داعدارىسقا قارسى شارالاردىڭ جالپى پاكەتى 10 ميلليارد دوللاردى قۇرايدى – توقايەۆ
بۇل تۋرالى اقوردادا توتەنشە جاعداي جونىندەگى مەملەكەتتىك كوميسسيانىڭ وتىرىسىن وتكىزگەن ق ر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى. «بۇل داعدارىستىق مەملەكەتتىك اپپارات پەن وتاندىق بيزنەس ءۇشىن سىلكىنۋگە سەپ بولادى. ونىڭ ساباقتارى ەسكەرىلۋى ءتيىس. دەمەك، جەدەل شارالارمەن قاتار جاعداي تۇراقتانعاننان كەيىنگى ءومىردى ەسكەرە وتىرىپ، جۇيەلى ادىستەر ازىرلەپ، قابىلداۋىمىز قاجەت. شىندىعىنا كەلگەندە ءبىز مۇلدەم جاڭا جاھاندىق الەم الدىندا تۇرمىز. قازاقستان وندان ءوزىنىڭ لايىقتى ورنىن تابۋى ءتيىس. ورىن العان جايتتىڭ بارلىق قيىندىقتارىنا قاراماستان ول بارىنشا اپپاتى ەمەس. بىزدە بارلىق مۇمكىندىكتەر، قور بار» ، - دەدى ق ر پرەزيدەنتى.
مەملەكەت باسشىسى ەڭ باستىسى ەڭ قولايسىز سەناريگە دەر كەزىندە دايىندالعانىمىزدى، نە ىستەۋ قاجەتتىگىن بىلەتىندىگىمىزدى باسا ايتتى.
«سالىقتىق پرەفەرەنسيالار مەن جەرگىلىكتى دەڭگەيدەگى قولداۋلاردى ەسەپكە الماعاندا داعدارىسقا قارسى شارالاردىڭ جالپى پاكەتى 4,4 تىريلليون تەڭگەنى نەمەسە 10 ميلليارد دوللاردى قۇرايدى. بۇل قاراجاتتى دۇرىس جۇمساۋ ارقىلى ءبىز داعدارىستان جەڭىمپاز بولىپ شىعاتىنىمىز ءسوزسىز» ، - دەدى قاسىم- جومارت توقايەۆ.
قازاقستان پرەزيدەنتى وسىنداي جاعدايدا بارلىق مەملەكەتتىك ورگاندار جۇمىلا جۇمىس جۇرگىزۋى كەرەكتىگىن باسا ايتتى.
«بۇل - بەرەكە- بىرلىگىمىز سىنالاتىن ۋاقىت. ءاربىر داعدارىستىڭ ەكى جاعى بار. بىرىنشىدەن، بۇل، البەتتە - قاۋىپ، ءبىراق ەكىنشىدەن، بۇل - مۇمكىنشىلىك. ىندەت، داعدارىس دەگەنىمىز - ۋاقىتشا، وتپەلى نارسە. ءبىزدىڭ الدىمىزدا تۇرعان ماقسات - مۇمكىندىكتى بارىنشا پايدالانۋ، وسى داعدارىستان امان- ەسەن شىعىپ، ودان دا مىقتى بولۋىمىز كەرەك. ءبىز ءارقايسىمىز ءوز مىندەتىمىزدى جاۋاپكەرشىلىكپەن ورىنداساق، بۇل قيىندىقتان تەزىرەك شىعامىز دەپ سەنەمىن، - دەدى مەملەكەت باسشىسى.