جىل سايىن ەلوردادا 10 نان استام مەكتەپ سالۋ كەرەك - التاي كولگىنوۆ
17 تامىز 16:12

جىل سايىن ەلوردادا 10 نان استام مەكتەپ سالۋ كەرەك - التاي كولگىنوۆ

نۇر- سۇلتان. قازاقپارات - ەلوردا اكىمى التاي كولگىنوۆ قالادا ۇلكەن مەكتەپتەردى سالۋعا باسىمدىق بەرىلەتىنىن ايتتى، دەپ حابارلايدى قازاقپارات.

«بىلتىردان بەرى وقۋشىلاردىڭ ءبىراز بولىگىن قامتي الاتىن ءىرى مەكتەپتەردىڭ قۇرلىسىنا قاتىستى قاناتقاقتى جوبالارعا كىرىسكەن ەدىك. بۇعان دەيىن ءبىر اۋىسىمدا ەڭ ۇلكەن مەكتەپ 1,2 مىڭ ورىندى، ال ەكى اۋىسىمدا 2,4 مىڭدى قامتيتىن. ەندى 2 مىڭ ورىنعا ەسەپتەلگەن التى مەكتەپ سالدىق. ەكى اۋىسىمدا وقىتسا، بۇلاردىڭ ءارقايسىسى 4 مىڭ ورىندى قامتاماسىز ەتەدى. وسى ورايدا بۇل ۇلكەن مەكتەپتەردى سالۋ دۇرىس ەكەنىن كورىپ وتىرمىز»، - دەدى ا. كولگىنوۆ ەلوردا ءماسليحاتىنىڭ كەزەكتەن تىس سەسسياسىندا.

ونىڭ ايتۋىنشا، ەلوردادا جىل سايىن شامامەن 15 مەكتەپ سالىنۋى كەرەك.

«جاقىندا پرەمەر- مينيستر بۇل باعىتتاعى باستامالاردى قولدادى. وسى ورايدا مۇمكىندىگىنشە 2 مىڭ ورىنعا ارنالعان مەكتەپتەردى سالامىز. سەبەبى الداعى ۋاقىتتا مەكتەپتەرگە قاتىستى ماسەلە وزەكتى بولاتىنى تۇسىنىكتى. جىل سايىن 10-15 مەكتەپ سالۋىمىز كەرەك»، - دەدى اكىم.

«قالا اۋماعىندا مەكتەپتەردىڭ قۇرىلىسىن قارقىندى جۇرگىزۋ ماسەلەسى پرەزيدەنتتىڭ باقىلاۋىندا تۇر. ءۇش باعىت بويىنشا، ياعني مەملەكەتتىك بيۋدجەت ەسەبىنەن مەكتەپ سالۋدى، مەملەكەتتىك- جەكەشەلىك ارىپتەستىك جانە جەكە ينۆەسيتيتسيالار ەسەبىنەن ىسكە اسىرامىز. الداعى ۋاقىتتا مەكتەپ قۇرىلىسىنىڭ قارقىنىن كۇشەيتۋىمىز كەرەك. باس جوسپاردا ءار شاعىن اۋداندا، جاڭا قۇرىلىس نىساندارى سالىنىپ جاتقان جەرلەردە سالىناتىن مەكتەپتەردى بەكىتتىك»، - دەدى ا. كولگىنوۆ.

بۇدان بۇرىن حابارلانعانداي، بيىل ەلوردادا 11 مەكتەپتىڭ قۇرىلىسى اياقتالادى.

قالادا ءۇش اۋىسىممەن ىستەيتىن 4، ال بالا سانى شامادان تىس كوپ 15 مەكتەپ بار.

جاڭالىقتار