ون مينۋتىڭىزدى قيىپ وقۋعا تۇرارلىق 10 اڭگىمە
سوندىقتان ادامدار كوركەم ادەبيەت وقىعىسى كەلگەندە، رومان دەگەن اتىنان قورقىپ، قىسقا جازبالارعا ءۇيىر بولدى. وقىرمان سۇرانىسىن قاناعاتتاندىرۋ ماقساتىندا از ءماتىن وقىپ، كوپ وي تۇيەتىن اڭگىمەلەردى ۇسىنامىز.
«قيالي». ورالحان بوكەي
بارلىق ادام كىشكەنە كەزىندە تەزىرەك وسسەم عوي دەپ ويلايدى. وسە كەلە بالالىق اۋىلىندا قالا بەرگەنىمدە دەپ اڭسايدى. ال بۇل اڭگىمەنىڭ قيالي كەيىپكەرى سارشاتامىز جىگىت بولعاندا دا كارى اپاسىنىڭ ومىراۋىن سورعىلاپ، اسكەرگە اپامدى الىپ كەتەمىن دەپ قيعىلىق شىعارعان. سول سەكىلدى ءدايىم «عاجاپ» الەمدە عۇمىر كەشكىڭىز كەلسە، ونىڭ قيالي عالامىنا بىرەر مينۋتقا ساياحاتتاپ كەلىڭىز.
«جالعىز». شەرحان مۇرتازا
اق بوراندا اجالمەن ارپالىسقان كارىپحان مەن ەرجان. ەسەڭگىرەپ راديو- راتسياسىمەن سويلەسكەن اسەماي. نەمەرەسىن قاسقىر سۇيەگىنىڭ سورپاسىنا شومىلدىرىپ، عاجايىپقا تاپ بولعان نۇرحان قارت. ءبارى- ءبارى شاعىن اڭگىمەگە سىيىپ كەتكەن. نە جالعىز، كىم جالعىز؟ شىعارمادان وقىڭىز.
«وڭ مەن سول». مۇحتار ماعاۋين
قازاقتا ءوسىپ- جەتىلگەن ادامعا قاراتا ايتىلاتىن «وڭى مەن سولىن تانىدى» دەگەن ءسوز بار. كىشكەنە كەزىڭىزدە وڭ قول مەن سول قولدى، وڭ جاق پەن سول جاقتى قالاي اجىراتۋشى ەدىڭىز؟ ال وسكەندە جاقسى مەن جاماندى ايىرۋعا سول ءادىستى قولدانىپ كوردىڭىز بە؟ ماعاۋين بالا شاعىنداعى وڭ اياق كيىم مەن سول اياق كيىمىن شاتاستىرىپ، جەرگە ءىز سالۋ ارقىلى اجىراتقانىن ادەمى جەتكىزەدى جانە ەسەيگەندە ماقساتى مەن باعىتىنا جەتەر جولداعى وڭ مەن سولىن ايىرۋعا قانداي ءىز سالعانىن وسى وقيعامەن جاقسى ۇيلەستىرگەن.
«وڭ قول». تولەن ابدىكوۆ
ون مينۋت قيساڭىز، باسقا ون مينۋتتاردىڭ قالاي ءوتىپ كەتكەنىن اڭعارماي، ءبىر وتىرعاندا باس الا الماي قالاتىن شىعارما ىزدەسەڭىز، «وڭ قول» تۋىندىسىن وقىڭىز. كوپشىلىگىنە تانىس تا شىعار، دەگەنمەن بىرنەشە قايتالاپ وقىساڭىز دا ارتىق ەتپەيدى. ەمدەلۋشىسىنە عاشىق بولعان دارىگەر اڭگىمەسىنىڭ اسەرىنەن بىردەن ايىعۋ مۇمكىن ەمەستەي.
«مونا ليزا». راقىمجان وتارباي
ءبىر- اق ەرنى ون ەكى جىل سالىنعان ايەلدىڭ كارتيناسى تۋرالى سايتىمىزدا دا، وزگە باسىلىمداردا دا جاريالانعان اقپارات كوپ. ال ول تۋرالى، سۋرەت ونەرى تۋرالى قازاق ادەبيەتى نە دەيدى؟ قازاقتىڭ مونشاق قىزىن قىزعاندىرعان مونانىڭ قۇدىرەتى نەدە؟ ارمان بوپ تابىسىپ، ازاپ بوپ اجىراسقان تاعدىردى شىعارمادان وقىڭىز.
«سول ءبىر قىستىڭ سارسەنبى كۇندەرى». ارمان المەمبەت
اۆتوبۋستا دا، وقۋ ورنىندا دا، ساياباقتا، كىتاپحانادا، كلۋبتا، تەاتردا - قايدا جۇرسەڭىز دە ماحابباتتىڭ بال- شىرىنىنا ماس بولعان عاشىقتاردى كورەسىز. قارايسىز دا، جالعانعا جاريا بولعان سەزىمنىڭ قۇنى قانشا ەكەن دەگەن ويعا قالاسىز. بۇرىنعى كەزدىڭ «كوزبەن كورىپ، ىشپەن بىلىسكەن» ءمولدىر ماحابباتىن ەسكە الىپ، سالىستىرا باعامدايسىز. مۇنداي جۇمباق سەزىم قازىرگى كەزدە دە ولگەن جوق. وعان الماتى قالاسىنداعى قر ۇلتتىق كىتاپحاناسىنىڭ كۇزەتشىسى كوزىمەن قاراپ كورەيىك.. .
«دەپرەسسيا». اياگۇل مانتاي
ادام تەرەڭ ويدىڭ تۇڭعيىعىنا باتىپ كەتسە، دەپرەسسيا تۋادى. ال ول كۇيزەلىس سەزىمى جۇقپالى بولۋى دا مۇمكىن. اياگۇل مانتايدىڭ قاي- قاي جازباسىنان دا ەرەكشەلىك كورۋگە بولادى. ءبىز ۇسىنعان اڭگىمەسى ايكوركەم اتتى جەزوكشە قىز بەن قۇربىسى جايىندا. بەس بالانى بەس ەركەكتەن تۋعان اناسىنا دەگەن قىزدىڭ وشپەندىلىگى قاي جەرگە دەيىن بارۋى مۇمكىن.. .
«ۇشەۋىنىڭ قايسىسى». انتون چەحوۆ
ماحاببات قالاسىنا اتتانعاندا باقىت كوشەسىنە تۇراقتاۋىڭىز بىرگە ساياحاتتاعان جولسەرىگىڭىزگە بايلانىستى. ونى اسا تالعامپازدىقپەن، ون ويلانىپ، مىڭ تولعانىپ تاڭداۋ كەرەك. ءسىز دە وسىنداي تاڭداۋ اراسىندا تۋرا جولدى تابا الماي جۇرسەڭىز، چەحوۆتىڭ «ۇشەۋىنىڭ قايسىسى» اڭگىمەسىن وقۋعا ون مينۋت ءبولىڭىز. وي سالار.
«مادەنيەتتىڭ قوسالقى بولشەگى قايدا؟». ءازيز نەسين
تۇرىكتىڭ اتاقتى ساتيريگى ءازيز نەسين ءوز كەزەڭىندەگى ءومىردى، ساياساتتى سىناپ، حالىققا استارمەن جەتكىزگەن. قاي زاماندا جازىلسا دا، ماڭىزىن جويماعان شىعارمانى مارجان ەرشۋ تۇرىكشەدەن اۋدارىپ ۇسىندى. مادەنيەت - تەمىر. تەمىر - تراكتور. جاڭا زامانعا ىلەسۋ ءۇشىن دە باستىڭ ىشىندەگى بورپىلداقتى ىسكە قوسۋ كەرەك. ايتار اۋىزعا وڭاي، اتقارار ىسكە شە؟
«زومبي». حارۋكي مۋراكامي
جىگىت پەن قىز ۇيلەنۋگە شەشىم قابىلدادى. ال توي بەلگىلەنگەن ۋاقىتقا ءبىر اي قالعاندا جىگىت ويى وزگەرىپ، قىزىنىڭ بويىنان ءمىنىن تەرە باستاسا قالاي بولادى؟ ەش نارسە سەبەپسىز بولمايدى. وقيعا قالاي ءوربىپ، قالاي اياقتالارىن بىلگىڭىز كەلسە، قىسقا عانا اڭگىمەنىڭ دۋمان رامازانوۆتىڭ اۋدارماسىنداعى نۇسقاسىن وقىپ كورىڭىز. اڭگىمەلەردى سىلتەمەسىنە ءوتىپ وقي الاسىز. ال ءسىز قاي اڭگىمەمەن بۇرىننان تانىسسىز؟
Massaget.kz