بانكتەن نەسيە العىسى كەلەتىندەر ءۇشىن 10 كەڭەس

نۇر-سۇلتان. قازاقپارات - بەلگىلى ءبىر ماقساتىمىزدى جۇزەگە اسىرۋ ءۇشىن بانكتىڭ كومەگىنە جۇگىنىپ، نەسيە الۋعا اسىعاتىنىمىز راس.

قارجىلىق مەكەمەدەن قارىزعا اقشا الامىن دەپ مىندەتتەرىن دۇرىس ورىنداماي، بارىنان ايىرىلىپ قالعاندار ەلىمىزدىڭ وزىندە از ەمەس. ۆ ت ب (قازاقستان) بانكىنىڭ ماماندارى نەسيە الىپ، وپىق جەپ قالماۋ ءۇشىن ءاربىر قازاقستاندىق ءبىلۋى ءتيىس 10 كەڭەستى ۇسىنادى.

1. نەسيەنى العاننان كەيىن اي سايىن تولەپ تۇرا الاسىز با؟ ءبىر جىلدان سوڭ تۇراقتى تابىس كوزى بولا ما؟ ەڭ الدىمەن، وزىڭىزگە وسى سۇراقتاردى قويىپ، جاۋاپ بەرگەنىڭىز ءجون. سوسىن قارجىلىق قىزمەتتەر كورسەتەتىن مەكەمەنىڭ اتىن جامىلعان الاياقتاردىڭ ارباۋىنا ءتۇسىپ قالماۋ ءۇشىن بانكتىڭ مارتەبەسىنە جانە نارىقتاعى ورنىنا نازار اۋدارىڭىز. ءار بانكتىڭ نەسيەنى جابۋعا بەرەتىن ۋاقىتى، پايىزدىق مولشەرلەمەسى - ءارتۇرلى.

ولاردىڭ ىشىنەن نەسيەنى قايتارعاندا ۇستىنەن قوسىلاتىن اقشا كولەمى تىم كوپ بولىپ كەتپەيتىندەي، تولەم ۋاقىتى وزىڭىزگە ىڭعايلى بولاتىنداي جاعدايلار جاسالعان بانكتى تاڭداعانىنىز ابزال.

2. بانك سىزگە نەسيە تۋرالى تولىق اقپارات بەرۋگە مىندەتتى. ەگەر نەسيەگە قاتىستى بىرنارسەنى تۇسىنبەسەڭىز، بانك قىزمەتكەرىنەن قايتالاپ ايتىپ بەرۋىن سۇراۋعا قىسىلماڭىز. قارجىمەن بايلانىس ماڭىزدى شەشىم قابىلداۋدا وتباسىڭىزبەن نەمەسە جاقىن ادامىڭىزبەن اقىلداسىپ الۋ ءۇشىن بانكتەن ۋاقىت بەرۋىن سۇراي الاسىز.

3. نەسيە كەلىسىمشارتىنىڭ ماتىنىنە، ونىڭ مازمۇنىنا زەر سالىڭىز. كەلىسىمشارتقا قول قويماي تۇرىپ، بانك الدىنداعى مىندەتىڭىزدى مۇلتىكسىز ورىنداۋعا ءتيىس ەكەنىڭىزدى ەسكەرىڭىز. نەسيە الۋشى ادام قۇجاتتىڭ ءار ايقىنداماسى ءۇشىن جاۋاپتى. كەلىسسوزدەرىڭىزدىڭ بارلىعى جازباشا تۇردە راسىمدەلۋى ءتيىس. كەلەشەكتە قارجىلىق قىزمەتتەر كورسەتەتىن مەكەمەمەن سوتتاساتىنداي جاعداي بولسا، قۇجاتتارىڭىز قۇقىعىڭىزدى قورعاپ شىعادى.

4. نەسيەنىڭ اقشاسى ءسىزدىڭ عانا پايداڭىزعا جاراۋى ءتيىس. سوندىقتان نەسيە الاردا ماقساتىڭىزدى تاعى دا ءبىر مارتە ايقىنداپ العانىڭىز ابزال. بانك قاجەتتىلىكتەرىڭىزدى قاناعاتتاندىرۋ ءۇشىن ەمەس، ماسەلەڭىزدى شەشۋ ءۇشىن قارجىلاي كومەكتەسەتىنىن ۇمىتپاڭىز.

5. شەتەل اقشاسىنا نەسيە الۋ ءتيىمدى بولىپ كورىنۋى مۇمكىن. ءبىراق تاپقان تابىسىڭىز تەڭگەمەن باعالانسا، نەسيەنى ۇلتتىق ۆاليۋتامەن العانىڭىز دۇرىس. دوللارمەن نەمەسە باسقا شەتەلدىك ۆاليۋتامەن الساڭىز، ۆاليۋتالىق قاتەرگە ىلىنەسىز.

6. نەسيە شارتىن، ونىڭ ءماتىنىن كوزدىڭ قاراشىعىنداي ساقتاۋعا كەڭەس بەرەمىز. نەسيەلەرىڭىز بەن دەپوزيتتەرىڭىز جايلى اقپاراتتى تەلەفون ارقىلى ەشكىمگە ايتپاڭىز، ينتەرنەتكە سالماڭىز.

7. نەسيە العان كەزدە سىزگە بانك كارتاسى بەرىلۋى مۇمكىن. بۇل كارتا تولەم جۇرگىزگەنگە وتە قولايلى. دەگەنمەن كەي كەزدەرى الاياقتاردىڭ كەسىرىنەن ودان اقشا جوعالىپ كەتىپ جاتادى. ارام پيعىلدى ادامداردىڭ كەسىرىنەن وپىق جەپ قالماۋ ءۇشىن كارتاڭىزعا ليميت قويىپ قويىڭىز. ليميت ۇلكەن كولەمدەگى اقشامەن الدانىپ قالۋىڭىزعا جول بەرمەيدى.

8. ەگەر ۇيالى تەلەفونىڭىزعا «موبيلدى بانكينگ» قىزمەتى قوسىلسا، گادجەتىڭىزگە بانك كارتاسىنا قاراعانداي مۇقيات بولىڭىز.

9. «نەسيە پيراميداسىن» قۇرماڭىز. ءبىر بانكتەگى نەسيەنى جابۋ ءۇشىن ەكىنشىسىنەن قارىز الماعانىڭىز ءجون. ەرتە مە، كەش پە، مۇنداي «پيراميدا» قۇلدىراپ، زاردابىن شەگەسىز.

10. قارجىلىق ماسەلەلەرىڭىزدى ءوز موينىنا الۋعا دايىن ادامداردىڭ، كۇمان تۋدىراتىن زاڭگەرلەردىڭ كومەگىنە جۇگىنبەڭىز. اقشاڭىز تاۋسىلعان كەزدە ولار ءسىزدى قيىندىقتارىڭىزبەن وڭاشادا تاستاپ كەتەدى.