پەتروپاۆلدا 10 مىڭ ادامعا قىزمەت كورسەتەتىن وتباسىلىق دەنساۋلىق ورتالىعى اشىلدى

پەتروپاۆل. قازاقپارات - پەتروپاۆلدا وتباسىلىق مەديتسينا ورتالىعى اشىلدى، دەپ حابارلايدى قازاقپارات ءتىلشىسى.

پەتروپاۆلدا پايدالانۋعا بەرىلگەن مەديتسينالىق نىسان قالالىق №1-ەمحانانىڭ قۇرىلىمدىق بولىمشەسى. وتباسىلىق مەديتسينالىق ورتالىقتى اشۋداعى باستى ماقسات - قالالىق ەمحاناعا ارتىلعان جۇكتى ازايتۋ، ناتيجەسىندە تۇرعىندار ۇتادى. ەندى دارىگەردىڭ قابىلداۋىنا كىرۋ ءۇشىن ۇزىن- سونار كەزەكتە تۇرۋدىڭ قاجەتى جوق جانە مەديتسينالىق كومەكتى الىسقا بارماي- اق الۋعا بولادى.

سولتۇستىك قازاقستان وبلىسىنىڭ اكىمى قۇمار اقساقالوۆ وتباسىلىق مەديتسينالىق ورتالىقتىڭ اشىلۋ سالتاناتىنا قاتىستى. ەمدەۋ مەكەمەسىنىڭ جۇمىسىمەن تانىسىپ، پاتسيەنتتەرگە جاسالعان جاعدايدى كوردى.

«بۇنداي ورتالىقتاردى اشۋ ەمحانالارداعى كەزەكتەردى قىسقارتۋعا مۇمكىندىك بەرەدى. بۇگىندە 3 ورتالىق اشىلدى، وسىنىڭ ارقاسىندا كەزەك %30 قىسقاردى»، - دەدى قۇمار اقساقالوۆ.

قازىر پەتروپاۆلداعى №1-قالالىق ەمحاناعا 69 مىڭ ادام تىركەلگەن. ونىڭ 10200 ى ەندى جاڭا وتباسىلىق دەنساۋلىق ورتالىعىنا كەلىپ، ەمدەلە الادى. ەرەسەكتەرگە جانە بالالارعا 6 ۋچاسكە اشىلعان. ەم-شارا قابىلداۋ كابينەتتەرى، ءدارىحانا جۇمىس ىستەيدى. جالپى پراكتيكا دارىگەرلەرى قابىلدايدى. ەلەكتروندىق كەزەك بار. №1-قالالىق ەمحانانىڭ باس دارىگەرى سۆەتلانا كاشەنتسيەۆانىڭ سوزىنە قاراعاندا، وتباسىلىق دەنساۋلىق ورتالىعىندا ماماندارعا عانا قارالىپ قويماي، اناليزدەر تاپسىرۋعا بولادى، ەكپەلەر دە وسى جەردە جاسالادى.

ورتالىققا جاقىن ماڭدا تۇراتىندار جانە كوللەدج ستۋدەنتتەرى تىركەلگەن. ءوڭىر باسشىسى قۇمار اقساقالوۆتىڭ ايتۋىنشا، بولاشاقتا وبلىستا وسىنداي ورتالىقتاردىڭ سانى ارتادى. بۇل - مەديتسينالىق قىزمەت كورسەتۋدىڭ ساپاسى جاقسارتادى. وعان قوسا كادر جەتىسپەۋشىلىگى ماسەلەسىن شەشۋ ءۇشىن كوتەرمە اقى بەرىلىپ، دارىگەرلەرگە باسپانا سالىنباقشى.

«100 دارىگەردى باسپانامەن قامتۋ ماقساتىندا 2020 -جىلدىڭ بيۋدجەتىنەن تۇرعىن ءۇي سەرتيفيكاتتارىنا 100 ميلليون تەڭگە بولدىك. بۇل قاراجاتتى ولار مينيمالدى پايىزبەن «تۇرعىن ءۇي قۇرىلىس جيناق بانكى» ارقىلى پاتەر ساتىپ الۋعا جۇمسايدى. وسى جانە تاعى باسقا قولداۋ شارالارىنىڭ ارقاسىندا وڭىردە دارىگەرلەر تاپشىلىعى ماسەلەسى بىرتىندەپ شەشىلىپ كەلەدى»، - دەيدى قۇمار اقساقالوۆ.

بيىل پەتروپاۆلدا وسىنداي وتباسىلىق دەنساۋلىق ورتالىقتارىنىڭ ۇشەۋى اشىلدى. س ق و اكىمى باسپا ءسوز قىزمەتىنىڭ مالىمەتىنشە، شاعىن مەديتسينالىق مەكەمەلەر قالانىڭ ىقشام اۋداندارىندا اشىلادى. «بەرەكەدە» جاڭا ەمحانانىڭ قۇرىلىسى باستالماق. 

اۆتور: اقەركە داۋرەنبەك قىزى