭ ارتىنا سوعىلعان. اپات سالدارىنان جەڭىل كولىكتە وتىرعان ايەل وقيعا ورنىندا كوز جۇمدى. سول ساتتە شىمكەنت قالاسىنان الماتى قالاسىنا بەت العان Van Hool اۆتوبۋسى اپاتقا ۇشىراعان كولىكتى اينالىپ وتپەك بولىپ، اۋدارىلىپ قالدى. اۆتوبۋستاعى 46 جولاۋشىنىڭ 8- ءى وقيعا ورنىندا قازا بولدى. 46 ازاماتتىڭ 44- ءى وزبەكستان ازاماتتارى، 2-ەۋى - قازاقستاندىق»، - دەلىنگەن مالىمدەمەدە.
مالىمەتكە ساي، وقيعا ورنىنا جەدەل تۇردە قورداي اۋدانىنىڭ اكىمى، جەدەل جاردەم، توتەنشە جاعداي قىزمەتتەرى جەتىپ، زارداپ شەككەندەردى وتار، قوردايداعى اۋرۋحانالارعا جەتكىزدى.
اپاتقا ۇشىراعانداردىڭ 2-ەۋى اۋرۋحاناعا جەتپەي كوز جۇمعانى بەلگىلى بولدى. جالپى، اپات سالدارىنان 11 ادام قازا تاپتى. سونداي- اق، 5 ادام وتا ۇستەلىندە، ال 3 ادام جان ساقتاۋ بولىمىندە جاتىر.
قازىرگى تاڭدا جاراقات العان باسقا جولاۋشىلارعا ءتيىستى كومەك كورسەتىلۋدە. زارداپ شەككەندەرگە جەدەل كومەك كورسەتۋ ءۇشىن وبلىستىق دەنساۋلىق باسقارماسىنىڭ باسشىسى م. جۇمانقۇلوۆ باستاعان 3 وتاشى- دارىگەر تىكۇشاقپەن قورداي اۋدانىنا جەتكىزىلدى.
ايتا كەتۋ كەرەك، ورىن العان وقيعاعا قاتىستى شۇعىل ارنايى كوميسسيا قۇرىلدى. ونىڭ قۇرامىندا وبلىس اكىمىنىڭ ءبىرىنشى ورىنباسارى ب. ورىنبەكوۆ، وبلىستىق پوليتسيا دەپارتامەنتىنىڭ باستىعى ا. ورازالييەۆ، باسقا دا ءتيىستى لاۋازىم يەلەرى بار. كوميسسيا وقيعانىڭ ورنىنا بارىپ، جول- كولىك وقيعاسىنىڭ ءمان- جايىن انىقتاپ، زارداپ شەككەندەرگە ساپالى كومەك كورسەتۋدى ۇيىمداستىرۋدا. سونىمەن بىرگە وقيعا ورنىنا وبلىس پروكۋرورى ج. قۇسايىنوۆ تا شۇعىل جەتتى.
اپاتقا قاتىستى قازاقستان رەسپۋبليكاسى قىلمىستىق كودەكسىنىڭ 345-بابىنىڭ 4-تارماعىنا ساي قىلمىستىق ءىس قوزعالدى.
اۆتور: عيبرات سەمباي