ەلەنا رىباكينا قازاقستاندىق تەننيسشىلەردەن العاش بولىپ الەمدە 10-ورىنعا كوتەرىلەدى

None
استانا. قازاقپارات - اۋستراليا اشىق چەمپيوناتىنىڭ فيناليسى ەلەنا رىباكينا وسى جارىس قورىتىندىسى بويىنشا 1300 رەيتينگىلىك ۇپايعا يە بولدى، دەپ حابارلايدى قازاقپارات ءتىلشىسى.

قازاقستان تەننيس فەدەراتسياسىنان ءمالىم ەتكەنىندەي، سونىڭ ناتيجەسىندە ە. رىباكينا دۇيسەنبىدە جاڭارتىلاتىن الەمدىك رەيتينگىدە ەل تاريحىندا العاش رەت 10-ورىنعا كوتەرىلەدى.

قازاقستاندىق تەننيسشى سونداي-اق، جەكەلەي جانە جۇپتىق سىندى قوسا ەسەپتەگەندە، وسى «ۇلكەن دۋلىعا» تۋرنيرىندە 1 ميلليون 143,5 مىڭ ا ق ش دوللارى كولەمىندە تابىس تاپتى.

اۋستراليا چەمپيونى ارينا سوبولەنكوعا 2,05 ميلليون دوللار تيەدى. ول الەمدىك رەيتينگىدە ەكىنشى ورىنعا شىعادى. قازاقستان تەننيس فەدەراتسياسىنىڭ پرەزيدەنتى بولات وتەمۇراتوۆ ە. رىباكينانىڭ وسىناۋ تابىسىنا وراي ءوز پىكىرىن ءبىلدىردى.

«مەن ەلەناعا جوعارى دەڭگەيدە ونەر كورسەتكەنى ءۇشىن ريزاشىلىعىمدى بىلدىرگىم كەلەدى. بۇل - ەلىمىزدە تەننيستىڭ تابىستى دامىپ كەلە جاتقانىنىڭ كورىنىسى. Australian Open فينالىنا دەيىن جەتۋ - شەبەرلىك پەن تۇراقتىلىقتىڭ بەلگىسى. دودا بارىسىندا ەلەنا الەمدىك رەيتينگىنىڭ كوشباسشىسى يگا شۆەنتەكتى، باسقا دا مىقتىلاردى تىزە بۇكتىردى. ولاردىڭ ۇشەۋى - «ۇلكەن دۋلىعا» تۋرنيرىنىڭ جەڭىمپازى. ەلەنانىڭ ءتۇرلى توسەنىشتەگى كورتتاردا ءوزىن ەركىن سەزىنىپ، قارسىلاسىنا بايلانىستى تاكتيكاسىن ساۋاتتى قۇراتىنى، ءوز ويىنىن ۇنەمى جەتىلدىرىپ كەلە جاتقانى ايقىن كورىنىپ تۇر. جىلدىڭ ءساتتى باستالۋى الداعى جەڭىستەرگە جول اشادى دەپ ۇمىتتەنەمىن»، - دەدى ب. وتەمۇراتوۆ.

ەلەنا رىباكينا ەندى دۋبايدا وتەتىن جارىسقا قاتىسادى.

سوڭعى جاڭالىقتار