اقتاۋدا 113 ميلليون جىل بۇرىن ءومىر سۇرگەن يحتيوزاۆردىڭ قاڭقاسى تانىستىرىلدى
سۋ جانۋارىنىڭ سۇيەگى ماۋسىم ايىندا ماڭعىستاۋ اۋدانىنان تابىلعان. ول بۇرىن تەتيس مۇحيتىندا ءومىر سۇرگەن.
سۋ جانۋارىنىڭ قاڭقاسىن ماۋسىم ايىندا ماڭعىستاۋ اۋدانى، «سۋلىقاپى» شاتقالىنان اۋەسقوي پالەونتولوگ ۆلاديمير يارتسيەۆ تاپقان. ماۋسىم ايىندا ماڭعىستاۋ وبلىستىق مۋزەي قىزمەتكەرلەرى، م. وتەمىسوۆ اتىنداعى باتىس قازاقستان ۋنيۆەرسيتەتىنىڭ ماماندارى رەسەيدەن كەلگەن پالەونتولوگ، يحتيوزاۆر جونىندەگى مامان ۆ. م. ەفيموۆتىڭ قاتىسۋىمەن قۇمدى القاپتاعى سۇيەك قالدىقتارىن قازىپ الۋ جۇمىستارىن جۇرگىزگەن.
تابىلعان قالدىقتار مۋزەيمەن كەلىسىم بويىنشا ورال قالاسىنا 3 اي مەرزىم ىشىندە پرەپاراتتاۋعا جىبەرىلگەن.
«ورالدا پالەونتولوگ ءجاميلا جاقىپوۆا سۇيەكتەردى ارنايى قوسپالارمەن وڭدەپ، تابىلعان بولشەكتەردىڭ ءاربىرىنىڭ گيپستەلگەن كوشىرمەسىن جاساپ شىقتى. وسىلايشا، ەجەلگى تىرشىلىك يەسىنىڭ ەكى كوشىرمەسى جاسالدى، ءبىرى - مۋزەيگە، ءبىرى - ۋنيۆەرسيتەتكە قالدىرىلدى» ، - دەيدى تابيعات ءبولىمىنىڭ مامانى داريعا امانيازوۆا.