قازاقستان ءال- فارابيدىڭ 1150 جىلدىعىن مەرەكەلەۋدى رەسمي تۇردە باستادى
ق ر مەملەكەتتىك حاتشىسى قىرىمبەك كوشەربايەۆ ءال- فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەر سارايىندا وتكەن شارادا ءابۋ ناسىر ءال- فارابيدىڭ 1150 جىلدىعىن مەرەكەلەۋ رەسمي تۇردە باستالعانىن ايتتى.
مەملەكەتتىك حاتشى ءال- فارابيدىڭ 1150 جىلدىعىن مەرەكەلەۋ ۇلى عۇلاما مۇرالارىن جانە ءبىزدىڭ ەلدەگى، سونىمەن بىرگە شەتەلدەگى الەمدىك وركەنيەت دامۋىنا قوسقان ۇلەسىن زەردەلەۋگە قۋاتتى سەرپىن بەرەتىنىن، جاستاردىڭ ۇلتتىق ماقتانىش سەزىمىن قالىپتاستىرۋعا، سونداي- اق ولاردى عىلىمي قىزمەت سالاسىنا تارتۋعا مۇمكىندىك بەرەتىنىن اتاپ ءوتتى.
«قۇرمەتتى قوناقتار! بارشاڭىزدى ءال- فارابيدىڭ 1150 جىلدىق مەرەيتويىمەن قۇتتىقتايمىن. سىزدەرگە ساتتىلىك تىلەيمىن»، - دەدى ق ر مەملەكەتتىك حاتشىسى.
بۇگىن ۋنيۆەرسيتەت قابىرعاسىندا ءال- فارابي كىتاپحانا- ورتالىعى اشىلدى. تۇساۋكەسەر بارىسىندا قوناقتار ۇلى ويشىلعا ارنالعان مۇراجاي ەكسپوزيسيالارىمەن تانىستى، ونىڭ شىعارمالارى قويىلعان كورمەنى، قازاقستاننىڭ تۇڭعىش پرەزيدەنتى- ەلباسىنا، اباي مەن الاش قوزعالىسىنىڭ قايراتكەرلەرىنە، سيرەك كەزدەسەتىن جانە قۇندى كىتاپتار قورىنا ارنالعان ساندىق زالدى ارالاپ كوردى.
الداعى ۋاقىتتا ءال- فارابي كىتاپحانا - ورتالىعى ۇلى ويشىلدىڭ يدەيالارى مەن شىعارماشىلىعىن ناسيحاتتايتىن بولادى.
اۆتور: الما مۇقانوۆا