ازيا قالالارى شەتەلدىك تۋريستەر ءۇشىن ەڭ قىمبات 10 شاھاردىڭ قاتارىندا

سينگاپۋر. قازاقپارات - Mercer حالىقارالىق كونسالتينگ كومپانياسى سىرتتان كەلەتىن شەتەلدىك ماماندار ءۇشىن ەڭ قىمبات قالالار تۋرالى جىلسايىنعى ەسەبىن دايىندادى.

بيىل سىرتتان كەلەتىن شەتەلدىك ماماندار ءۇشىن الەمنىڭ ەڭ قىمبات قالالارى رەيتينگىندە تۇرىكمەنستان استاناسى اشحاباد قالاسى كوش باستاپ تۇر. ءتىزىمنىڭ ءتورتىنشى ورنىندا توكيو قالاسى، ال التىنشى ورنىندا - شانحاي قالاسى ورنالاسقان، دەپ حابارلايدى قازاقپارات Human Resources Online رەسۋرسىنا سىلتەمە جاساپ.

Mercer حالىقارالىق كونسالتينگ كومپانياسىنىڭ جىل سايىنعى رەيتينگىنە بۇكىل الەم بويىنشا 400-دەن استام قالا كىرىپ وتىر. رەيتينگتى جاساۋ ءۇشىن قالالارداعى 200-دەن استام تاۋار اتاۋى، سونىڭ ىشىندە باسپانا، كولىك، ازىق- تۇلىك، كيىم- كەشەك، ۇيگە جانە ويىن- ساۋىققا ارنالعان تاۋارلار باعاسى ەسەپكە الىنادى.

زەرتتەۋ ناتيجەسى سىرتتان كەلەتىن شەتەلدىك ماماندار ءۇشىن ەڭ قىمبات 10 قالانىڭ جارتىسىنان كوبى ازيادا ورنالاسقانىن كورسەتتى.

سونىمەن، 2021 -جىلى الەمدەگى ەڭ قىمبات 10 قالانىڭ تىزىمىنە كىرگەندەر:

اشحاباد، تۇرىكمەنستان؛

گونكونگ، قىتاي؛

بەيرۋت، ليۆان؛

توكيو، جاپونيا؛

سيۋريح، شۆەيتساريا؛

شانحاي، قىتاي؛

سينگاپۋر؛

جەنەۆا، شۆەيتساريا؛

بەيجىڭ، قىتاي؛

بەرن، شۆەيتساريا؛

شانحاي مەن بەيجىڭ قالالارى تيىسىنشە التىنشى جانە توعىزىنشى ورىن الىپ، بىلتىرعى جىلمەن سالىستىرعاندا ءبىر ساتى جوعارى كوتەرىلگەن. سينگاپۋر بەسىنشى ورىننان جەتىنشىگە تومەن ءتۇستى. ۆاليۋتا باعامىنىڭ اۋىتقۋى مەن دەفلياتسيا سالدارىنان بانگكوك 11 ساتىعا (46-ورىن) جانە كۋالا- لۋمپۋر 8 ساتىعا (144- ورىن) سياقتى كورشىلەس قالالار دا رەيتينگتە تومەن تۇسكەن. وسى ارادا، مانيلا تىزىمدە 78- ورىندا، دجاكارتا - 104- ورىندا، ال حوشيمين – 143- ورىندا ورنالاسقان.

بۇعان دەيىن ءۇش جىل قاتارىنان ءتىزىمنىڭ ءبىرىنشى ورنىندا تۇرعان گونكونگ قالاسى بۇل جولى قازىرگى كەزدە ازيا جانە بۇكىل الەمدە سىرتتان كەلەتىن شەتەلدىك تۋريستەر ءۇشىن ەڭ قىمبات قالا سانالاتىن اشحابادقا ورىن بەردى.

BBC اگەنتتىگىنىڭ AFP- قا سىلتەمە جاساپ حابارلاۋىنشا، بۇعان اشحابادتا «ەلدەگى جوعارى ينفلياتسيا» سەبەپ بولعان. الەمدە سىرتتان كەلەتىن شەتەلدىك تۋريستەر ءۇشىن ەڭ قىمبات قالالار «وندىعىنا» كىرگەن ەۋروپالىق ەلدەر اراسىندا نەگىزىنەن شۆەيتساريا قالالارى بار: سيۋريح (5-ورىن)، جەنەۆا (8- ورىن) جانە بەرن (10- ورىن). ا ق ش- تا ەڭ قىمبات قالا سانالاتىن نيۋ- يورك 14-ورىنعا جايعاسقان. ودان كەيىن تىزىمدە لوس- اندجەلەس (20- ورىن) جانە سان- فرانسيسكو (25- ورىن) تۇر

اۆتور: زارينا تۋعانبايەۆا