دۋبايدا شاڭدى داۋىل سوعىپ، 10 ۇشاق جەرگىلىكتى اۋەجايعا قونا المادى

دۋباي. قازاقپارات - دۋباي حالىقارالىق اۋەجايىندا كەشە اۋا رايىنىڭ قولايسىزدىعىنا بايلانىستى رەيستەر توقتاتىلدى.

اۋەجاي باسشىلىعى قونۋى ءتيىس 10 ۇشاق وزگە اۋەجايلارعا باعىتتالعانىن ءمالىم ەتتى، دەپ حابارلايدى قازاقپارات ءتىلشىسى Khaleej Times باسىلىمىنا سىلتەمە جاساپ.

بىرىككەن اراب امىرلىكتەرىنىڭ اۋماعىن شاڭدى داۋىل باستى. ۇلتتىق مەتەورولوگيا ورتالىعىنىڭ مالىمەتىنشە، ابۋ- دابي جانە دۋباي حالىقارالىق اۋەجايلارىنىڭ اۋداندارىندا جولدىڭ كورىنۋ دەڭگەيى 500 مەتردەن از بولدى. اۋە ايلاعىنىڭ باسشىلىعى 10 رەيستى Dubai World Central جانە باسقا دا كورشىلەس اۋەجايلارعا جىبەرۋگە شەشىم قابىلداعان.

جەرگىلىكتى Flydubai اۋە تاسىمالداۋشىسى قوناتىن جانە ۇشاتىن رەيستەردىڭ كەشىگۋىنە اۋا رايى جاعدايلارى سەبەپ بولعانىن مالىمدەدى.

مەتەورولوگيا ورتالىعىنىڭ رەسمي اۋا رايى بيۋللەتەنىنە سايكەس، شاڭدى داۋىل مەن جاڭبىر الداعى ءتورت كۇن بويى جالعاسادى.

ابۋ- دابي پوليتسياسى جۇرگىزۋشىلەردى قاتتى جەل مەن شاڭدا جولدىڭ ناشار كورىنۋىنە بايلانىستى اباي بولۋعا جانە شاڭدى داۋىلدى فوتو- ۆيدەوعا تۇسىرمەۋگە شاقىردى.

«ءوزىڭىزدىڭ جانە وزگەلەردىڭ قاۋىپسىزدىگى ءۇشىن بەينەكامەراعا تۇسىرۋگە نەمەسە تەلەفونعا الاڭداماڭىز»، - دەپ حابارلادى پوليتسيا.

كەشكىسى ءال- اين، راس- ءال- حايما جانە فۋدجەيرا امىرلىكتەرىندە قاتتى جاڭبىر جاۋدى. بيلىك تۇرعىندارعا سۋ تاسقىنى مەن كوشكىنگە بەيىم اۋدانداردان اۋلاق بولۋ قاجەتتىگىن ەسكەرتتى.

بيىل يراك، كۋۆەيت، ب ءا ا، ساۋد ارابياسى، يران جانە باسقا دا ەلدەردەگى قۇمدى داۋىلدار كليماتتىڭ وزگەرۋىنە بايلانىستى كۇشەيە ءتۇستى، دەپ حابارلايدى AlArabiya اگەنتتىگى.