وسكەمەندە قاسقىر 10 جاستاعى بالاعا شاپقان
وقيعا جەرگىلىكتى حايۋاناتتار باعىندا بولعان. 10 جاستاعى قىزدىڭ اتا-اناسىنىڭ ايتۋىنشا، قىزى جانۋاردى سيپاماق بولعان. سول كەزدە جىرتقىش قىزدىڭ ساۋساعىن تىستەپ العان.
«بۇل جەردەگى قورشاۋ بار بولعانى 20-30 سانتيمەتر. مەنىڭ مۇلدە كىنام جوق دەپ ايتا المايمىن. مەن قىزىما دۇرىس باس- كوز بولمادىم. مويىندايمىن. ءبىراق بۇل جاقتا، كەيبىر توردا قاۋىپسىز ەمەس. تورلار جىرتىلعان. باسقا بالالار جاپا شەكپەسە ەكەن دەيمىن، سەبەبى بۇعان دەيىن دە ۇقساس جاعدايلار بولعان»، - دەيدى قىزدىڭ اناسى اينۇر وسپانوۆا.
بالانىڭ اتا-اناسى حايۋاناتتار باعىندا قاجەت قاۋىپسىزدىكتى قامتاماسىز ەتۋدى كوزدەپ وتىر.
«بالام قازىر اۋرۋحانا جاعالاپ كەتتى. ايەلىم ەسەڭگىرەپ قالدى. ءبىز اقشا سۇرامايمىز، بار بولعانى قاۋىپسىزدىك شارالارىن كۇشەيتۋدى تالاپ ەتەمىز. جانۋارلارعا جاقىنداۋعا بولمايدى. پوليتسياعا ارىز جازدىق»، - دەيدى قىزدىڭ اكەسى ازامات نۇرعوجين.
ساياباق اكىمشىلىگى ماسەلەنىڭ باسىن اشۋعا ۋادە بەردى. ولاردىڭ ايتۋىنشا، ساياباقتىڭ حايۋاناتتار باعى دەگەن مارتەبەسى جوق. بۇل - شىعىس قازاقستان وبلىسىنىڭ جانۋارلار دۇنيەسى ءبولىمى. مۇندا 320 جانۋار بار. بارلىق جىرتقىش قورشاۋدا. بارلىق جەردە ەسكەرتۋ بەلگىلەرى بار. ءبىراق كەلۋشىلەر ولاردى ەلەمەيدى. قازىر قايتا قۇرۋ جۇمىستارى ءجۇرىپ جاتىر. كەلۋشىلەردىڭ قاۋىپسىزدىگى ءۇشىن باقىلاۋ الاڭدارى سالىنا باستاعان.
«ءبىز بۇل قورشاۋلاردى جانۋارلار وزدەرىن جايلى سەزىنۋى ءۇشىن، ەڭ الدىمەن، كەلۋشىلەر ءۇشىن قاۋىپسىز بولۋى ءۇشىن كەڭەيتىپ جاتىرمىز. بىزدە تۇياقتىلار، تۇيەلەر مەن پونيلار ءۇشىن دە باقىلاۋ الاڭى بار. وسى مۇمكىندىكتى پايدالانىپ، جانۋارلاردى تاماقتاندىرۋعا، ولاردى سيپاۋعا بولمايتىنىن ايتقىم كەلەدى»، - دەيدى شىعىس قازاقستان وبلىسى فاۋنا ءبولىمىنىڭ بيولوگى يۋليا پاۆلەنكو.