الماتىدا سوت 10 ادامدى ولتىرگەن ازاماتقا ۇكىم شىعاردى

None
الماتى. قازاقپارات - الماتىدا 10 ادامدى ءولتىردى دەپ ايىپتالعان ەر ادام ءومىر بويىنا باس بوستاندىعىنان ايىرىلدى، دەپ حابارلايدى قازاقپارات ءتىلشىسى.

الماتى قالالىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ مالىمەتىنشە، س. ەسىمدى ەر ادام 2013 -جىلى سەگىز ادامدى ولتىرگەنى ءۇشىن ايىپتى دەپ تانىلىپ، ءومىر بويىنا باس بوستاندىعىنان ايىرىلعان.

ول جازاسىن «قارا بۇركىت» قىلمىستىق- اتقارۋ جۇيەسىنىڭ قاۋىپسىزدىگى بارىنشا جوعارى مەكەمەسىندە وتەپ جاتىر. جاقىندا ونىڭ تاعى ەكى ايەلدىڭ ولىمىنە قاتىسى بار ەكەنى انىقتالىپ، دالەلدەندى. وسى ىسكە قاتىستى بۇگىن سوت شەشىم شىعاردى.

«2001 -جىلدىڭ كۇزىندە س. جابىرلەنۋشىلەر ب. مەن ك. -نىڭ پاتەرلەرىن يەمدەنۋ ماقساتىندا ولاردىڭ سەنىمىنە كىرگەن. سول جىلدىڭ قازان ايىندا ب. مەن ك. ەسىمدى ايەلدەردى جالعا العان ۇيگە شاقىرىپ، وندا ول باسقا ادامدارمەن بىرگە ولاردى ولتىرگەن. كەيىننەن سوتتالۋشى مەن تاعى باسقا ادامدار مەنشىك قۇقىعىنىڭ قۇجاتتارىن يەمدەنىپ، جالعان سەنىمحاتتار ارقىلى پاتەرلەردى ساتقان»، - دەلىنگەن سوتتىڭ حابارلاماسىندا.

القابيلەر سوتىنىڭ شەشىمىمەن سوتتالۋشى قىلمىستىق كودەكستىڭ 96-بابى، 2-بولىگى، «ا، ج، ز» تارماقتارى بويىنشا كىنالى دەپ تانىلىپ، وعان قايتادان ءومىر بويىنا باس بوستاندىعىنان ايىرۋ جازاسى تاعايىندالدى. ۇكىم زاڭدى كۇشىنە ەنگەن جوق.

سوڭعى جاڭالىقتار