قازاقستاندا بەنزين ءوندىرىسى 11,7 پايىزعا ارتتى

استانا. قازاقپارات - قازاقستاندا 2018-جىلدىڭ قاڭتار-ماۋسىم ايلارىندا بەنزين ءوندىرىسى 1761,9 مىڭ تونناعا جەتتى.

2017-جىلدىڭ سايكەس كەزەڭىمەن سالىستىرعاندا بۇل كورسەتكىش 11,7 پايىزعا كوپ، دەپ حابارلايدى قازاقپارات ءتىلشىسى ق ر ۇ ە م ستاتيستيكا كوميتەتىنە سىلتەمە جاساپ.

ەسەپتىك كەزەڭدە قازاقستاندا 121,8 مىڭ توننا كەروسين وندىرىلگەن. ناقتىراق ايتقاندا، بۇل كورسەتكىش وتكەن جىلدىڭ قاڭتار-ماۋسىم ايلارىنا قاراعاندا 9,4 پايىزعا ارتىق. سونىمەن بىرگە، 1247,4 مىڭ توننا (+6,6 پايىز) تومەندەتىلگەن پروپان مەن بۋتان، 2224,3 مىڭ توننا (-0,9 پايىز) گازويل، 1505,9 مىڭ توننا مازۋت (-2,5 پايىز) شىعارىلعان.

بۇدان بولەك، 1014 مىڭ توننا (+4,5 پايىز) فەرروقورىتپا، 1461 مىڭ توننا (+6 پايىز) تەگىس پروكات، 75,9 مىڭ توننا (+3,2 پايىز) تازارتىلعان قورعاسىن، 164,5 مىڭ توننا (+1,2 پايىز) مىرىش، 199,5 مىڭ توننا (-5,7 پايىز) تازارتىلعان مىس وندىرىلگەن.