توتەنشە جاعداي كەزىندە مەرزىمى ءوتىپ كەتكەن قۇجاتتار 10- شىلدەگە دەيىن جارامدى

نۇر- سۇلتان. قازاقپارات - جارامدىلىق مەرزىمى وتكەن قۇجاتتاردى اۋىستىرۋ بيىل 10 - شىلدەگە دەيىن ايىپپۇل سانكتسيالارىنسىز جۇزەگە اسىرىلادى، دەپ حابارلايدى قازاقپارات Polisia.kz كە سىلتەمە جاساپ.

ەلىمىزدە توتەنشە جاعداي رەجيمىن ەنگىزگەننەن كەيىن حقكو جۇمىسى 26 - ناۋرىزدان باستاپ توقتاتىلدى جانە ءبىرقاتار مەملەكەتتىك قىزمەتتەر، ونىڭ ىشىندە جەكە كۋالىكتى قايتا راسىمدەۋ بويىنشا قىزمەت كورسەتىلمەدى. توتەنشە جاعدايدى ەنگىزۋ فورس- ماجورلىق جاعداي دەپ تانىلادى، سوندىقتان ق ر ۇكىمەتى ازاماتتاردىڭ كەيبىر قۇجاتتارىن جارامدى دەپ تانۋ تۋرالى قاۋلى قابىلدادى:

1) «جەكە باستى كۋالاندىراتىن قۇجاتتار تۋرالى» زاڭنىڭ 6-بابىندا كورسەتىلگەن جەكە باسىن كۋالاندىراتىن قۇجاتتار؛

2) جۇرگىزۋشى كۋالىكتەرى، ونىڭ ىشىندە مىندەتتى تەحنيكالىق بايقاۋدان ءوتۋ تۋرالى ۋاقىتشا كۋالىكتەر؛

3) ازاماتتىق جانە قىزمەتتىك قارۋ جانە ونىڭ پاتروندارىن ساتىپ الۋعا، ساقتاۋعا جانە الىپ جۇرۋگە رۇقساتتار؛

4) كىرۋگە جانە كەتۋگە ارنالعان رۇقساتتار (ۆيزالار) ، قازاقستان رەسپۋبليكاسىندا ۋاقىتشا جانە تۇراقتى تۇرۋعا ارنالعان رۇقساتتار، ەڭبەكشى كوشىپ كەلۋشىگە جانە شەتەلدىك جۇمىس كۇشىن تارتۋعا جۇمىس بەرۋشىگە رۇقساتتار، پانا ىزدەۋشى ادامنىڭ كۋالىگى. جارامدىلىق مەرزىمى توتەنشە جاعداي كەزەڭىندە وتكەن جوعارىدا كورسەتىلگەن قۇجاتتار توتەنشە جاعداي جويىلعان كۇننەن باستاپ كۇنتىزبەلىك الپىس كۇن ىشىندە، ياعني بيىل 10- شىلدەگە دەيىن جارامدى دەپ تانىلادى.

توتەنشە جاعداي رەجيمى كەزىندە جانە ول اياقتالعان كۇنىنەن باستاپ كۇنتىزبەلىك 60 كۇن ىشىندە ون التى جاسقا تولعان جانە جەكە باستى كۋالاندىراتىن قۇجات الماعان ازاماتتار ءۇشىن تۋۋ تۋرالى كۋالىك نەمەسە قازاقستان رەسپۋبليكاسى ازاماتىنىڭ پاسپورتى كورسەتىلگەن كەزەڭدە جەكە باسىن كۋالاندىراتىن نەگىزگى قۇجات بولىپ تابىلادى.