ەلوردادا بيىكتىگى 10 مەتر بولاتىن الىپ اققالا جاسالدى
اكىمدىكتىڭ رەسمي سايتىنىڭ مالىمەتىنشە، ونىڭ بيىكتىگى — 10 مەتر. سارىارقا اۋدانى اكىمىنىڭ ورىنباسارى ءابدىراحمان داۋلەنبايەۆتىڭ ايتۋىنشا، الىپ اققالانىڭ سالىنۋىنا بيۋجەت قاراجاتى بولىنبەگەن.
«ەلوردا اكىمدىگى مەن سارىارقا اۋدانى تۇرعىندارىنىڭ ىنتاسى مەن بىرلەسكەن كۇش-جىگەرىنىڭ ارقاسىندا اۋداننىڭ دا، قالانىڭ دا كورىكتى جەرىنە اينالعان اققالا پايدا بولدى. جوبا اۆتورى — بەلگىلى ءمۇسىنشى-سۋرەتشى، «قازاق ەلى» مونۋمەنتىنىڭ اۆتورى سەمبىعالي سماعۇلوۆ»، — دەدى ءابدىراحمان داۋلەنبايەۆ.
ۋربانيستيكا ورتالىعىنىڭ جەتەكشىسى ەلنار بازىكەن اققالا قاڭقاسىز جاسالعانىن ءمالىم ەتتى.
«اققالانى سالۋ كەزىندە بەلگىلى ءبىر قيىندىقتار بولدى، ويتكەنى قاتتى ايازدىڭ سالدارىنان قار دۇرىس جابىسپاي، قۇم سياقتى شاشىلىپ جاتتى. ونىڭ بيىكتىگى — 10 مەتر، شارفىنىڭ ۇزىندىعى — 20 مەتر. قالپاقتىڭ ورامى — 5 مەتر»، — دەدى ەلنار بازىكەن.
ەلوردادا سالىنعان اققالا قازاقستانداعى جانە ورتالىق ازياداعى ەڭ ۇلكەن دەگەن اتاققا ۇمىتكەر بولۋى مۇمكىن.