تاراز تۇرمەسىندە سوتتالعانداردان 115 تىيىم سالىنعان زات تابىلدى
سوتتالعانداردىڭ قۇقىقتارىنىڭ ساقتالۋىن قامتاماسىز ەتۋ ماقساتىندا بۇل جولى وڭىرلىك قىلمىستىق- اتقارۋ جۇيەسى دەپارتامەنتىنە باعىنىستى ج د-158/7 مەكەمەسى تەكسەرىلدى.
ۇلتتىق قاۋىپسىزدىك كوميتەتى، پروكۋراتۋرا، اسكەري پوليتسيا، اسكەري پروكۋراتۋرا وڭىردەگى ۇلتتىق الدىن الۋ تەتىگىنىڭ وكىلدەرى جانە مەكەمەنىڭ جەكە قۇرام قىزمەتكەرلەرىنەن قۇرالعان 338 مامان سوتتالعان ازاماتتاردان تىيىم سالىنعان زاتتاردى تاركىلەدى.
اتاپ ايتقاندا، ەرەكشە رەجيمدەگى تۇزەۋ مەكەمەسىندەگى جازاسىن وتەۋشىلەردەن 37 ۇيالى تەلەفون، 25 زاريادتاعىش قۇرال، 5 sim-كارتا جانە سوتتالعاندار اراسىندا قايعىلى جاعدايعا سوقتىرۋى مۇمكىن 48 كەسۋ-تەسۋ (پىشاقتار، قولدان جاسالعان كەسكىشتەر جانە ت. ب.) قۇرالدارى تابىلدى.
ايتا كەتەيىك، تىيىم سالىنعان زاتتاردىڭ باسىم كوپشىلىگى سوتتالعانداردىڭ تۋعان-تۋىستارىنىڭ «كومەگىمەن» ىشكە ەنگەن. ياعني، تىيىم سالىنعان زاتتاردى جاقىندارىنا «جاقسىلىق» جاساۋدى كوزدەيتىن جازاسىن وتەۋشىلەردىڭ تۋىستارى مەكەمەنىڭ سىرتقى قورشاۋىنان لاقتىرۋ فاكتىلەرى ازايماي تۇر. ماسەلەن، جىل باسىنان بەرى ءدال وسىنداي 80 دەرەك تىركەلىپ، زاڭدى بۇزعان 51 ازامات ۇستالعان.
جامبىل وبلىسى بويىنشا قىلمىستىق-اتقارۋ جۇيەسى دەپارتامەنتى باستىعىنىڭ مىندەتىن اتقارۋشى تەڭىزجان جانىبەكوۆ تۋعان-تۋىسىن زاڭبۇزۋشىلىققا يتەرمەلەگەن سوتتالعانداردىڭ تارتىپتىك جازاعا تارتىلاتىنىن، سونداي-اق زاڭدى بۇزعان ازاماتتاردىڭ جازاسىز قالمايتىنىن ايتادى.
«ءبىز تارازداعى ج د-158/7 مەكەمەسىنە جوسپارلى ءتىنتۋ جۇمىستارىن جۇرگىزىپ، سوتتالعانداردان تىيىم سالىنعان زاتتاردى تاركىلەدىك. بۇعان دەيىن، ءدال وسىنداي جۇمىستار ج د-158/2 جانە ج د-158/4 مەكەمەسىنە جۇرگىزىلگەن بولاتىن. جالپى، تىيىم سالىنعان زاتتاردىڭ مەكەمەگە ەنۋ ارنالارىن انىقتاۋ مەن جولىن كەسۋ جۇمىستارى الداعى ۋاقىتتا دا جالعاسىن تابادى. سوندىقتان، تۇزەۋ مەكەمەلەرىندە جازاسىن وتەۋشى جاقىندارىنا «كومەكتەسپەك» نيەتتە زاڭدى بۇزعان ازاماتتار جاۋاپكەرشىلىككە تارتىلاتىنىن قاتاڭ ەسكەرتەمىز. زاڭ الدىندا بارلىق ادام بىردەي جاۋاپ بەرەدى»، — دەدى ت. جانىبەكوۆ.