ۇكىمەت الەۋمەتتىك ماڭىزى بار 10 تاۋاردىڭ باعاسىن قاداعالايدى

نۇر-سۇلتان. قازاقپارات – ق ر ۇلتتىق ەكونوميكا ءمينيسترى رۋسلان دالەنوۆ الەۋمەتتىك ماڭىزى بار تاۋارلاردىڭ قىمباتتاۋى جونىندە باياندادى، دەپ حابارلايدى قازاقپارات ءتىلشىسى.

«جىل باسىنان باستاپ، ينفلياتسيا %4-6 ءدالىز شەگىندە ساقتالۋدا. جىلدىق ينفلياتسيا %5,4 دەڭگەيىندە قالىپتاستى، ال 2018-جىلدىڭ شىلدەسىندە ول %5,9 قۇراعان. ينفلياتسيانىڭ وسۋىنە ەڭ كوپ اسەر ەتكەن - ازىق-تۇلىك تاۋارلارى. ولاردىڭ ينفلياتسيا وسىمىنە قوسقان سالىمى 3,4 پروتسەنتتىك تارماقتى قۇرادى. بۇل تاۋارلار باعالار ءوسۋىنىڭ شامامەن %63 قۇرادى»، - دەدى مينيستر ۇكىمەتتىڭ بۇگىنگى وتىرىسىندا.

ونىڭ ايتۋىنشا، بارلىق وڭىرلەردە الەۋمەتتىك ماڭىزى بار ازىق-تۇلىك تاۋارلارىنىڭ باعاسى ينفلياتسيادان اسادى.

«اسىرەسە، الەۋمەتتىك ماڭىزى بار 19 ازىق-تۇلىك تاۋارلارى %9 ۇلعايعان. ەڭ جوعارى ءوسۋ نۇر-سۇلتان (%15,1)، جەزقازعان (%11,8) جانە تالدىقورعان (%10,4) قالالارىندا بايقالادى. مىسالى، نۇر-سۇلتان قالاسىندا ءسابىز (2,4 ەسە)، پياز (%85,5)، كارتوپ (%82,4)، كۇرىش (%21,6) جانە ۇن (%20,8) قىمباتتادى»، - دەپ ءوز ءسوزىن جالعاستىردى ر. دالەنوۆ.

جالپى، رەسپۋبليكا بويىنشا الەۋمەتتىك ماڭىزى بار ازىق-تۇلىك تاۋارلارى اراسىندا پياز (%79,0)، ءسابىز (%59,3)، كارتوپ (%32,9)، كۇرىش (%23,8)، ءبىرىنشى سۇرىپتى ۇن (%15,3) باعالارى ايتارلىقتاي وسكەن. تاۋارلار باعاسىنا تالداۋ جۇرگىزىلگەندە، تۇتىنۋشىلار باعاسىنىڭ وندىرۋشىلەردىڭ نەمەسە يمپورتتىق باعالاردان ەداۋىر جوعارى ەكەنى انىقتالعان.

«مىسالى، ءسابىزدى ءوندىرۋشى باعاسى 67 تەڭگە بولسا، نارىقتاعى ساتۋ باعاسى 151 تەڭگەنى قۇرايدى. ۇستەمە باعا رەتىندە 84 تەڭگە قوسىلعان. ءبىز بيىل ينفلياتسيانى بەرىلگەن دالىزدە ۇستاپ قالۋ ءۇشىن 10 تاۋاردى انىقتادىق. بۇل پياز، ءسابىز، كارتوپ، قىزىلشا، كۇرىش، ۇن، جىلقى ەتى، قوي ەتى، سيىر ەتى جانە نان. تاۋارلاردىڭ وسى توبى بويىنشا كۇشەيتىلگەن باقىلاۋ جۇرگىزۋ، سونداي-اق ولاردىڭ باعالارىن تومەندەتۋ بويىنشا شارالار قابىلداۋ ۇسىنىلادى»، - دەدى ۇلتتىق ەكونوميكا ءمينيسترى.