ەكى كوزى كورمەيتىن اناسىن 10- سىنىپ وقۋشىسى اسىراپ وتىر

الماتى. قازاقپارات - الماتىدا ناۋرىزباي اۋداندىق «باقىتتى وتباسى» الەۋمەتتىك ورتالىعى ءبىر ۇل باعىپ وتىرعان جالعىزباستى اناعا اتاۋلى الەۋمەتتىك كومەك تاعايىنداۋعا كومەكتەستى، دەپ حابارلايدى قازاقپارات ءتىلشىسى.

ورتالىق ماماندارى بۇل وتباسىنى كوپشىلىكتىڭ كورسەتۋىمەن تاپقان. جالعىزباستى، ءوزى مۇگەدەك انا 15 جاستاعى ۇلىمەن قالانىڭ شەتىندە 15 مىڭ تەڭگەگە پاتەر جالداپ تۇرادى ەكەن.

«بۇرىن بۇل ايەل تىگىن تىككەن. قازىر ەكى كوزىنىڭ كورمەي قالۋىنا بايلانىستى جۇمىس جوق، ۇيدە وتىر. 15 جاستاعى بالاسى 10 - سىنىپتا وقيدى. ول وقۋدان بوس كەزىندە كولىك جۋىپ اقشا تابادى ەكەن. ءۇيىنىڭ نان- سۋىن سول بالا اجىراتىپ وتىر. بالاسى كەرەمەت تاربيە العان. اناسىن كيىندىرەدى، جۋىندىرادى، تاماقتاندىرادى. ول كىسىلەردىڭ جاعدايىن ءتۇسىنۋ ءۇشىن كورۋ كەرەك. بۇل وتباسى سوڭعى جىلدارى مۇلدە ەت جەمەگەن. وسىنداي ناعىز مۇقتاج ادام ا ءا ك قاعىلىپ قالعان. اكىمدىككە بارىپ قۇجاتتارىن رەتتەپ، ايىنا 42280 تەڭگە اتاۋلى كومەك، ءبىر رەتتىك 53 مىڭ تەڭگە كولەمىندە الەۋمەتتىك كومەك تاعايىندادىق. بۇل قاراجات ولار ءۇشىن بايلىق دەسە دە بولادى»، - دەدى ورتالىقتىڭ ۇيلەستىرۋشىسى ناعيگۇل بەيسەمبينا.

ەندى «باقىتتى وتباسى» ورتالىعى مۇگەدەك ايەلدىڭ كوزىنە ەم جاساتپاق.

«ءبىزدىڭ ءبىر ەرەكشەلىگىمىز - مەملەكەتتىك قىزمەتكەرلەردەن گورى ءار ادامنىڭ تاعدىرىن جەكەلەپ قاراۋعا تىرىسامىز. بۇل ايەل مۇنىڭ الدىندا دا بارعان اكىمدىككە. ءبىراق وعان كومەك كورسەتىلمەگەن. سەبەبى تۇرىپ جاتقان ساياجايىنا سول تۇرعىن ءۇي يەسىنىڭ تابىسى قوسا ەسەپتەلىپ كەتكەن. سول سەبەپتى ول كىسى ا ءا ك الا الماعان. ەندى بۇل كىسىگە ءبىز ايىنا ءبىر رەت ازىق- تۇلىك سەبەتىمەن كومەكتەسەتىن بولامىز»، - دەدى ورتالىقتىڭ جەتەكشىسى سانا جانداي.

اۆتور: گۇلميرا عوسمانالي