ءۇش كۇندە اۆتوبۋس جۇرگىزۋشىلەرىنىڭ 10 مىڭعا جۋىق جول ەرەجەسىن بۇزۋ فاكتىسى انىقتالدى

نۇر-سۇلتان. قازاقپارات - ق ر ىشكى ىستەر مينيسترلىگى «اۆتوبۋس» جەدەل الدىن الۋ شاراسىن وتكىزىپ، ون مىڭنان استام جول ەرەجەسىن بۇزۋ فاكتىسىن انىقتادى.

بۇل تۋرالى مينيسترلىكتىڭ رەسمي وكىلى ءنۇردىلدا وراز ايتىپ بەردى، دەپ حابارلايدى قازاقپارات ءتىلشىسى.

«ءۇش كۇندىك رەيد بارىسىندا اۆتوبۋس جۇرگىزۋشىلەرىنىڭ 10 مىڭعا جۋىق جول ەرەجەسىن بۇزۋ فاكتىسى انىقتالدى. ماس كۇيىندە اۆتوبۋس ايداعان 15 جۇرگىزۋشى تىركەلدى. بارلىق جۇرگىزۋشىلەر كولىك جۇرگىزۋ قۇقىعىنان ايىرىلاتىن بولادى. جولاۋشىلاردى تاسىمالداۋ كەزىندە 1700 دەن استام اۆتوبۋس جۇرگىزۋشىسى تەلەفون پايدالانعان. 300 گە جۋىعى جىلدامدىقتى مولشەردەن تىس ارتتىرىپ، اينالاسىنا قاۋىپ توندىرگەن. بۇدان باسقا ەڭبەك جانە دەمالىس رەجيمىن بۇزۋدىڭ 43 فاكتىسى، تەحنيكالىق تەكسەرۋدەن وتپەگەن، زاڭسىز قايتا جابدىقتالعان ءبىر مىڭنان استام اۆتوبۋس، جىلدامدىقتى ارتتىرۋدىڭ 300-گە جۋىق فاكتىسى انىقتالدى»، - دەدى نۇردىلدا وراز الەۋمەتتىك جەلىدە وتكەن ونلاين بريفينگىدە. شارا ناتيجەسىندە اۆتوبۋس پاركتەرى باسشىلارى قاتارىنان 126 لاۋازىمدى تۇلعا اكىمشىلىك جاۋاپكەرشىلىككە تارتىلدى.

ەكى اۆتوپاركتىڭ ليتسەنزيالارى توقتاتىلدى. 292 كولىك قۇرالى ايىپپۇل تۇراعىنا قويىلدى. سونىمەن بىرگە، رەسمي وكىل ءبىر اپتادا جالپى سانى 3424 قىلمىس تىركەلگەنىن اتاپ ءوتتى. پوليتسەيلەردىڭ جەدەل ارەكەت ەتۋى ناتيجەسىندە 2198 قىلمىس ءىزى سۋىماي اشىلدى. ونىڭ ىشىندە 19 ادام ءولتىرۋ، 38 توناۋ جانە 513 ۇرلىق فاكتىلەرى اشكەرە بولدى. ءبىر اپتادا جالپى سانى 209 جول-كولىك وقيعاسى ورىن الدى، سالدارىنان وكىنىشكە قاراي 40 ادام قازا تاۋىپ، 235 ادام جاراقات الدى.