ميعا كەرى اسەر ەتەتىن 10 نارسە

نۇر-سۇلتان. قازاقپارات - مي - ادام اعزاسىنىڭ ەڭ باستى مۇشەسى. ءبىز ونسىز ءومىر سۇرە المايمىز.

ال بۇگىنگى تاڭدا، ياعني 21- عاسىردا ماماندىقتاردىڭ باسىم كوپشىلىگى اقىلدى كەرەك ەتەدى. سوندىقتان ءبىز ميىمىزدى قورعاۋىمىز كەرەك. الايدا اقىل- ويىمىزعا كەرى اسەرىن تيگىزەتىن ادەتتەر بار.

عالىمداردىڭ ايتۋىنشا، ۇندەمەي وتىرا بەرۋ دە ميعا اسەر ەتەدى ەكەن. ال اڭگىمە ايتىپ، ءاردايىم بەلسەندى جۇرسەڭىز، جاڭا سوزدەر ۇيرەنەسىز، ميىڭىزدى جاتتىقتىراسىز. ولاي بولسا، ميعا تەرىس اسەر ەتەتىن ادەتتەرمە تانىس بولىڭىز.

1. ۇيقىنىڭ قانباۋى. بارىنە تانىس بۇل قۇبىلىس ەلەۋلى ماسەلەگە اينالىپ بارادى. ب د ۇ- نىڭ مالىمەتىنشە، سوڭعى 100 جىلدا ادامزات ۇيىقتاۋ ۋاقىتىن ورتاشا ەسەپپەن %20 عا ازايتقان. ۇيقىسىزدىقتىڭ سالدارىنان ادام سەرگەك كۇيىندە ميدىڭ ءار جەرى باياۋ ۇيقى فازاسىنا اۋىسا باستايدى. بۇل ۋاقىتتا ادام ءبىر نۇكتەگە «قادالىپ» قالادى، بىتىراڭقى جۇرەدى، ۇساق موتوريكاسى بۇزىلادى. ۇدايى ۇيقىسىزدىق مي جاسۋشالارىنىڭ ولۋىنە اكەپ سوعادى.

2. تاڭعى اس ىشپەۋ. تاڭعى اس ىشپەۋ ادامنىڭ ەڭبەككە قابىلەتتىلىگى مەن كۇنى بويعى تونۋسىنا كەرى اسەر ەتەدى. بۇل تۇسىنىكتى جايت بولىپ كورىنۋى مۇمكىن، الايدا مۇندا تەك اعزاعا قاجەتتى قۋات الۋ ماسەلەسى عانا ەمەس، تاڭعى استى ىشپەۋ قانداعى قانت مولشەرىن ازايتادى. ال بۇل ءوز كەزەگىندە، ميعا ءنارلى زاتتاردىڭ جەتۋىن تومەندەتەدى جانە قيىنداتادى.

3. ارتىق قانت مولشەرى. الدىڭعى تارماقتا ميدىڭ ءونىمدى جۇمىس ىستەۋى ءۇشىن ءتاتتىنى، اسىرەسە اشى شوكولادتى نە ءۇشىن جەۋ كەرەكتىگى ءتۇسىندىرىلدى. الايدا اعزادا قانتتىڭ شامادان تىس كوپ بولۋى اقۋىز بەن ءنارلى زاتتاردى ءسىڭىرۋدى قيىنداتادى. ناتيجەسىندە قانت دەڭگەيى تومەن بولعان جاعداي قايتالانادى: ءنارلى زاتتار ميعا جەتپەي قالادى.

4. سترەسس. قاتتى پسيحوەموتسيونالدىق سترەسس نەيروندار اراسىنداعى اراقاتىناستى اجىراتىپ، جاعدايلاردىڭ سەبەپ- سالدار بايلانىسىن جانە جۇيەلىلىگىن ءتۇسىنۋدى قيىنداتادى. بۇل جۇيكە جۇيەنىڭ قاتتى قوزۋى مەن شاراسىزدىق سەزىمىن تۋدىرادى. جينالىپ قالعان سترەسس ەستە ساقتاۋدى قيىنداتىپ، ينتەللەكتۋالدىق مۇمكىندىكتەردى تومەندەتەدى.

5. انتيدەپرەسسانتتار مەن ۇيىقتاتاتىن دارىلەر. جاقسى اسەر ەتەتىن ءدارى- دارمەككە جاپپاي قۇمار بولۋ ماسەلەسى اسىرەسە اقش- تا وزەكتى، سەبەبى مۇنداي دارىلەردى ساتىپ الۋ وڭاي. ۇيىقتاتاتىن دارىلەر مەن كساناكس سياقتى تانىمال انتيدەپرەسسانتتاردى ءىشۋ ەستى امنەزياعا دەيىن ناشارلاتۋى مۇمكىن، سونىمەن قاتار جارىمەس ەتىپ، سۋيتسيدتىك ويلارعا جەتەلەۋى مۇمكىن.

6. تەمەكى شەگۋ. تەمەكى شەگۋدىڭ اعزاعا كەرى اسەرى جايلى اڭگىمە قوزعالعاندا، ەڭ اۋەلى قارايعان وكپە مەن قۇرتتاعان تىستەردى ەلەستەتەمىز. دەگەنمەن تەمەكىنىڭ ميعا قالاي اسەر ەتەتىنى جايلى كوپ ايتىلمايدى: نيكوتين قان تامىرلارىن تارىلتادى. ميعا ءنارلى زاتتاردى جەتكىزبەۋ سياقتى كەرى اسەرىمەن قاتار، بۇل زياندى ادەت التسگەيمەر اۋرۋىنا شالدىعۋ قاتەرىن بىرنەشە ەسەگە ارتتىرادى.

7. كۇن. ادام اعزاسىنا كۇن ساۋلەسىنىڭ جەتىسپەۋى ادامنىڭ تانىمدىق قاسيەتتەرىنە تىكەلەي اسەر ەتەدى. بىرىنشىدەن، كۇن ساۋلەسىمەن بىرگە الىناتىن ۋلتراكۇلگىن، قان اينالىمىن رەتتەيدى، ياعني وتتەگى مەن ءنارلى زاتتاردىڭ تاسىمالىن. ەكىنشىدەن، كۇن ساۋلەسى سەروتونيننىڭ - ادامنىڭ كوڭىل كۇيىنە اسەر ەتەتىن گورموننىڭ بولىنۋىنە اسەر ەتەدى.

8. سۋ. اعزاعا سۋدىڭ جەتىسپەۋى مي كولەمىنىڭ كىشىرەيۋىنە اكەلەدى، ال بۇل ونىڭ ەڭبەككە قابىلەتتىلىگىن تومەندەتەدى جانە اقپاراتتى ساقتاي الۋ قابىلەتىن نولدىك دەڭگەيگە دەيىن تۇسىرەدى. كۇنىنە شامامەن 2 ليتر سۋ ءىشۋ ۇسىنىلادى.

9. شامادان تىس كوپ اقپارات. جىل وتكەن سايىن ادام قابىلدايتىن اقپارات مولشەرى ءوسىپ كەلەدى. بۇل ميدى جاتتىقتىرۋ مەن ونى قالىپتى دەڭگەيدە ۇستاپ تۇرۋعا كومەكتەسەتىن سياقتى كورىنەدى. ءبىراق شىن مانىندە، شامادان تىس كوپ اقپاراتقا مي قارسىلىقپەن جاۋاپ بەرەدى. ول اقپاراتتى مۇلدەم قابىلداي الماي قالۋى مۇمكىن، كەيدە ءتىپتى كوپ نارسە ەستەن شىعىپ كەتەتىن كەزدەر بولادى.

10. ءبىر مەزەتتە كوپ اقپاراتتى قابىلداۋ. اقپاراتتىق ءداۋىردىڭ تاعى ءبىر دەرتى: ادام ءبىر مەزەتتە بىرنەشە اقپاراتتى يگەرۋگە تىرىسادى. ناتيجەسىندە، بىردە بىرەۋى لايىقتى تۇردە سىڭىرىلمەيدى، ال ەس وسى رەجيمگە ۇيرەنە باستايدى. اقپارات ءاتۇستى قابىلدانادى، ەكىنشىسىنە اۋىسپاي، بىرەۋىنە عانا دەن قويىپ ورىنداۋ كۇن وتكەن سايىن قيىنداي تۇسەدى.

دەرەككوز: Reactor