شىمكەنتتە اپتاپ ىستىقتان ءبىر اپتادا اۋرۋحاناعا 10 ادام ءتۇستى
قالالىق №1 كلينيكالىق اۋرۋحاناسىنا ءبىر اپتا ىشىندە قان قىسىمى كوتەرىلگەن 10 ناۋقاس جاتقىزىلعان. بۇل وتكەن ايمەن سالىستىرعاندا ەداۋىر كوپ. دارىگەرلەر ىستىق اۋا رايىندا اسقىناتىن اۋرۋى بار ادامدار مەيلىنشە سىرتقا شىقپاعانى ابزال دەپ وتىر. كۇنىنە 2-2,5 ليتر سۋ ءىشىپ، ۇنەمى باس كيىممەن نەمەسە قولشاتىرمەن ءجۇرۋ كەرەك ەكەنىن ەسكەرتەدى.
«كۇن ىسىعان كەزدە اسقىناتىن اۋرۋلار بار. مىسالى، ارتەريالىق قان قىسىمى، جۇرەكتىڭ شاماسىزدىعى، جۇيكە جۇيەسىمەن اۋىراتىن ادامدار، تەرىسىندە پروبلەماسى بارلار. كۇننىڭ تىكەلەي ادامعا تيۋىنە بايلانىستى اۋرۋلار اسقىنادى. مۇمكىندىگىنشە سىرتقا شىقپاعان دۇرىس. شىققان كۇننىڭ وزىندە كولەڭكەمەن، جەلدەتكىشى بار كولىكپەن ءجۇرۋ كەرەك»، - دەدى شىمكەنت قالالىق №1 كلينيكالىق اۋرۋحاناسىنىڭ ۇيىمداستىرۋ ادىستەمەلىك ءبولىمىنىڭ باسشىسى قۋانىش لەكەروۆ.
قالا تۇرعىندارىنىڭ ءبىر بولىگى ىستىقتان قورعانۋ ءۇشىن سۋعا ءتۇسۋدى ءجون سانايدى. ءبىراق، توتەنشە جاعدايلار دەپرتامەنتىندەگىلەر تەك شومىلۋعا رۇقسات ەتىلگەن سۋ ايدىندارىنا بارۋعا كەڭەس بەرەدى جانە ساقتىق شارالارىن قاتاڭ ەسكەرۋ قاجەتتىگىن ەسكە سالادى.
«سۋ ايدىنىندا قاۋىپسىزدىك ەرەجەلەرىن ساقتاڭىزدار. بەيتانىس جەردە شومىلماڭىز، سۋعا ماس كۇيدە تۇسپەڭىز. بالالاردى سۋ ماڭايىندا قاراۋسىز قالدىرماڭىز. ءجۇزۋ ءۇشىن تاقتايشا، ۇرمەلى ماتراس، پەنوپلاستى پايدالانۋعا بولمايدى. ەگەر ءجۇزۋ بىلمەسەڭىز، بەلىڭىزدەن اساتىن سۋعا تۇسپەۋگە كەڭەس بەرەمىز. تۇندە سۋعا شومىلماڭىز. جاعالاۋدان الىس كەتپەڭىزدەر»، - دەپ ەسكەرتەدى شىمكەنت قالالىق ت ج د ازاماتتىق قورعانىس باسقارماسىنىڭ وفيتسەرى سەرىك اۋەزحان.
تۇركىستان وبلىسى مەن شىمكەنتت قالاسىندا اپتاپ ىستىق ءالى ءۇش كۇنگە جالعاسادى. سينوپتيكتەردىڭ مالىمەتىنشە، 8- ماۋسىم كۇنى قالادا 36-38 گرادۋس ىستىق كۇتىلەدى. ال 9 -ماۋسىم اۋا تەمپەراتۋراسى 38-40 گرادۋسقا دەيىن كوتەرىلەدى دەپ بولجانىپ وتىر. تەك 10- ماۋسىم عانا ىستىقتىڭ بەتى قايتادى دەيدى ماماندار. شامامەن 33 + جانە 35 + گرادۋس بولادى.