وسكەمەندە ءال-فارابيدىڭ 1150 جىلدىعىنا وراي VIII رەسپۋبليكالىق قىسقى ۋنيۆەرسيادا وتۋدە
جارىس شىمىلدىعىن پرەزيدەنتتىك كوپسايىسقا قاتىسۋشى ستۋدەنتتەر اشتى. ۋنيۆەرسياداعا بارلىعى 12 ۋنيۆەرسيتەتتىڭ وكىلدەرى كەلگەن. بىرنەشە كەزەڭنەن تۇراتىن سايىس ءۇش كۇنگە سوزىلماق. بۇل شارانى ۇيىمداستىرۋداعى باستى ماقساتتاردىڭ ءبىرى - شۆەيتساريانىڭ ليۋتسەرن قالاسىندا وتەتىن XXX قىسقى ۋنيۆەرسيادا ويىندارىنا ەل نامىسىن قورعايتىن ەڭ جاقسى سپورتشىلاردى ىرىكتەۋ.
«بارلىق سپورتشىلارعا ساتتىلىك تىلەيمىن. شىعىس قازاقستان وبلىسى مەن شقمتۋ ۋنيۆەرسيتەتىنە وسى دودانى ۇيىمداستىرۋعا قولداۋ بىلدىرگەنى ءۇشىن العىس بىلدىرگىم كەلەدى»، - دەدى ق ر ءبىلىم جانە عىلىم مينيسترلىگى ۇلتتىق عىلىمي-پراكتيكالىق دەنە تاربيەسى ورتالىعىنىڭ باس ديرەكتورى سادىق مۇستافايەۆ ۋنيۆەرسيادانىڭ اشىلۋ سالتاناتىندا.
ايتا كەتەيىك، ءبىرىنشى كۇنى شاڭعى سپورتىنان جارىستار وتكەن. وندا باعىندىرار مەجە قىزدار ءۇشىن - 3 شاقىرىم، جىگىتتەر ءۇشىن - 5 شاقىرىم بولدى.