تۇلكىباستا قايىرىمدى جاندار اۋرۋحاناعا 10 وتتەگى كونتسەنتراتورىن الىپ بەردى

تۇلكىباس. قازاقپارات - تۇركىستان وبلىسىنىڭ تۇلكىباس اۋداندىق ورتالىق اۋرۋحاناسىنا قايىرىمدى جاندار 10 وتتەگى كونتسەنتراتورىن سىيعا تارتتى، دەپ حابارلايدى قازاقپارات.

«تۋعان جەرگە تاعزىم - ءار پەرزەنتتىڭ پارىزى» دەگەندەي، وزگە ايماقتا تۇرىپ جاتسا دا، تۋعان جەرىن ۇمىتپاي، قيىن ساتتە قامقورلىق جاساپ جاتقان ازاماتتار قاتارى تۇلكىباس اۋدانىندا كۇن ساناپ ارتىپ كەلەدى. بۇگىن ەلىن سۇيگەن ازاماتتار پنيەۆمونيامەن كۇرەستە اسا قاجەت وتتەگى كونتسەنتراتورىنىڭ 10 داناسىن اۋداندىق اۋرۋحاناعا تابىستادى.

ايتا كەتسەك، تۇلكىباس اۋدانىنىڭ تۋماسى، «جىگىتتەر» كۆارتەتىنىڭ پروديۋسەرى ەرعالي ءابدىرايىموۆ وتتەگى كونتسەنتراتورىنىڭ 5 داناسىن جانە «Nur Max» قۇرىلىس كومپانياسىنىڭ ديرەكتورى لەسالى ابزال ەسىمدى ازامات 5 داناسىن تارتۋ ەتتى.

اۋدان تۋمالارى قانداي قيىن كەزەڭ بولماسىن، تۋعان جەرىنە قولداۋ كورسەتىپ، قول ۇشىن سوزۋعا دايىن ەكەنىن جەتكىزىپ، اق حالاتتى ابزال جانداردىڭ جۇمىسىنا ساتتىلىك تىلەدى.