ازەربايجان قازاقستاندىقتارعا 10 ءبىلىم گرانتىن ءبولدى
«قازاقستاندىقتارعا ازەربايجاننىڭ 25 جەتەكشى جوعارى وقۋ ورنى ۇسىنىلادى. وقۋ ازەربايجان، ورىس جانە اعىلشىن تىلدەرىندە جۇرگىزىلەدى. ءتىلدى ءتيىستى دەڭگەيدە مەڭگەرمەگەن ۇمىتكەرلەر تەگىن تىلدىك دايىندىقتان وتە الادى. قازاقستاندىقتارعا ۇكىمەتارالىق گرانتتار اياسىندا باكالاۆريات، ماگيستراتۋرا جانە دوكتورانتۋرا باعدارلامالارى بويىنشا ەۋروپا مەن ازيانىڭ 10 ەلىندە تەگىن وقۋعا 500 گە جۋىق گرانت جىل سايىن ءبولىنىپ وتىرادى. ءبىرقاتار ەل ءتىلدى مەڭگەرمەگەن ۇمىتكەرلەرگە تەگىن تىلدىك دايىندىقتان ءوتۋ مۇمكىندىگىن بەرەدى»، - دەپ اتاپ ءوتتى «حالىقارالىق باعدارلامالار ورتالىعى» ا ق باسقارما ءتوراعاسى ولجاس ساكەنوۆ.
اتالعان ورتالىق دەرەگىنشە، ازەربايجاننىڭ جوعارى وقۋ ورىندارىندا تەگىن وقۋعا ارنالعان كونكۋرسقا قاتىسۋعا قۇجات قابىلداۋ 2023-جىلعى 9- ماۋسىمعا دەيىن جالعاسادى. وتىنىمدەر eGov پورتالى ارقىلى، سونداي-اق حالىقارالىق باعدارلامالار ورتالىعىنىڭ كەڭسەسىندە قاعاز تۇرىندە قابىلدانادى.
گرانت تىلدىك كۋرستاردان ءوتۋ، اكادەميالىق وقۋ، جاتاقحانادا تۇرۋ، مەديتسينالىق ساقتاندىرۋ شىعىندارىن وتەيدى. سونىمەن قاتار ستۋدەنتتەرگە اي سايىن ستيپەنديا تولەنەدى.
گرانت تاعايىنداۋ كونكۋرسىنا قاتىسۋعا نەگىزگى كريتەريلەر:
• باكالاۆر دارەجەسىن الۋعا ۇمىتكەرلەر ءۇشىن - نەگىزگى ورتا ءبىلىم تۋرالى اتتەستات نەمەسە كۋالىك جانە اعىمداعى وقۋ جىلىنداعى اعىمداعى ۇلگەرىمى تۋرالى تابەل/ترانسكريپت نەمەسە ارناۋلى ورتا ءبىلىم تۋرالى ديپلوم ورتاشا بالىنىڭ كەمىندە 4,0 (5,0 تەن) بالىنا سايكەستىگى؛
• ماگيستر دارەجەسىن الۋعا ۇمىتكەرلەر ءۇشىن - باكالاۆر/مامان ديپلوم نەمەسە اعىمداعى ۇلگەرىمى تۋرالى ترانسكريپت ورتاشا بالىنىڭ كەمىندە 3,0 (4,0/4,33 تەن) بالعا سايكەستىگى؛
• اعىلشىن تىلىندە وقۋ ءۇشىن كەمىندە مىناداي دەڭگەيدەگى قولدانىستاعى سەرتيفيكات كەرەك:
• «باكالاۆريات» باعدارلاماسى ءۇشىن - IELTS 9.0 دان 5.0؛ TOEFL 120 دان 40؛ «ماگيستراتۋرا» باعدارلاماسى ءۇشىن - IELTS 9.0 9.0 دان 5.5؛ TOEFL 120 دان 50.