قازاقستاندا براكونەرلىككە قاتىستى 117 قىلمىستىق ءىس قوزعالعان

نۇر-سۇلتان. قازاقپارات - جىل باسىنان بەرى براكونەرلىك فاكتىسى بويىنشا 117 قىلمىستىق ءىس، 6066 اكىمشىلىك ءىس قوزعالدى، دەپ حابارلايدى قازاقپارات ق ر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنە سىلتەمە جاساپ.

«بۇگىنگى تاڭدا قوعام بەلسەندىلەرى مەن ەكوبەلسەندىلەردىڭ قىزۋ تالقىسىندا جۇرگەن تاقىرىپتىڭ ءبىرى - براكونەرلىك. زاڭسىز اڭ اۋلاپ، تابيعات پەن مەملەكەتكە ولشەۋسىز شىعىن مەن قاتەر كەلتىرۋشىلەرگە قارسى كۇرەس جىل ون ەكى اي بويى ۇزدىكسىز جۇرگىزىلۋدە. دەسە دە بيىلعى 10 ايدا براكونەرلىك فاكتىسى بويىنشا 117 قىلمىستىق، 6066 اكىمشىلىك ءىس قوزعالىپ ۇلگەرگەن»، - دەپ حابارلادى كوميتەتتىڭ باسپا ءسوز قىزمەتى.

بيىل دا براكونەرلىكپەن كۇرەستى جالعاستىرۋ ءۇشىن مەملەكەتتىك بيۋجەتتەن 845012 ميلليون تەڭگە قارجى بولىنگەن. سونىمەن بىرگە ينسپەكتورلار ءۇشىن 10 كاماز كولىگى، 9 Toyota Land Cruiser اۆتوكولىگى، 2 Toyota Corolla اۆتوكولىگى ساتىپ الىنعان.

«بۇل شارالار براكونەرلىكپەن كۇرەسكە ۇلكەن سەرپىن بەرەتىنى ءسوزسىز. براكونەرلىكتى جەڭۋ ءۇشىن ونىمەن كۇرەسۋ ازدىق ەتەتىنىن ەسكەرۋ كەرەك. سوندىقتان كوميتەت تاراپىنان قوعاممەن جۇمىس تا بەلسەندى تۇردە جۇرگىزىلۋدە»، - دەيدى كوميتەت.