كورەيادا 10 مىڭنان استام قازاقستاندىق زاڭسىز جۇمىس ىستەپ جاتىر
كورەيا ەلشىسىنىڭ ايتۋىنشا، قازاقستان ازاماتتارىنىڭ كورەياعا جۇمىسقا بارۋى جيىلەپ كەتتى. ول جاقتا زاڭسىز جۇرگەن قازاقستاندىقتار سانى ارتىپ كەلەدى. ادامدار قازاقستان مەن وڭتۇستىك كورەيا اراسىنداعى ەكىجاقتى ۆيزاسىز رەجىمدى ءوز پايداسىنا اسىرۋدا.
«ولار قانداي جاعدايدا بارادى دەيتىن بولساق، ارينە كوبى بۇرىننان بارىپ جۇمىسقا ورنىعىپ العاندار. قازىرگى ۋاقىتتا كورەيادا زاڭسىز جۇمىس جاسايتىن قازاقستان ازاماتتارى ءوز تۋىستارىن شاقىرۋ ارقىلى جۇمىسقا الىپ قالىپ جاتادى. كوپتەگەن سەبەپتەرمەن اۋماققا ەنىپ العان. ول ادامدار قارا جۇمىس ىستەيدى. كورەياعا ۆيزاسىز رەجىم ارقىلى جەتىپ الادى. ياعني، تۋريست رەتىندە بارىپ كەيىن ءناپاقا تابۋدىڭ قامىنا كىرىسەدى. مۇنداي جايتتار ەكى ەلدىڭ قارىم- قاتىناسىنا، دوستىعىنا اسەر ەتپەيدى، دەسە دە ەكى ەلدىڭ مادەنيەتىنە كەرى اسەرىن تيگىزبەسە ەكەن دەيمىز»، - دەيدى كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى كيم دە-سيك.
رەسمي دەرەكتەرگە ساي بۇگىندە وڭتۇستىك كورەيادا 10 مىڭنان استام قازاقستاندىق زاڭسىز ءجۇر. بۇعان دەيىن قر سىرتقى ىستەر مينيسترلىگى وڭتۇستىك كورەيا ءوز اۋماعىندا زاڭسىز جۇرگەن شەت ەل ازاماتتارىن قولايلى جاعدايدا ەلدەن شىعارا الۋى ءۇشىن «جاسىل ءدالىز» رەجىمىن ەنگىزگەن بولاتىن.
«جاسىل ءدالىز» رەجىمىنىڭ شارتىنا ساي، كورەياداعى شەت ەل ازاماتتارى، سونىڭ ىشىندە قازاقستاندىقتار كورەيا اۋماعىنان ءوز ەرىكتەرىمەن شىعۋعا ءتيىس. ەگەر، ولار ءوز ەرىكتەرىمەن تۋعان جەرلەرىنە قايتۋعا نيەت بىلدىرسە، وندا ولار ەشقانداي اكىمشىلىك جاۋاپقا تارتىلمايدى»، - دەيدى كيم دە- سيك.
اۆتور: الما مۇقانوۆا