ماقتاارال اۋدانىندا 115 وتباسىعا كومەك كورسەتىلمەك
اۋدان اكىمى باقىت اسانوۆ وسى باعدارلامعا ەنگەن مىرزاكەنت كەنتىندەگى مۇقتاج وتباسىلاردىڭ ۇيلەرىن ارنايى ارالاپ، جاعدايلارىمەن تانىستى، دەپ حابارلايدى قازاقپارات ءتىلشىسى.
اۋدان ورتالىعى مىرزاكەنت كەنتىندە قيىن جاعدايعا تاپ بولعان جانە الەۋمەتتىك جاعدايلارى وتە تومەن 12 وتباسى اتالعان باعدارلاماعا ەنگەن. بۇل وتباسىلاردىڭ باسىم بولىگى تۇرعىن ۇيلەرىن كۇردەلى جوندەۋگە مۇقتاج. ءتىپتى، كۇندەلىكتى تۇتىناتىن ازىق- تۇلىكتەرىن الۋعا جاعدايلارى جەتپەيتىندەرى دە بار.
سونىمەن قاتار، كيىم- كەشەككە، تۇرمىستىق قاتتى وتىنعا دا قاجەتتىلىكتەرى تۋىنداپ وتىر. اۋدان باسشىسى ءاربىر وتباسىنىڭ جاعدايىمەن جەكە تانىسىپ، وتباسىنىڭ جۇمىسقا قابىلەتتى مۇشەلەرىن جۇمىسقا ورنالاستىرۋعا جانە كاسىپكەرلىك باعدارلاماسى اياسىندا ءوز كاسىپتەرىن اشۋعا كومەك بەرىلەتىنىن جەتكىزدى.
سونداي-اق، تۇرعىن ۇيگە مۇقتاجدىعى بار وتباسىلاردى جەر مەن ءۇي كەزەگىنە تۇرعىزۋ ءۇشىن كەنت اكىمى اپپاراتىنىڭ قىزمەتكەرلەرىنە ارنايى تاپسىرما بەردى.
ايتا كەتەيىك، «قامقورلىق» كەشەندى باعدارلاماسى بويىنشا وبلىستىق جانە اۋداندىق بيۋدجەت ەسەبىنەن، دەمەۋشىلەر جانە قايىرىمدىلىق قورلار ارقىلى مۇقتاج وتباسىلاردىڭ ءاربىر مۇشەسىنە كومەك بەرۋ قاراستىرىلعان. اتاپ ايتقاندا ولارعا مەديتسينالىق، جۇمىسقا ورنالاسۋ، ازىق-تۇلىك پەن تۇرمىستىق زاتتار اپەرۋ، ءبىلىم الۋ جانە وزگە دە ماسەلەلەر بويىنشا تۇراقتى كومەك كورسەتىلىپ، ەڭسە تىكتەۋلەرىنە جاعداي جاسالۋدا.