موڭعوليالىق قازاق ازاماتى الەمدەگى توپ-10 كومپانيانىڭ بىرىندە ەڭبەك ەتەدى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات - «قازاقپارات» ح ا ا  شەتەلدە قازاق تىلىندە تارايتىن اقپارات كوزدەرىنە اپتا سايىنعى شولۋىن ۇسىنادى.

قازاق جىگىتى الەمدەگى توپ-10 كومپانيانىڭ بىرىندە ەڭبەك ەتەدى - kaznews

وسى اپتادا موڭعوليانىڭ kaznews.mn اقپاراتتىق پورتالىندا «Temburong bridge» جوباسى اياسىندا برۋنەي- دارۋسسالام ەلىندەگى كورەيالىق «DAELIM» كومپانياسىندا،

كەيىن قىتايلىق «China state construction»  كومپانياسىندا گەودەزيا ينجەنەرى قىزمەتىن اتقارعان وزات ۇلى ەرعۇلانمەن سۇحبات جاريالاندى.

اتالعان اقپارات كوزىنىڭ دەرەگىنە سۇيەنسەك، موڭعوليا قازاعى ەرعۇلان 1993 -جىلى دۇنيەگە كەلگەن. 2011 -جىلى ولگي قالالىق «باستاما» ورتا مەكتەبىن، 2015 -جىلى ق ح ر- دىڭ ءشاندۇڭ ولكەسى، شيڭداۋ قالاسىنىڭ ءشاندۇڭ تەحنيكالىق ۋنيۆەرسيتەتىن گەودەزيالىق ينجەنەر ماماندىعى بويىنشا بىتىرگەن.

سۇحباتتا وزات ۇلى ەرعۇلان برۋنەي- دارۋسسالام سۇلتاندىعىنا قالاي بارعانى تۋرالى باياندايدى. ول العاشقى جۇمىسىن ۇلانباتىر قالاسىندا حالىقارالىق اۋەجاي قۇرىلىسىنان گەودەزيالىق ينجەنەر بولىپ باستاعان. ونىڭ ايتۋىنشا، بۇل جوبادا كوپتەگەن ەلدەردىڭ كومپانيالارى جۇمىس اتقارادى. سوندا بىرگە جۇمىس جاساعان كورەيالىق ينجەنەرلەر برۋنەي- دارۋسسالام ەلىندەگى «Temburong bridge» جوباسىنا جۇمىسقا ۇسىنىس بىلدىرگەن. كورەيالىق «DAELIM» كومپانياسى ول كەزدە جوبانىڭ كومەكشى كومپانياسى ەكەن. مۇندا 1 جىل ينجەنەر بولىپ قىزمەت ەتەدى. ودان كەيىن نەگىزگى اتقارۋشى كومپانيا - قىتايلىق «China state construction»  ونى سول جوبادا قالۋعا شاقىرعان.

«China state construction» - الەمدەگى ەڭ ءىرى 10 كومپانيانىڭ ءبىرى. مەنىڭ جۇمىسقا شاقىرىلۋىمنىڭ نەگىزگى سەبەبى - وسى جوبادا جۇمىس تاجىريبەمنىڭ بولۋى جانە قىتاي ءتىلىن ءبىلۋىم. قازىر وسى كومپانيادا جوبانىڭ گەودەزيالىق باس ينجەنەرى بولىپ جۇمىس جاسايمىن. جوبا بويىنشا تەڭىز ۇستىنەن 30 شاقىرىمدىق كوپىر سالىنادى. قازىر قۇرىلىس جۇمىسىنىڭ % 87 اتقارىلدى. الداعى جىلدىڭ سوڭىندا بۇل جوبانى اياقتايمىز»، - دەيدى جاس مامان ەرعۇلان وزات ۇلى.

جاس ينجەنەر بۇل كولەمدى سۇحباتىندا ءتىلشىنىڭ ءارتۇرلى ساۋالدارىنا تياناقتى جاۋاپتار بەرۋ ارقىلى، قازاقتارعا بەيتانىس بولىپ سانالاتىن ءوز جۇمىسىنىڭ قىر- سىرىنان كوپتەگەن ماعلۇماتتار بەرەدى. ەڭ كوپ قولدانىلاتىن، پايدالانۋعا قۇشتار جۇمىس قۇرالى، باعدارلامالارى تۋرالى ايتادى.

«GPS- Hi Target, Leica TS-09 plus total station قۇرالى جانە دە DJI Phantom 4RTK ماركالى درونىن سوڭعى ۋاقىتتا كوپ پايدالانامىن. جۇمىس جاعدايىنا سايكەس گەودەزيا نۇكتەسىن انىقتاۋدا، جەردى ولشەگەندە، اۋماقتىڭ جاعدايىن باقىلاۋدا، تەڭىزدىڭ ۇستىندە دروندى كوپ قولدانامىن»، - دەيدى جاس ينجەنەر.

التاي قالاسىندا ءشوپ- ءدارى مۇراجايى اشىلدى - «اعاجاي- التاي» سايتى

قىتايدىڭ التاي قالاسىندا «التاي تاۋى ءشوپ- ءدارى مۇراجايى» اتتى امبەباپ مۇراجاي اشىلدى. التاي تاۋى ءشوپ- ءدارى مۇراجايىنىڭ سالىنىپ، ىسكە قوسىلۋىنىڭ ماقساتى دارىلىك ءشوپتىڭ پايداسىن جانە ولاردان ءدارىنى قالاي جاساۋعا بولاتىنىن حالىققا كەڭىنەن ءتۇسىندىرۋ بولدى، دەپ جازادى kazakh.altxw.com اقپاراتتىق پورتالى.

«امبەباپ مۇراجاي 10 مىڭ شارشى مەتر اۋماقتا ورنالاسقان. قۇرىلىس اۋماعى 1700 شارشى مەترگە جەتكەن. نىساندا 3 ۇلكەن كورمە زالى بار. وعان دارىگە پايدالانىلاتىن وسىمدىكتەردىڭ 500-دەن استام فوتوسى، بالاۋىزدان جاسالعان وسىمدىكتەردىڭ 400-دەن استام ۇلگىسى، قۇمىراعا شىلانعان وسىمدىكتەردىڭ 120 جانە وزگە دە زاتتاردىڭ 300-گە جۋىق ۇلگىسى قويىلعان. 

بۇندا دارىلىك ءشوپتىڭ سىرتقى ءپىشىنى، ءوسىپ ـ جەتىلۋ ورتاسى مەن گۇلى، جەمىسى، تامىرى، تۇقىمىنىڭ دارىلىككە پايدالانىلاتىن ءبولىمى تولىق تانىستىرىلعان. سونىمەن بىرگە، مۇراجايدا اتالعان ايماقتىڭ اۋدان، قالالارىندا وسىرىلگەن جاسىل ەكولوگيالىق، جوعارى ساپالى دارىلىك ءشوپ ءونىمى، ايماق كولەمىندەگى ءدارى زاۋىتتارىنىڭ تابيعي ءدارى ونىمدەرى دە كورسەتىلگەن»، - دەپ جازادى قىتايلىق ب ا ق.

بىشكەكتە «قۇتتى بىلىك» كونفەرەنسياسى وتەدى - TRT

«تۇركيا راديو تەلەۆيزيا» پورتالىنىڭ مالىمەتىنە سۇيەنسەك، بىشكەكتە تۇرىك- يسلام الەمىنىڭ ۇلى اقىنى، عۇلاما ويشىلى ءجۇسىپ بالاساعۇننىڭ «قۇتتى بىلىك» كىتابىنىڭ 950 جىلدىعى اياسىندا حالىقارالىق كونفەرەنسيا وتەدى.

قىرعىزستاننىڭ مادەنيەت، اقپارات جانە تۋريزم مينيسترلىگىنىڭ باسپا ءسوز قىزمەتى تاراتقان اقپاراتقا قاراعاندا، وسىعان وراي مينيستر ازامات جامانقۇلوۆ حالىقارالىق تۇركى اكادەمياسىنىڭ باسشىسى، پروفەسسور دارحان قىدىرالىنى قابىلدادى. كەزدەسۋدە ەكى باسشى «قۇتتى بىلىك» كونفەرەنسياسىن ۇيىمداستىرۋ ماسەلەسىن تالقىلادى.

«پرەزيدەنتتىك اپپارات باسپا ءسوز قىزمەتىنىڭ حابارلاۋىنشا، پرەزيدەنت سوورونباي جەەنبەكوۆتىڭ قابىلداۋىندا بولعاندا دا «قۇتتى بىلىكتىڭ» مەرەيتويىنا بايلانىستى وتكىزىلەتىن شارالار جانە تۇركى اكادەمياسىنىڭ بولاشاقتاعى جوسپارلارى جونىندە اڭگىمە بولعان»، - دەپ جازادى تۇركيالىق ب ا ق.

قانداسىمىز قىتاي چەمپيوناتىندا باس جۇلدەنى جەڭىپ الدى - قىتايدىڭ «ورتالىق حالىق راديوسى»

لانجوۋ قالاسىندا وتكەن قىتاي چەمپيوناتىندا 2019 -جىلعى كۇرەس تۇرىنەن قازاق بالۋانى تاعى دا التىن مەدالعا قول جەتكىزدى. بۇل تۋرالى وسى اپتادا قىتايدىڭ CNR اقپاراتتىق پورتالى حابارلادى.

 گانسۋ ولكەسىنىڭ بالۋانى ەرلانبەك كاتەي ۇلى ەركىن كۇرەستەن التىن مەدال جەڭىپ الدى. قىتايداعى بالۋانداردىڭ كىل مىقتىسىن انىقتايتىن بۇل جولعى رەسپۋبليكالىق بايراقتى باسەكەگە 137 قۇراما، 1120 سپورتشى قاتىسقان. توعىز كۇن بويى 10 ءتۇرلى سالماق بويىنشا باق سىناعان چەمپيوناتتا قانداسىمىز 65 كەلى ساناتىندا باس جۇلدەنى ەنشىلەگەن.

ەرلانبەك 2009 -جىلدان بەرى قىتاي چەمپيوناتتارىندا جەڭىس تۇعىرىنان تۇسپەي كەلە جاتقان بالۋان.

ايتا كەتۋ كەرەك، ەرلانبەك كاتەي ۇلى قىتايدىڭ التاي ايماعىنا قاراستى قىزىلتاس قالاشىعىندا دۇنيەگە كەلگەن. ول 2010 -جىلى قىتاي بىرىنشىلىگىندە 65 كەلى سالماق دارەجەسى بويىنشا چەمپيون اتانىپ، وسى ەلدىڭ گانسۋ ولكەلىك ۇلتتىق قۇراماسىنا الىندى. الەمدىك جارىستاردا قازاقستان بالۋاندارىمەن دە بىرنەشە رەت كەزدەسكەن. ول 2014 -جىلى وڭتۇستىك كورەيانىڭ ينچحون قالاسىندا وتكەن ازيا ويىندارىندا قولا مەدال يەلەندى. سول جولعى جارىستىڭ ءبىرىنشى اينالىمىندا ول قازاقستاندىق داۋرەن جۇماعازييەۆتى جەڭىپ، شيرەك فينالدا ءۇندىستاندىق، لوندون وليمپياداسىنىڭ قولا جۇلدەگەرى يوگەشۆار دۋتتانعا ەسە جىبەردى. ال قولاعا تالاسقاندا سولتۇستىك كورەيالىق كان چين حۋكتى جەڭدى. بۇل ەرلانبەك كاتەي ۇلىنىڭ حالىقارالىق جارىستاعى العاشقى مەدالى بولاتىن.

ەستەرىڭىزگە سالا كەتەيىك، ەرلانبەك قىتايداعى قازاقتار اراسىنان وليمپياداعا جولداما العان ءۇشىنشى قانداسىمىز. وعان دەيىن گرەك- ريم كۇرەسىنەن ءالنۇر تورگە ۇلى، بوكستان قانات يسلام وليمپيادادا قىتاي اتىنان ونەر كورسەتكەن بولاتىن.

فارسان قالاسىنداعى ساردار اساد باحتياري قامالى - «فارس» اقپارات اگەنتتىگى

يران اۋماعىندا تاريحي- مادەني ورتالىقتار ءجيى كەزدەسىپ جاتادى. سونداي تاريحي ورتالىقتىڭ ءبىرى - اساد باحتياريدىڭ قامال- سارايى. ءجۇز جىلدىق تاريحقا يە ساردار اساد باحتياريدىڭ قامال- سارايى فرانسيانىڭ زاماناۋي ساۋلەت ونەرىنەن شابىت الىپ، ون توعىزىنشى عاسىرداعى ەۋروپالىق سارايلار ستيلىندە سالىنعان، دەپ جازادى parstoday اقپارات اگەنتتىگى.

بۇل قامال چاھارماحال باحتياريداعى فارسان شاھرەستانى دجۋنعان قالاسىنىڭ تاريحي ەسكەرتكىشتەرى اراسىنان اسىل جاقۇتتاي كوزگە تۇسەدى.

اۆتور: بەيسەن سۇلتان