الەمدەگى ەڭ باي ادام ءبىر كۇندە 11,2 ميلليارد دوللارىنان ايىرىلدى
قازاقپارات بۇل تۋرالى NDTV.com-عا سىلتەمە جاساپ حابارلايدى.
Louis Vuitton, Moet جانە Chandon جانە Christian Dior سىندى ساۋدا ماركالارى ەنەتىن LVMH فرانسۋزدىق ترانسۇلتتىق كومپانياسىنىڭ نەگىزىن قالاۋشى ب. ارنونىڭ بايلىعى 2023 -جىلى قارقىندى ءوسىمدى كورسەتتى. سەبەبى ءسان-سالتانات زاتتارىن شىعاراتىن ەۋروپالىق كومپانيالار اكسيالارىنىڭ قۇنى دا بىردەن ارتقان بولاتىن.
الايدا، سەيسەنبى كۇنى جاعداي ازداپ وزگەرگەن. پاريجدە LVMH اكسيالارى %5 ارزانداعان (ءبىر جىلداعى ەڭ جوعارى كورسەتكىش). سولايشا، ءسان-سالتانات زاتتارىن شىعاراتىن ەۋروپالىق سەگمەنت ءبىر كۇندە جالپى 30 ميلليارد دوللار جوعالتقان.
دەگەنمەن، Bloomberg ميللياردەرلەرىنىڭ يندەكسىنە سۇيەنسەك، اكسيالاردىڭ اتالعان قۇلدىراۋىنان ب. ارنونىڭ داۋلەتى بۇرىنعىشا 191,6 ميلليارد دوللاردى قۇرايدى. بيىل ونىڭ قازىناسى 29,5 ميلليارد دوللارمەن تولىعا تۇسكەن.
ايتا كەتەيىك، بەرنار ارنو مەن عالامشارداعى ەكىنشى داۋلەتتى ادام يلون ماسكتىڭ بايلىعى اراسىنداعى الشاقتىق 11,4 ميلليارد دوللارعا قىسقاردى.