ا ق ش- تىڭ باتىس بولىگىن سوڭعى 10 جىلدا بولماعان قۋاڭشىلىق جايلادى
مامانداردىڭ ايتۋىنشا، ىستىقتان ەگىستەر قۋراپ، سۋ تاپشىلىعى بولۋى مۇمكىن. ال تاپ وسى كەزدە ا ق ش- تىڭ پەنسيلۆانيا مەن فلوريدا شتاتتارىندا شەلەكتەپ جاۋعان جاڭبىر سوڭى سۋ تاسقىنىنا ۇلاستى. ا ق ش- تىڭ وڭتۇستىك- باتىسىندا اپتاپ ىستىق اۋىل شارۋاشىلىعىنا ەلەۋلى نۇقسان كەلتىرەتىن ءتۇرى بار. ەگىستەر قۋراپ، مالعا سۋ مەن جەم جەتپەۋى مۇمكىن. بۇلاقتار قۇرعاپ قالعاندىقتان، تاۋدى مەكەندەيتىن ءجۋانمۇيىزدى قوشقارلار دا قىرىلىپ جاتىر.
ۇلتتىق مەتەرەولوگيالىق قىزمەتىنىڭ مالىمەتىنشە، قۋاڭشىلىقتاعى ايماقتا ەلۋ ميلليوننان اسا ادام تۇرادى. كاليفورنيا، يۋتا، نيەۆادا، اريزونا، كولورادو شتاتتارىندا بۇگىن اۋا تەمپەراتۋراسى 40 گرادۋستان اسىپ كەتتى، ال كەي اۋدانداردا ءتىپتى ەلۋ گرادۋسقا تاقاپ قالدى. ىستىق اۋا رايىنىڭ سالدارىنان يۋتا مەن كاليفورنيا شتاتتارىندا ورماندار ورتەندى. كاليفورنيانىڭ وڭتۇستىگىندە بىرنەشە تۇرعىن ءۇي جانىپ كەتتى. بيلىك ريۆەرسايد اۋدانىنىڭ تۇرعىندارىن قاۋىپسىز جەرگە كوشىرىپ، بىرنەشە كۇرە جولدى جاۋىپ تاستادى.
يسراەل پاس، جەرگىلىكتى تۇرعىن:
- ءورت كەسىرىنەن جولدار جابىلىپ، قاتىناۋ قيىنداپ كەتتى. پالم- سپرينگسكە تۋرا بارا المايمىز، اينالىپ وتۋگە ءماجبۇرمىز. كەشە لوس- انجەلەستەن كەلە جاتقاندا مەنى ۇيىمە جىبەرگەن جوق.
ا ق ش ورمان قىزمەتىنىڭ مالىمەتىنشە، ءتىلسىز جاۋمەن ارپالىسقان ءبىر ءورت ءسوندىرۋشى جاراقات الدى. كۇشتى جەلدىڭ اسەرىنەن ءورت ۇلكەن اۋدانعا تاراپ كەتۋ قاۋىپى بار. كاليفورنيا شتاتىنىڭ اكىمشىلىگى بۇعان جول بەرمەۋ ءۇشىن ءورت ءسوندىرۋ قىزمەتىن ءارقايسىسى 11300 ليتر سۋ تاسىمالداي الاتىن ۇلكەن ەكى تىك ۇشاقپەن جابدىقتادى.
برايان فەننەسسي، وريندج ايماعى ءورت ءسوندىرۋ قىزمەتىنىڭ باستىعى:
- الداعى ايدا ورمان ءورتى ءورشيدى دەگەن بولجامدى ەسكەرىپ، جەدەل ارەكەت ەتۋ توبى قۇرىلدى. بىزگە ۇلكەن ءورت ءسوندىرۋ تىكۇشاقتارى قاتتى قاجەت. اۋەدەن سۋ توگەتىن ۇلكەن ءارى جىلدام قۇرالدار ورمان ءورتىن اۋىزدىقتاۋعا ەلەۋلى كومەك كورسەتەدى.
باتىس ءوڭىر قۋاڭشىلىقتىڭ زاردابىن تارتقان كەزدە ەلدىڭ وزگە اۋماعىنداعى پەنسيلۆانيا مەن فلوريدا شتاتتارىندا شەلەكتەپ جاڭبىر جاۋعان. نوسەردىڭ سوڭى تاسقىنعا ۋلاسىپ، ەلدى مەكەندەردى سۋ باسىپ كەتتى.
رەسەيدىڭ ءبىراز بولىگىندە دە ىستىق اۋا رايى ورنادى. ءسىبىر مەن قيىر شىعىستاعى ورمان ءورتى ءالى دە وشپەي تۇر. قۇتقارۋ قىزمەتىنىڭ ماماندارىنا كۇنى- ءتۇنى تىنىم جوق.
رومان پەشكوۆ، يركۋتسك وبلىسى توتەنشە جاعداي جونىندەگى قىزمەتى باسشىسىنىڭ ورىنباسارى:
- كاتانگسك اۋدانىندا توتەنشە جاعداي رەجيمى جاريالاندى. كەشە رەسەيدىڭ توتەنشە جاعداي مينيسترلىگى ايماققا يل-76 ۇشاعىن جونەلتتى. بۇگىننەن باستاپ جىبەرىلگەن تەحنيكا ءورت ءسوندىرۋ جۇمىستارىنا تارتىلاتىن بولادى.
ەڭ كۇردەلى جاعداي ياكۋتيا مەن يركۋتسك وبلىستارىندا. وندا الاپات ورتتەن 35 مىڭنان استام گەكتار ورماندى القاپ كۇلگە اينالدى.