باتىس قازاقستاندا 11 ادامنىڭ مالىن ۇرلاپ، 3 ميلليوننان استام تەڭگەگە زالال كەلتىرگەن توپ قۇرىقتالدى

ورال. قازاقپارات - باتىس قازاقستان وبلىسىندا 11 ادامنىڭ مالىن ۇرلاپ، 3 ميلليوننان استام تەڭگەگە زالال كەلتىرگەن توپ قۇرىقتالدى، دەپ حابارلايدى قازاقپارات ءتىلشىسى.

ب ق و پوليتسيا دەپارتامەنتىنىڭ باسپا ءسوز قىزمەتى ءمالىم ەتكەنىندەي، قازىرگى كەزدە تەرەكتى اۋدانىنىڭ 2004، 2003 جانە 1999-جىلعى ءۇش تۇرعىنىنا قاتىستى ق ر ق ك 188-1 3-بولىگىنە (مال ۇرلىعى) سوتقا دەيىنگى تەرگەۋ امالدارى جۇرگىزىلۋدە.

ۇيىمداسقان توپ بيىلعى مامىر ايىنان بەرى ءوزارا كەلىسىپ، مال ۇرلىعىمەن اينالىسىپ كەلگەن. ولار مالدى نەگىزىنەن ەركىن جايىلىمنان اكەتىپ وتىرعان. تولىق اقپارات تەرگەۋ اياقتالعاننان كەيىن بەرىلەدى.

ب ق و پوليتسيا دەپارتامەنتى تۇرعىنداردان مالدى باعۋسىز جىبەرمەۋدى وتىنەدى. ويتكەنى قاراۋسىز جۇرگەن مال وڭاي ولجاعا اينالادى. ەكىنشىدەن، جول-كولىك وقيعالارىنىڭ بولۋىنا سەبەپشى بولادى.

ەسكە سالا كەتەيىك، بۇدان بۇرىن ب ق و تۇرعىنىنىڭ جارتى توننا بالىقپەن ۇستالعانىن جازعان بولاتىنبىز.