عاسىردىڭ جۇمباق قاستاندىعى. دجون كەننەدي ولىمىنە قاتىستى 10 بولجام
قاستاندىققا كوشەنىڭ ەكى جاعىندا پرەزيدەنتتى قارسى الىپ تۇرعان جۇزدەگەن ادام مەن ونداعان جۋرناليست كۋا بولدى. وسىلايشا، بۇل وقيعا بۇكىل الەمدە ۇلكەن شۋ تۋدىردى. نازارىڭىزعا قاستاندىققا قاتىستى 10 بولجامدى ۇسىنامىز.
قاستاندىق قالاي بولدى؟
لي حارۆي وسۆالد سول كۇنى قالالىق پوليتسياعا شاقىرۋ نەگىزىندە باستى كۇدىكتى رەتىندە قاماۋعا الىندى. سونىمەن قاتار ول «جولدا توقتاتقان پوليتسيا قىزمەتكەرىن ءولتىردى» دەگەن كۇدىككە دە ءىلىندى. ءبىراق وسۆالد وزىنە تاعىلعان ايىپتاردى مويىندامادى. ءۇش كۇننەن كەيىن، 24 - قاراشادا، وسۆالدتى پوليتسيا مەن جۋرناليستەردىڭ الدىندا قالالىق تۇرمەدەن ۋەزدىك تۇرمەگە اۋىستىرۋ كەزىندە داللاستاعى تۇنگى كلۋبتىڭ يەسى دجەك رۋبي اتىپ ءولتىردى. ءبىر قىزىعى، بۇل وقيعا تىكەلەي ەفير كەزىندە بولدى.
دجەك ءرۋبيدىڭ لي حارۆي وسۆالدتى اتىپ ولتىرگەن ءساتى
سودان كەيىن ۆيتسە- پرەزيدەنت ليندون دجونسون پرەزيدەنت كەننەديدىڭ ءولىمىنىڭ سەبەپتەرىن انىقتاۋ ءۇشىن ا ق ش جوعارعى سوتىنىڭ ءتوراعاسى ەرل ۋوررەن باسقاراتىن ارنايى كوميسسيا قۇرادى. كوميسسيا بۇل ءىستى 10 اي تەرگەپ «پرەزيدەنتتى لي حارۆي وسۆالد اتىپ ءولتىردى» دەگەن قورىتىندىعا كەلەدى. دجەك رۋبي بولسا، پرەزيدەنتتىڭ ءولىمى ءۇشىن كەك العانىن جانە جاكلين كەننەديدىڭ قايعىسىن جەڭىلدەتۋ ءۇشىن وسۆالدتى ولتىرگەنىن ايتادى. ءبىراق كوپ وتپەي كەننەديدىڭ ولىمىنە بايلانىستى قاستاندىق تەوريالارى جانە ءتىپتى وسۆالدتىڭ كىسى ولتىرۋگە قاتىسى جوق دەگەن قاراما- قايشى بولجامدار كوبەيەدى. سودان بەرى جارتى عاسىردان استام ۋاقىت وتسە دە، امەريكالىقتاردىڭ كەم دەگەندە 60 پايىزى كەننەديدىڭ ولىمىنە باستى كىنالىلەر تابىلعان جوق دەپ سانايدى.
امەريكالىق جۋرناليستەر، پروكۋرورلار مەن قۇقىق قورعاۋشىلار بىرنەشە جىلدان بەرى كەننەديدىڭ ولىمىنە بايلانىستى تاۋەلسىز ساۋالدار جۇرگىزىپ كەلەدى. بۇل تاقىرىپتا 600 دەن استام كىتاپ پەن دەرەكتى فيلم جارىق كوردى.
كەيبىرەۋلەر پرەزيدەنت كەننەديدى ءولتىرۋدىڭ ارتىندا كەڭەس وداعى تۇردى دەگەن بولجام ايتادى.
ءبىرىنشى بولجام: كەڭەس وداعى
سول كەزدەگى ءبىر- بىرىنە قارسىلاس بولعان ەكى الىپ دەرجاۆا ا ق ش پەن كەڭەس وداعى ەدى. ا ق ش پرەزيدەنتىن ءولتىرۋ ك گ ب- نىڭ (مەملەكەتتىك قاۋىپسىزدىك كوميتەتى) ارەكەتى دەگەن حابار باتىس باسپا سوزىندە ءجيى ايتىلدى. بۇعان حارۆي وسۆالدتىڭ ءبىراز ۋاقىت كەڭەس وداعىندا بولعانى جانە سول جەردە ك س ر و ازاماتشاسىنا ۇيلەنگەنى دە اسەر ەتتى. تۇتقىندالعاننان كەيىن جاۋاپ العان كەزدە، وسۆالد وعان كەڭەس وداعىندا بولعاندىقتان ايىپ تاعىلىپ وتىرعانىن ايتتى.
تاريحشىلار بۇل قاستاندىققا كەڭەس وداعى مۇلدەم مۇددەلى ەمەس ەكەنىن جازدى. سەبەبى كەڭەس وداعىنىڭ ا ق ش پرەزيدەنتىن ءولتىرۋى بۇكىل الەمدى وزىنە قارسى قويار ەدى.
كەننەدي ولىمىنەن كەيىن ليندوننىڭ پرەزيدەنت قىزمەتىنە تاعايىندالۋ ءساتى
ەكىنشى بولجام: ۆيتسە- پرەزيدەنت ليندون دجونسون
ءارتۇرلى ساۋالنامالارعا سايكەس، امەريكالىقتاردىڭ شامامەن 20 پايىزى ۆيتسە- پرەزيدەنت ليندون دجونسوندى كەننەدي ءولىمىنىڭ ارتىندا تۇرعان ادام دەپ سانايدى. دجونسوندى ايىپتاۋشىلار مۇنىڭ باستى سەبەبى ۆيتسە- پرەزيدەنتتىڭ كەننەديدى مۇلدەم ۇناتپاۋىندا جانە 1964 -جىلعى سايلاۋدا كەننەدي جەڭىسكە جەتسە، ونى ۆيتسە- پرەزيدەنتتىككە قويۋدى قالاماۋىندا دەپ اتاپ كورسەتتى. دەرەككوزدەر دجونسوننىڭ لي حارۆي وسۆالدتىڭ ءولتىرۋشىسى دجەك رۋبيمەن تانىستىعىنا دا نازار اۋدارعان.
ءۇشىنشى بولجام: ورتالىق بارلاۋ باسقارماسى (CIA)
وسۆالدتىڭ ورتالىق بارلاۋ باسقارماسىمەن (و ب ب) جۇمىس ىستەدى نەمەسە ونىڭ ارتىندا و ب ب تۇردى دەگەن ويلاردى ۋوررەن كوميسسياسى جانە دجون كەننەدي مەن مارتين ليۋتەر كينگتىڭ ءولىمىن تەرگەۋ ماقساتىندا قۇرىلعان ا ق ش پالاتا كوميتەتى راستاماسا دا، باسپا سوزدە كەننەديگە ۇيىمداستىرىلعان قاستاندىق ارتىندا و ب ب وكىلدەرى بولعانىن جازعان. كەيبىر اقپارات كوزدەرىنە قاراعاندا، كەننەدي الداعى سايلاۋدا جەڭىسكە جەتكەننەن كەيىن وبب قىزمەتىنە ارنايى تەرگەۋ جۇرگىزبەكشى ەدى. سوندىقتان ءارقاشان كولەڭكەدە جۇرگەندى ۇناتاتىن و ب ب باسشىلىعى تەرگەۋ بارىسىندا ءىشىنارا زاڭسىز اقپاراتتىڭ جاريالانۋىنا جول بەرمەۋ ءۇشىن «پرەزيدەنتكە قارسى قاستاندىق ۇيىمداستىردى» دەگەن بولجام بار.
دجون ەدگار
ءتورتىنشى بولجام: فەدەرالدى تەرگەۋ بيۋروسىنىڭ (FBI) ديرەكتورى دجون ەدگار گۋۆەر
تاعى ءبىر كەڭ تارالعان بولجام - قاستاندىقتىڭ ارتىندا فەدەرالدى تەرگەۋ بيۋروسىنىڭ (ف ت ب) ديرەكتورى دجون ەدگار گۋۆەر تۇرۋى مۇمكىن. 1924 -جىلى بۇرىنعى ف ت ب ديرەكتورى گۋۆەر تەرگەۋ بيۋروسىنىڭ ديرەكتورى بولدى. 1935 -جىلى ول ۇيىمدى فەدەرالدى تەرگەۋ بيۋروسى رەتىندە قايتا قۇرۋدا شەشۋشى ءرول اتقاردى جانە ونى 1972 -جىلى قايتىس بولعانعا دەيىن باسقاردى. جارتى عاسىر بويى سەگىز پرەزيدەنت اۋىسسا دا ول قىزمەتىنەن تۇسپەدى.
اللەن داللەس 1962 -جىلى و ب ب باسشىلىعىنان بوساتىلعاننان كەيىن، كەزەك گۋۆەرگە كەلگەنىنە كوپشىلىك كۇماندانبادى. وسى تۇرعىدان كەيبىر جۋرناليس پەن تاريحشى گۋۆەردى قاستاندىقتىڭ نەگىزگى سۋبەكتى رەتىندە قاراستىرادى.
كەيىننەن امەريكالىق باسپا ءسوز قىزمەتى گۋۆەردىڭ بىرنەشە رەت فبر يۋريسديكتسياسىن بۇزدى، ءتىپتى ءوزىنىڭ قىزمەتكەرلەرى ارقىلى ساياسي كوشباسشىلار تۋرالى ماڭىزدى اقپارات جينادى جانە وسى اقپاراتتى پرەزيدەنتتەرگە قىسىم جاساۋ ءۇشىن پايدالاندى دەگەن ماقالالار جاريالادى. ءتىپتى 1969-1974 -جىلدارداعى امەريكا قۇراما شتاتتارىنىڭ پرەزيدەنتى ريچارد نيكسون 1971 -جىلى گۋۆەردى قىزمەتىنەن بوساتۋعا بولمايتىن سەبەپتەردىڭ ءبىرى رەتىندە ف ت ب ديرەكتورى وعان قىسىم جاساۋى مۇمكىن ەكەنىن ايتقان.
بەسىنشى بولجام: اسكەري- ءوندىرىس كەشەنى
1961 -جىلى 17 - قاڭتاردا قىزمەتتەن كەتەر الدىندا ءوزىنىڭ قوشتاسۋ سوزىندە ا ق ش پرەزيدەنتى گەنەرال دۋايت ەيزەنحاۋەر اسكەري- ءوندىرىس كەشەنىنىڭ كۇشەيىپ كەلە جاتقاندىعى تۋرالى ەسكەرتىپ، ولاردىڭ ۇكىمەت ىستەرىنە زاڭسىز ىقپال ەتۋىنەن ساقتاندىرعان.
اسكەري- ونەركاسىپ كەشەنى - بۇل ەلدىڭ قارۋلى كۇشتەرى مەن ونى قامتاماسىز ەتەتىن قورعانىس ونەركاسىبى اراسىنداعى (جەكە كورپوراتسيالاردى قوسا العاندا) مەملەكەتتىك ەمەس ساياساتقا اسەر ەتەتىن بەيرەسمي وداق. بۇل وداق ا ق ش- تىڭ ۆەتناممەن سوعىسى كەزىندە ماڭىزدى رول اتقارعان.
ۆەتنامداعى اسكەري- ساياسي جانجال 1960 -جىلداردىڭ باسىندا ءورشي ءتۇستى. كوپشىلىك دجون كەننەدي ا ق ش اسكەرلەرىنىڭ ۆەتنامعا تىكەلەي كىرۋىنە قارسى بولىپ، سول ەلگە جىبەرىلگەن اسكەري كەڭەسشىلەردى كەرى شاقىرىپ الۋدى ويلاعانىن ايتادى. بۇل شەشىم اسكەري- ونەركاسىپ كەشەنىن قارۋ- جاراق ساتىپ، وڭاي ولجا تاۋىپ وتىرعان ىسىنەن ايىراتىن ەدى.
فيدەل كاسترو
التىنشى بولجام: كۋبالىقتار
كەننەديدىڭ كەزىندە كۋبادا فيدەل كاسترونىڭ رەجيمىن قۇلاتۋعا بىرنەشە رەت ارەكەت جاسالدى، بۇل «كاريب داعدارىسىنا» دۋشار ەتتى (كۋبادا كەڭەس وداعى يادرولىق زىمىرانداردى ورنالاستىرۋعا بايلانىستى ا ق ش- ك س ر و جانجالى) . كاسترو رەجيمى كەزىندە كۋبا- ا ق ش قارىم- قاتىناسى ونشا بولمادى. سوندىقتان كۋبا ۇكىمەتى، اتاپ ايتقاندا فيدەل كاسترو، امەريكالىق باسپا سوزدە كەننەدي ولىمىنە قاتىسى بار دەپ ايىپتالدى.
1960 -جىلى فيدەل كاسترونى جويۋعا باعىتتالعان و ب ب- نىڭ بىرنەشە رەت جاسىرىن ارەكەتتەرى تۋرالى اقپارات باسپا سوزگە تارادى. كەيبىرەۋلەر كەننەديدىڭ ءولىمىن كۋبا كوسەمىنىڭ «كەك الۋى» دەپ سانايدى.
كۋبالىقتاردىڭ كەننەديدىڭ ولىمىنە قاتىستى تاعى ءبىر بولجام بار. پرەزيدەنتتى كاستروعا جاۋ بولعان جانە ا ق ش- قا كوشىپ كەلگەن كۋبالىقتار ولتىرگەن بولۋى مۇمكىن. پرەزيدەنت كەننەديدىڭ كاسترو رەجيمىن ءىس جۇزىندە مويىنداۋى ا ق ش- تاعى كۋبالىق يمميگرانتتاردىڭ كوڭىلىن قالدىرعان. بۇل تەوريانىڭ جاقتاۋشىلارى كەننەدي قايتىس بولسا، بولاشاق پرەزيدەنت كۋبا ماسەلەسىنە تاعى دا بايىپتى قارايدى جانە ناتيجەسىندە كاسترو رەجيمى تەز قۇلاتىلادى دەپ سەنگەن دەيدى.
ءبىر قىزىعى، كەننەديدىڭ ولىمىنە باستى كۇدىكتى لي حارۆي وسۆالد تا امەريكادا كاسترو رەجيمىنىڭ جاقتاۋشىسى بولعان دەگەن مالىمەتتەر بار.
جەتىنشى بولجام: فەدەرالدى رەزەرۆ جۇيەسى
بەلگىلى امەريكالىق جۋرناليست جانە ساياسي قاستاندىقتار تۋرالى بىرنەشە كىتاپتاردىڭ اۆتورى دجيم ماررس 1989 -جىلى شىققان «Crossfire: كەننەديدى ولتىرگەن سيۋجەت» كىتابىندا پرەزيدەنت فەدەرالدى رەزەرۆ جۇيەسىنىڭ بيلىگىن شەكتەپ وتىرعانىن جازدى.
ماررستىڭ ايتۋىنشا، كەننەدي قول قويعان 11110-بۇيرىقتا فەدەرالدى رەزەرۆ قىزمەتى ارنايى وكىلەتتىكتەرىن قارجى دەپارتامەنتىنە (ا ق ش قارجى مينيسترلىگى) وتكىزۋ قاراستىرىلعان ەكەن.
سەگىزىنشى بولجام: تەحاس مۇناي ماگناتتارى
كەننەدي قاستاندىعىنىڭ ارتىندا تەحاستىڭ مۇناي سالاسىنىڭ كاسىپكەرلەرى تۇر دەگەن بولجام دا باسپا سوزدە ءجيى كوتەرىلدى.
1926 -جىلدان باستاپ امەريكالىق مۇناي كومپانيالارى وراسان زور سالىق جەڭىلدىكتەرىنە يە بولا باستادى. بۇل جەڭىلدىكتەر تەحاس مۇناي ماگناتتارىنا جىلىنا ورتا ەسەپپەن 300 ميلليون دوللار پايدا الىپ كەلدى (قازىرگى نارىقپەن ەسەپتەگەندە شامامەن 1,5 ميلليارد دوللار) .
كەننەدي پرەزيدەنت بولىپ سايلانعاننان كەيىن ونىڭ نەگىزگى ماقساتتارىنىڭ ءبىرى سالىق جەڭىلدىكتەرىن جويۋ جانە الىنعان قاراجات ەسەبىنەن ورتا تاپتىڭ ءومىر ءسۇرۋ دەڭگەيىن كوتەرۋگە باعىتتالعان الەۋمەتتىك رەفورمالاردى جۇزەگە اسىرۋ ەدى.
1963 -جىلى كەننەدي مۇناي كومپانيالارى ءۇشىن نەگىزگى سالىق جەڭىلدىكتەرىن جويۋدى ۇسىندى، بۇل ءىرى مۇناي بيزنەسىنە ۇلكەن سوققى بولدى. سەبەبى، مۇنداي جاعدايدا ميللياردتاعان دوللار شىعىنعا باتاتىن ەدى. ءبىراق كەننەدي ولتىرىلگەننەن كەيىن پرەزيدەنت بولعان ليندون دجونسون دا، ودان كەيىنگى پرەزيدەنت ريچارد نيكسون دە كەننەديدىڭ بۇل ۇسىنىسىن قاراستىرۋدان باس تارتقان.
توعىزىنشى بولجام: ۇيىمداسقان قىلمىستىق توپتار (مافيا)
كەننەدي ولىمىنە مافيانىڭ قاتىسى بار دەگەن بولجام دا جوق ەمەس. بۇل بولجامدى جاقتايتىندار كەننەدي پرەزيدەنت بولعان كەزدە باس پروكۋرور بولعان اعاسى روبەرت كەننەديدىڭ ۇيىمداسقان قىلمىسقا قارسى اۋقىمدى ءىس- ارەكەتى امەريكانىڭ مافيا جۇيەلەرىنە ۇلكەن زيان كەلتىردى دەپ سانايدى. كەيبىر جۋرناليستەردىڭ پىكىرىنشە، مافيا پرەزيدەنت كەننەديدى ءولتىرۋ ارقىلى ونىڭ اعاسى روبەرتتى باس پروكۋرور قىزمەتىنەن الىپ تاستاعىسى كەلگەن.
كارلوس مارچەللو تۇتقىندالعان ءسات
ناقتى ايتقاندا، قاستاندىققا سول كەزدەگى قىلمىس الەمىنىڭ سەركەسى كارلوس مارچەللونىڭ تىكەلەي قاتىسى بولعان كورىنەدى. باس پروكۋرور روبەرت كەننەديدىڭ كۇشىمەن 1963 -جىلدىڭ قاراشاسىندا مارچەللوعا قارسى سوت پروتسەسى بولادى. ءبىراق پرەزيدەنت كەننەدي ولتىرىلگەننەن كەيىن مارچەللو اقتالىپ، بوساتىلادى. كارلوس مارچەللونىڭ جاقىن دوسى سانالاتىن داللاستاعى ءىرى مافيا جەتەكشىسى دجوزەف كامپيسپەن تىعىز قارىم- قاتىناسى بىرنەشە زەرتتەۋشىلەردىڭ اراسىندا ۇلكەن كۇدىك تۋدىردى. سەبەبى كامپيسپەن وسۆالدتى ولتىرگەن دجەك ءرۋبيدىڭ بايلانىسى بولعان. ءبىر قىزىعى، رۋبي تۇرمەدە قايتىس بولعانعا دەيىن، كامپيس وعان ۇنەمى كەلىپ، كەيدە وعان كۇنىنە بىرنەشە رەت قوڭىراۋ شالىپ تۇرعان.
ونىنشى بولجام: ميللياردەر اريستوتەل وناسسيس
اريستوتەل وناسسيس (كوبىنەسە اري دەپ اتالادى) ، كيت اۋلاۋ، اۆياتسيا، قوناق ءۇي بيزنەسى، التىن ءوندىرۋ جانە ينۆەستيتسيامەن اينالىسقان ايلاكەر ميللياردەر ەدى. ول جوعارى ساياسي ورتاعا جاقىن بولۋعا ۇمتىلعان.
ميللياردەردىڭ ءومىربايانىن جازعان فرەنك برەدي اريستوتەل وناسسيس ا ق ش- تىڭ ءبىرىنشى حانىمىنا عاشىق بولعانىن جازعان. سوندىقتان ول ا ق ش ءبىرىنشى حانىمىن ءوزىنىڭ ايگىلى ياحتاسىنا بىرنەشە رەت قوناققا شاقىرعان ەكەن.
جاكلين كەننەدي اريستوتەل وناسسيسكە 1968 -جىلى تۇرمىسقا شىققان ءسات
جاكلين كەننەديدىڭ ميللياردەر ياحتاسىندا دەمالعانى تۋرالى ءتۇرلى قاۋەسەت باسپا سوزگە تاراپ كەتكەن كەزدە دجون كەننەدي قاتتى اشۋلانىپ، ايەلىن «حالىقارالىق قاراقشى» وناسسيس ياحتاسىنان كەتىپ، تەز ارادا ۆاشينگتونعا ورالۋ كەرەك ەكەنىن ايتقان.
كۇيەۋى قايتىس بولعاننان كەيىن جاكلين كەننەدي ەكى بالاسىمەن مانحەتتەندەگى بەسىنشى اۆەنيۋدەگى ۇيىندە تۇرا باستادى. اريستوتەل وناسسيس وعان ءجيى بارىپ تۇرعان. 1968 -جىلى جاكلين حانىم كەننەدي اۋلەتىنە وناسيسكە تۇرمىسقا شىعۋعا شەشىم قابىلداعانىن ايتادى. بۇل شەشىمگە دجون كەننەديدىڭ اعاسى روبەرت كەننەدي قاتتى نارازى بولادى. ءبىراق 1968 -جىلى 5 - ماۋسىمدا لوس- اندجەلەستە روبەرت كەننەديدى پالەستينالىق سەرحان بيشارا اتىپ ءولتىردى. ونىڭ ولىمىنەن بەس ايدان استام ۋاقىت وتكەننەن كەيىن جاكلين مەن ءاريدىڭ ۇيلەنۋ تويى 20- قازاندا يون تەڭىزىندە ورنالاسقان ميللياردەرگە تيەسىلى «سكورپيون» ارالىندا وتەدى.
ۇيلەنۋ تويى تۋرالى جاڭالىقتاردان كەيىن امەريكالىق باسپا ءسوز اريستوتەل وناسسيس پرەزيدەنت كەننەدي، سونداي- اق ونىڭ اعاسى روبەرت كەننەديدىڭ ولىمىنە سەبەپ بولعان ادامداردىڭ ءبىرى تۋرالى سەنساتسيالىق ماقالالار، ءتىپتى كىتاپتار جازا باستادى.
massaget.kz