حالىققا 10 سوتىق جەر تەلىمىن بەرۋدىڭ وڭتايلى جولدارىن قاراستىرۋ كەرەك - دەپۋتات

استانا. قازاقپارات - بۇگىن ءماجىلىس وتىرىسىندا دەپۋتات ۇلاسبەك سادىبەكوۆ حالىققا 10 سوتىق جەر تەلىمىن بەرۋ ماسەلەسىن كوتەرىپ، ۇسىنىس ايتتى، دەپ حابارلايدى قازاقپارات ءتىلشىسى.

«بۇگىن ءماجىلىس وتىرىسىندا ازاماتتارعا 10 سوتىق جەر تەلىمىن بەرۋ ماسەلەسى بويىنشا دەپۋتاتتىق ساۋال جولدادىم. تۇركىستان وبلىسىندا 10 سوتىق جەر الۋ ءۇشىن كەزەكتە تۇرعان حالىق سانى 408 مىڭعا جەتكەن. جەر تەلىمىن جىلدار بويى الا الماي كەلە جاتقان ازاماتتار بار. حالىقتىڭ دەنى وڭتۇستىك وڭىردە، تۇركىستان وبلىسىندا ورنالاسقان، دەمەك مۇندا جەر الۋ، باسپانا سالۋ ماسەلەسى وتە وزەكتى. جەر تۋرالى كودەكستە بىلاي جازىلعان: «ازاماتتارعا ءۇي سالۋعا 10 سوتىق جەر تەلىمىن بەرۋ ءۇشىن الدىمەن ول جەردە قاجەتتى ينفراقۇرىلىم بولۋى ءتيىس». ال كەي اۋدانداردا 2012-2013-جىلدارى بەرىلگەن جەرلەردىڭ ءوزى ءالى كۇنگە دەيىن ءتيىستى ينفراقۇرىلىممەن قامتىلماعان»، - دەدى ۇلاسبەك سادىبەكوۆ Jibek Joly تەلەارناسىنىڭ ماجىلىستەگى موبيلدى ستۋدياسىندا بەرگەن سۇحباتىندا.

حالىق قالاۋلىسىنىڭ ايتۋىنشا، جەر تەلىمىن بەرۋ ماسەلەسى بۇگىن شەشىلمەسە، حالىق كەزەگى ودان ءارى سوزىلا بەرەدى.

«ءبىزدىڭ ۇسىنىسىمىز - جەر تەلىمىن بەرەتىن كەزدە تۇرعىندار ءۇشىن وڭتايلى جولدارىن قاراستىرۋ جانە جەر كودەكسىنە وزگەرىستەر ەنگىزۋ قاجەت. ازاماتتارعا جەر بەرسە، ءۇيدى وزدەرى-اق سالىپ الادى. بۇل - كوپ ازاماتتى تولعاندىراتىن ماسەلە»، - دەيدى دەپۋتات.