تۇرعىن ءۇي جالداۋ سۋبسيدياسى: ەڭ ءجيى قويىلاتىن 10 سۇراق
1 . ءوتىنىم بەرۋشى وتباسىنىڭ تابىسى نەشە تەڭگەدەن اسپاۋى كەرەك؟
زاڭ بويىنشا، تۇرعىن ءۇي جالداۋ تولەمدەرىن الۋعا مىنا ءتورت سانات بويىنشا كەزەكتە تۇرعان قازاقستاندىقتار ءوتىنىش بەرە الادى:
- 1 جانە 2 توپتاعى مۇگەدەكتەر؛
- مۇمكىندىگى شەكتەۋلى بالالارى بار نەمەسە ولاردى تاربيەلەپ وتىرعان وتباسىلار؛
- جەتىم جانە اتا-اناسىنىڭ قامقورلىعىنان ايىرىلعان بالالار؛
- كوپ بالالى وتباسىلار.
جالداۋ اقىسىن سۋبسيديالاۋعا ۇمىتكەرلەر قاتارىنداعى وتباسىلاردىڭ سوڭعى 6 ايداعى ورتاشا جيىنتىق تابىسى وتباسىنىڭ ءاربىر مۇشەسىنە شاققاندا 1 ەڭ تومەنگى كۇنكورىس دەڭگەيىنەن (37389 تەڭگە) اسپاۋعا ءتيىس.
2. اتالعان 4 ساناتتىڭ بىرىنە جاتاتىن، ءبىراق كەزەككە قۇجات جۇزىندە تىركەلمەگەن ادامدار نە ىستەۋى كەرەك؟
«وتباسى بانك» مالىمەتىنە سۇيەنسەك، كەزەككە ءىلىنۋ ءۇشىن كەڭسەلەردى توزدىرىپ، قۇجات جيناۋدىڭ قاجەتى جوق. قۇجات جۇمىستارى كەزەككە تۇرىپ بولعان سوڭ، ياعني، تۇرعىن ءۇيدى جالعا بەرۋشىمەن بىرگە ءوتىنىش تاپسىرعان كەزدە قىزادى.
«مەملەكەتتىك سۋبسيديا الۋعا ۇمىتكەر پاتەر كەزەگىنە تۇرىپ ۇلگەرمەگەن جاعدايدا، باسپاناعا مۇقتاج جان رەتىندە جەرگىلىكتى اتقارۋشى ورگاندارعا ەسەپكە تۇرۋى ءتيىس. ول ءۇشىن www.egov.kz ەلەكتروندىق ۇكىمەت پورتالى ارقىلى، كوممۋنالدىق تۇرعىن ءۇي قورىنان باسپاناعا مۇقتاجداردى ەسەپكە قويۋ تۋرالى ءوتىنىش جولداۋى قاجەت. ءوتىنىش بەرۋشىگە تەك ەلەكتروندىق سيفرلىق قولتاڭبا (ە ت س ق) قاجەت. قالعان دەرەكتەردىڭ ءبارىن، ونىڭ ىشىندە ءوتىنىش بەرۋشىنىڭ اتىندا تۇرعىن ءۇيدىڭ جوق نەمەسە بار ەكەندىگى، كىرىستەرى، مەكەنجاي تىركەۋى سياقتى مالىمەتتەردى تۇرعىن ءۇي كوميسسياسى اقپاراتتىق جۇيەلەر ارقىلى الىپ، قاراي الادى. سوندىقتان اتالعان قۇجاتتاردى تاپسىرۋدىڭ قاجەتى جوق»، - دەپ جازىلعان اكسيونەرلىك قوعامنىڭ جاۋابىندا.
3. شارتتى تىركەۋ ءۇشىن نەشە تەڭگە تولەۋ كەرەك؟
تۇرعىن ءۇي جالداۋ سۋبسيدياسىن الۋدىڭ تاعى ءبىر شارتى - مەملەكەتتىك باج تولەۋ قاجەت. «وتباسى بانك» ۇسىنعان مالىمەت بويىنشا ونىڭ كولەمى جالعا الاتىن ءۇيدىڭ تيپىنە بايلانىستى. پاتەر بولسا، جالداۋ شارتىن تىركەۋ ءۇشىن- 4810 تەڭگە، ال جەكە تۇرعىن ءۇي ءۇشىن- 9620 تەڭگە تولەۋ كەرەك.
4. سۋبيسيديا قانداي ادامداردان جالعا العان تۇرعىن ۇيگە تولەنبەيدى؟
زاڭ بويىنشا، باسپانانى جاقىن تۋىستاردان جانە جۇبايلاردان، ونىڭ ىشىندە بۇرىنعى جۇبايلارىنان جانە ەرلى-زايىپتىلاردىڭ تۋىستارىنان جالعا الۋعا بولسا، سۋبسيديا تولەنبەيدى. اكسيونەرلىك قوعامنىڭ باسپا ءسوز قىزمەتى زاڭنىڭ بۇل تالابى بويىنشا دا تۇسىنىكتەمە بەردى.
«نەكە جانە وتباسى تۋرالى» ق ر كودەكسىندە ايقىندالعانداي، اتا-انالار (اتا-انا) ، بالالار، بالا اسىراپ الۋشىلار، اسىراپ الىنعاندار، اتا-اناسى ءبىر نەمەسە بولەك اعا- ىنىلەر مەن اپا-سىڭلىلەر، اتا، اجە، نەمەرەلەر - جاقىن تۋىستارعا جاتادى»، - دەپ جازىلعان جاۋاپتا.
5. تۇرعىن ءۇي سۋبسيدياسىن الۋشى نەگە مىندەتتى تۇردە «وتباسى بانك» كليەنتى بولۋى كەرەك؟
سونىمەن، سۋبسيديا تاعايىنداۋ تۋرالى وتىنىمدەر ەلەكتروندىق سيفرلىق قولتاڭبا ارقىلى قابىلداناتىنىن ايتتىق. سوندىقتان ازاماتتار ءوتىنىش بەرمەي تۇرىپ، اۋەلى ەتسق الۋى كەرەك نەمەسە قولدانىستاعىسىنىڭ جۇمىس ىستەپ تۇرعانىنا كوز جەتكىزىپ العانى ءجون.
سۋبسيديا الۋعا ۇمىتكەردىڭ اتىندا دەپوزيتى بولۋى شارت جانە «وتباسى بانك» كليەنتى بولۋى مىندەتتى. ال جيناق شوتى جوق ازاماتتار ونى بەينەبانكينگ قىزمەتى نەمەسە «Otbasy bank» موبيلدى قوسىمشاسى ارقىلى اشا الادى.
دەپوزيت بولاشاقتا باسپانا الۋ ءۇشىن اشىلادى، ونى كەزەكتە تۇرعان ادام جالداۋ تولەمدەرى توقتاتىلعاننان كەيىن ساتىپ الا الادى. ەندى ول مۇمكىندىگىنشە قاراجاتىن ۇنەمدەي الادى. سونىمەن قاتار ەرتەرەكتە اشىلعان دەپوزيت ونىڭ تۇرعىن ۇيگە قولجەتىمدىلىك ساتىسىنىڭ كەلەسى باسپالداعىنا ءوتۋ كەزىندە قۇندى ارتىقشىلىق بولادى.
6. سۋبسيديا ۇمىتكەر وتباسىنىڭ بۇكىل مۇشەسى قۇجات تاپسىرۋى كەرەك پە؟
سۋبسيديا الۋعا ۇمىتكەر otbasybank.kz پورتالىندا تىركەلىپ، جەكە كابينەتىندە ءوتىنىش جازا الادى.
ول ءۇشىن، ەڭ الدىمەن، تولەمدەردى الۋ تۋرالى وتىنىشكە قول قويادى جانە جەكە دەرەكتەردى جيناۋعا، وڭدەۋگە كەلىسىم بەرەدى. قۇجاتتارعا قول قويىلعاننان كەيىن جۇيە دەرەكتەردى وڭدەپ، وتباسىنىڭ قۇرامىن انىقتايدى. سودان كەيىن كامەلەتتىك جاسقا تولعان ءاربىر وتباسى مۇشەسى otbasybank.kz سايتىندا «قوناق» رەتىندە تىركەلىپ، ەتسق ارقىلى جەكە دەرەكتەردى جيناۋ جانە وڭدەۋ كەلىسىمىنە قول قويۋى كەرەك. وسىدان كەيىن جۇيە دەرەكتەردى قايتادان تەكسەرىپ، ءوتىنىش بەرۋشىگە سۋبسيديا الۋعا كەلىسىم بەرەدى نەمەسە سەبەبىن ءتۇسىندىرىپ، ءوتىنىشىن كەرى قايتارادى.
ەگەر ءوتىنىش ماقۇلدانسا، حابارلامادا جالعا الۋ ايماعى، پاتەر اۋدانى، جالداۋ اقىسىنىڭ ماكسيمالدى مولشەرى مەن قاتىسۋشىعا تيەسىلى ەڭ جوعارى سۋبسيديا كولەمى كورسەتىلەدى.
7. پاتەر يەسىنەن قانداي قۇجات كەرەك؟
وسىدان كەيىن «پاتەر يەسى تۋرالى دەرەكتەر» بولىمىندە ءوتىنىش بەرۋشى جالعا بەرۋشىنىڭ جەكە سايكەستەندىرۋ نەمەسە بيزنەس سايكەستەندىرۋنومىرىن كورسەتۋى كەرەك. وسى ساتتەن باستاپ پروتسەسس جالعا الىناتىن تۇرعىن ءۇيدىڭ يەسى قوسىلاتىن ەكىنشى كەزەڭگە وتەدى.
باسپانانى جالعا بەرۋشى دە otbasybank.kz سايتىندا ەتسق ارقىلى تىركەلىپ، «جالعا الۋ اقىسىن سۋبسيديالاۋ» بولىمىندە دەرەكتەرىن راستايدى. سونداي- اق جەكە دەرەكتەردى جيناۋ جانە وڭدەۋ تۋرالى وتىنىشكە قول قويىپ، جالعا بەرىلەتىن پاتەردىڭ كاداسترلىق ءنومىرىن جانە قاراجات اۋدارىلاتىن 20 ساندىق شوتتى كورسەتۋى كەرەك. وسىدان كەيىن جۇيە جالداۋ شارتىن جانە تولەم كەستەسىن جاساپ شىعادى، وعان تاراپتار ە ت س ق ارقىلى قول قويادى.
8. جالعا الاتىن پاتەردى كىم تاڭدايدى؟
سۋبسيديا الۋعا ءوتىنىش بەرۋشى جالداۋ شارتىن تىركەگەنى ءۇشىن مەملەكەتتىك باج تولەيدى. سودان كەيىن ونىڭ جەكە كابينەتىندە تولەم كەستەسى بار جالداۋ شارتى پايدا بولادى.
جالدامالى باسپانانى قازاقستاندىقتار وزدەرى ىزدەيدى.
9. جالدايتىن تۇرعىن ءۇيدى ءجيى اۋىستىرۋعا بولا ما؟
«وتباسى بانك» جالدامالى تۇرعىن ءۇي سۋبسيدياسىن جالعا الۋ كەلىسىمشارتىنىڭ مەرزىمى اياقتالعانشا، اي سايىن اۋدارىپ وتىرادى. قۇجاتتىڭ كۇشىن مەرزىمىنەن بۇرىن جويۋعا، سونداي-اق جاڭا ءۇي يەسىمەن كەلىسىمشارت قۇرۋعا رۇقسات ەتىلگەن. بۇل جاعدايدا otbasybank.kz پورتالىندا ءوتىنىش بەرۋ پروتسەسى قايتادان جاسالادى.
10. تۇرعىن ءۇي جالداۋ سۋبسيدياسىن الۋشىنى كىمدەر تەكسەرە الادى؟
«وتباسى بانك» جىل سايىن سۋبسيديا الۋشىلاردىڭ شارتتارعا ساي كەلۋىنە مونيتورينگ جۇرگىزىپ، تولەم ءتارتىبىن اي سايىن قاداعالاپ وتىرادى. ال جەرگىلىكتى اكىمدىكتەر جالدامالى ۇيلەر مەن وندا تۇرىپ جاتقان ازاماتتاردى كەمىندە توقسانىنا بىر رەت تەكسەرەدى.