قىتايداعى جويقىن جارىلىس: 11 ادام مەرت بولىپ، 133 ادام زارداپ شەكتى

بەيجىڭ. قازاقپارات - جەكسەنبى كۇنى تاڭەرتەڭ قىتايدىڭ شيان قالاسىنداعى (حۋبەي پروۆينتسياسى، ورتالىق قىتاي) ازىق- تۇلىك بازارىندا جويقىن جارىلىس بولدى.

سالدارىنان كەمىندە 11 ادام وپات بولدى، 133 ادام زارداپ شەكتى، دەپ حابارلايدى قازاقپارات قىتايدىڭ ورتالىق تەلەارناسىنا سىلتەمە جاساپ.

تەلەارنانىڭ حابارلاۋىنشا، زارداپ شەككەن 133 ادامنىڭ 37- ءسىنىڭ جاعدايى اۋىر. الدىن الا نۇسقالارعا سايكەس، توتەنشە جاعدايعا گازدىڭ كەمۋى سەبەپ بولۋى مۇمكىن. جارىلىس جانۆان اۋدانىندا جەرگىلىكتى ۋاقىت بويىنشا ساعات 06:30 شاماسىندا بولعان. جارىلىس سالدارىنان بازاردىڭ عيماراتى قيراپ، سول ماڭداعى ۇيلەردىڭ اينەكتەرى سىنعان.

كۋاگەرلەردىڭ ايتۋىنشا، ۋاقىتتىڭ ەرتە بولعانىنا قاراماستان بازاردا ساتىپ الۋشىلار كوپ بولعان، ادامدار جاقىن ماڭداعى اسحانالاردان تاڭعى اس ءىشىپ وتىرعان. قالادا بىرنەشە قان قۇيۋ ستانسياسى جۇمىس ىستەپ جاتىر. دارىگەرلەر مەن بيلىك قالا تۇرعىندارىن قان قۇيۋ ستانسيالارىنا كەلىپ، قان تاپسىرۋعا شاقىردى. توتەنشە جاعداي ورنىندا ىزدەستىرۋ- قۇتقارۋ جۇمىستارى جالعاسۋدا.

اۆتور: اياۋلىم التىنبەك