قويمالاردا 10 جىلدان بەرى جاتقان تاۋارلار بار - جەمقورلىققا قارسى اگەنتتىك
«وسى جىلدىڭ ماۋسىم ايىندا اگەنتتىك كەدەن سالاسىنداعى جەمقورلىق تاۋەكەلدەرىنە تالداۋ جۇرگىزىپ كورگەن بولاتىن. تالداۋ بارىسىندا ءبىرشاما جەمقورلىق تاۋەكەلدەرى انىقتالدى. ولاردىڭ ىشىندەگى نەگىزگىسى رەتىندە كەلەسىسىن اتاپ وتۋگە بولادى: ءبىرىنشىسى - تاۋارلاردى ۋاقىتشا ساقتاۋ قويمالارىندا ساقتالعان تاۋارلاردى جويۋ باعىتىندا كەدەن ورگاندارى قىزمەتكەرلەرىنىڭ ۋاقتىلى جۇمىس جۇرگىزبەۋى»، - دەدى انار جاروۆا اگەنتتىكتە وتكەن جيىندا.
دەپارتامەنت باسشىسىنىڭ ايتۋىنا قاراعاندا، وسى ماسەلەنىڭ كەسەلىنەن قويما يەلەرى شىعىنعا ۇشىراپ جاتادى.
«وسىنىڭ سالدارىنان قويما يەلەرى ۇستالعان تاۋارلاردىڭ ساقتالۋىنا بايلانىستى قارجىلىق شىعىنعا ۇشىرايدى. ۇستالعان تاۋارلاردىڭ ساقتاۋ مەرزىمىنە قاراماستان (4 اي) تاۋارلار جىلداپ قويمالاردا جاتا بەرەدى. ماسەلەن، اقتوبە وبلىسىندا ۇستالعان تاۋارلار قويمالاردا 2005 -جىلدان بەرى جاتىر. سول سەكىلدى الماتى وبلىسىندا 2008 -جىلدان بەرى جاتقان تاۋارلار بار»، - دەدى سپيكەر.
انار جاروۆانىڭ تۇسىندىرۋىنشە، قويمالاردىڭ تاۋارلاردىڭ ساقتالۋىنا يەلەرى جاۋاپتى. كاسىپكەردىڭ شاماسى كەلمەگەن جاعدايدا قويمالاردا تاۋارلار بيۋدجەت ەسەبىنەن ساقتالادى.
«الايدا ءىس جۇزىندە بيۋدجەت ەسەبىنەن تاۋاردى قايتارۋ جاعدايى تىركەلگەن ەمەس. سەبەبى، كەدەن ورگاندارى بۇل باعىتتا قاراجات بولىنبەيدى»، - دەدى انار جاروۆا.
اۆتور: ايان بەكەن ۇلى