قازاقپارات كۇنتىزبەسى: 10- شىلدە
ەستە قالار وقيعالار
1965-جىلى ماڭعىستاۋ مۇنايىنىڭ ءبىرىنشى ەشەلونى مۇناي وڭدەۋ ونەركاسىبىنە جونەلتىلدى.
1992-جىلى قازاقستان رەسپۋبليكاسى مينيسترلەر كابينەتىنىڭ قاۋلىسىمەن الماتى قالاسىنداعى قازان توڭكەرىسىنىڭ 50 جىلدىعى اتىنداعى سپورت سارايىنا اقىن، ءانشى جانە كومپوزيتور بالۋان شولاقتىڭ ەسىمى بەرىلدى.
2009-جىلى الماتى وبلىسىنداعى تالعار اۋدانى ەلامان اۋىلىندا «قازاقستان-قىتاي» گاز جەلىسى العاشقى بولىگىنىڭ دانەكەرلەۋ جۇمىستارى اياقتالدى. بۇل جوبا تۇرىكمەنستاننىڭ تابيعي گازىن قازاقستان اۋماعى ارقىلى قىتايعا جەتكىزۋ ماقساتىندا جۇزەگە اسىرىلۋدا.
سونىمەن قاتار، قازاقستاننىڭ باتىس وڭىرىندەگى تابيعي گازدى قىتايعا، قىزىلوردا، جامبىل، وڭتۇستىك قازاقستان، الماتى وبلىستارى مەن الماتى قالاسىنا تاسىمالداۋ جۇزەگە اسىرىلادى. گاز قۇبىرى وزبەكستان مەن قازاقستان شەكاراسىنان باستالىپ، وڭتۇستىك قازاقستان، جامبىل، الماتى وبلىستارىنىڭ اۋماعىنان قىتايمەن شەكارالاس قورعاس بەكەتىنە دەيىن جەتكىزىلەدى.
قۇبىر جەلىسىنىڭ جالپى ۇزىندىعى 1304,5 شاقىرىمدى قۇرايدى.
2013-جىلى باتىس-قازاقستان وبلىسىنىڭ ارحەولوگتارى قازاقستاندا ورتاعاسىرلىق قالالىق مادەنيەت بولعانىن ايعاقتايتىن زاتتار تاپتى. تابىلعان «تاس وبا» قالاشىعى اقجايىق اۋدانى ەسەنساي كەنتىنىڭ ماڭىندا ورنالاسقان. ءبىزدىڭ زامانىمىزدىڭ XIII عاسىرىندا بولعان دەپ ەسەپتەلەدى.
2013-جىلى ەلىمىزدە العاش رەت ا. سىزعانوۆ اتىنداعى حيرۋرگيا عىلىمي ورتالىعىندا ءبىر دونوردىڭ بىرنەشە ورگانىن (جۇرەگىن، باۋىرىن جانە ەكى بۇيرەگىن) ءتورت ناۋقاسقا بەرۋ وتاسى جاسالدى. پروتسەسكە 100 گە جۋىق مەديتسينا قىزمەتكەرى، سونىڭ ىشىندە 22 حيرۋرگ جۇمىلدىرىلدى.
وپەراتسيا جالپى 28 ساعات جۇرگىزىلدى. ەڭ كۇردەلىسى - باۋىر ترانسپلانتاتسياسى 17 ساعاتقا سوزىلدى.
2014-جىلى Astana Opera بالەتىنىڭ ارتىستەرى ايگەرىم بەكەتايەۆا مەن ەركىن راحماتوللايەۆ ميلاندا Expo-2015 اياسىندا «لا سكالا» تەاترىندا وتەتىن ەكى گالا-كونسەرتكە قاتىسۋعا شاقىرىلدى.
2015-جىلى رەسەي پرەزيدەنتى ۆلاديمير پۋتين قازاقستان جانە رەسەي اراسىنداعى كوپجوسپارلى ىنتىماقتاستىق بايلانىستىڭ دامۋىنا قوسقان ۇلەسى جانە ينتەگراتسيالىق پروتسەستەردىڭ ىلگەرىلەۋى بويىنشا ەكىجاقتى ءوزارا ءىس-قيمىلداعى بەلسەندىلىگى ءۇشىن قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆقا «الەكساندر نيەۆسكي» وردەنىن تابىستادى.
«الەكساندر نيەۆسكي» وردەنىمەن رەسەي فەدەراتسياسىمەن كوپجاقتى ىنتىماقتاستىقتىڭ دامۋىنا ۇلەس قوسقان كورنەكتى شەتەلدىك ساياسي جانە قوعام قايراتكەرلەرى، وزگە مەملەكەتتەردىڭ ىسكەرلىك قوعامداستىق وكىلدەرى ماراپاتتالادى.
2017-جىلى بەرلين قالاسىندا جۇزۋدەن گەرمانيا اشىق چەمپيوناتىندا ريو-دە-جانەيروداعى پاراليمپيادا ويىندارىنىڭ چەمپيونى زۋلفيا عابيدۋللينا 200 مەترگە ەركىن جۇزۋدەن اقتىق سىندا 03:26,65 كورسەتكىشىمەن جاڭا الەمدىك رەكورد ورناتتى.
2018-جىلى بايقوڭىر عارىش ايلاعىنان ۇشقان «پروگرەسس مس-09» جۇك تاسىمالداۋشى عارىش كەمەسى حالىقارالىق عارىش ستانتسياسىمەن ءساتتى ءتۇيىستى.
عارىش كەمەلەرىنىڭ تاريحىندا العاش رەت «پروگرەسس» قىسقا ەكى اينالىمدى سحەما بويىنشا ۇشتى. زىمىران تابانى عارىش ايلاعىنان ۇزىلگەننەن وربيتالىق ستانتسيامەن تۇيىسكەنگە دەيىن 3 ساعات 40 مينۋت ۋاقىت جۇمسالدى.
2018-جىلى كەمبريدجدە (ۇلى بريتانيا) «رۋحاني جاڭعىرۋ» باعدارلاماسىن ىسكە اسىرۋ جونىندەگى ۇلتتىق كوميسسيا مەن كەمبريدج ۋنيۆەرسيتەتى باسپاحاناسى اراسىندا ىنتىماقتاستىق تۋرالى مەموراندۋمعا قول قويىلدى. قازىرگى زامانعى قازاق ادەبيەتى انتولوگياسى جيناعىن ب ۇ ۇ- نىڭ التى تىلىنە اۋدارۋ جۇمىسى «جاھاندىق الەمدەگى قازىرگى قازاقستاندىق مادەنيەت» جوباسى اياسىندا جۇزەگە اسىرىلۋدا.
جوبا - ەلباسى نۇرسۇلتان نازاربايەۆتىڭ «رۋحاني جاڭعىرۋ» باعدارلاماسىنىڭ ماڭىزدى بولىگى.
«جاھاندىق الەمدەگى قازىرگى قازاقستاندىق مادەنيەت» جوباسىنىڭ ماقساتى - قازاقستان تاۋەلسىزدىك العاننان بەرگى ءبىزدىڭ ادەبيەتتىڭ، مۋزىكا جانە بەينەلەۋ ونەرىنىڭ، حورەوگرافيا، كينو مەن تەاتردىڭ جەتىستىكتەرىن الەمگە پاش ەتۋ.
2019-جىلى شىعىس قازاقستاننىڭ تارباعاتاي اۋدانىنداعى ەلەكە سازى جايلاۋىندا پاتشا قورعانىنان التىنمەن اپتالعان بۇعىنىڭ باستارى شىقتى.
«پاتشا قورعانىنان» تابىلعان جادىگەرلەردىڭ اراسىندا ءمۇيىزى التىن سىمنان ورىلگەن بۇعى باسىنىڭ ۇساق پىشىندەرى بۇل ولكە ءۇشىن تىڭ تۋىندى.