قاتىرۋعا بولاتىن 10 ءونىم

 نۇر-سۇلتان. قازاقپارات - توڭازىتقىشتا قاتىرىلعانىنان گورى، جاڭا دايىندالعان نەمەسە جاڭا پىسكەن بالعىن ونىمدەردىڭ پايداسى مول ەكەنىن بارشامىز بىلەمىز.

دەسە دە، كەيدە كەرىسىنشە بولاتىنىن دا ەسكەرۋىمىز كەرەك. كوپتەگەن قىز-كەلىنشەكتەر توڭازىتقىشتىڭ مۇزداتقىشىنا ەتتەن وزگە ءتۇرلى كوكونىستەر مەن بۇرشاقتاردى ساقتاۋعا بولاتىنىن جاقسى بىلەدى، ءبىراق ول جەرگە جۇمىرتقا مەن قۋىرىلعان كارتوپتى دا (چيپسى) ساقتاۋعا بولاتىنىن كوپشىلىك ەستىمەگەن دە بولار.

ءسۇت قاتقان كەزدە ونىڭ كولەمى ۇلعايادى. سوندىقتان بوتەلكە شىتىناپ نە سىنىپ كەتپەۋى ءۇشىن ازايتىپ، ىدىستارعا ءبولىپ قۇيىڭىز.

شيكى جۇمىرتقا

قۇرامىندا سۇيىقتىق بار شيكى جۇمىرتقا دا قاتقان كەزدە كولەمى ۇلكەيەدى. سوندىقتان ونى جارىپ، ىدىسقا قۇيىپ ساقتاڭىز. مۇزداتقىشقا جۇمىرتقانى قاي كۇنى قويعانىڭىزدى ەسىڭىزدە ۇستاڭىز. شيكى جۇمىرتقانى ول جەردە بىرنەشە ايدان ءبىر جىلعا دەيىن ساقتاۋعا بولادى.

جەمىستەر

مۇزداتقىشتا جەمىستەردى بۇتىندەي ساقتاۋعا بولادى. ال سمۋزي جاساۋعا ساقتاعان جەمىستەرىڭىزدى ءبولىپ، ىدىسقا سالعانىڭىز دۇرىس. پايدالانار كەزدە ول دايىن تۇرادى.

قاتىرىلعان باناندى ءۇي بالمۇزداعىن جاساۋعا پايدالانىڭىز. ال قاتىلىرعان جۇزىممەن مۇزدىڭ ورنىنا شاراپتى سۋىتۋىڭىزعا بولادى. ونىڭ ەرەكشەلىگى ءجۇزىم مۇز سياقتى ەرىپ، شاراپتى سۋمەن ارالاستىرمايدى.

سوۋستار

مۇزداتقىشتا ساقتاۋدان بۇرىن ونى دا كەڭىرەك ىدىسقا قۇيىپ الىڭىز. بەتىمەن بەت قىلىپ تولتىرماڭىز. سۋىقتا سۇيىقتىقتىڭ كولەمى ۇلكەيەتىنى ەسىڭىزدە بولسىن.

پىسكەن ەت

پىسكەن ەتتىڭ ارتىلىپ قالعانىن گەرمەتيكالىق پلاستيك ىدىسقا سالىپ ساقتاۋ كەرەك ەكەنى ەسىڭىزدە بولسىن.

كوكونىستەر

مۇزداتقىشتا كوكونىستەردى ءبۇتىن دە، ءبولىپ تە ساقتاۋعا بولادى. ول ءۇشىن پلاستيك ىدىسقا نەمەسە گەرمەتيكالىق قالتاشاعا سالىڭىز. قاتىرىلعان كوكونىستەردى بىردەن تاباعا قۋىرىپ، نە قازانعا سالىپ پىسىرە بەرۋىڭىزگە بولادى.

چيپسى

قۋىرىلعان كارتوپ (چيپسى) اشىلعان سوڭ تەز جۇمسارىپ كەتەدى. ال ونى مۇزداتقىشتا ەكى ايعا دەيىن ساقتاۋعا بولادى. ال ول جەردەن العاننان كەيىن جىبىتپەي-اق بىردەن قولدانا بەرىڭىز. چيپسى بۇرىنعىدان دا قىتىرلاق بولا تۇسەدى.

كوك-سوك

كوپ جاعدايدا ساتىپ العان كوك- سوكتى ءبىر تاماق دايىنداۋعا تۇگەلدەي قولدانبايمىز. ءبىرازى ارتىلىپ قالىپ جاتادى. ال ونى توڭازىتقىشقا سالعاندا ءبىر- ەكى كۇننەن كەيىن-اق بۇزىلىپ كەتەدى. سوندىقتان كوك- سوكتى پلاستيك ىدىسقا سالىپ، مۇزداتقىشتا ساقتاعان دۇرىس. ول جەردە ءتورت- التى ايعا دەيىن بالعىندىعىن جوعالتپايدى. ساقتار الدىندا ولاردىڭ ساباعىن الىپ تاستاۋدى ۇمىتپاڭىز.

تورت پەن ءتاتتى توقاشتار

تورت نەمەسە ءتاتتى توقاش جۇمساعىراق بولۋى ءۇشىن مۇزداتقىشقا 24 ساعاتقا سالىپ الىڭىز. ولاردى قاتىرۋ كەزىندە ىلعالدىلىعى ارتىپ، جۇمسارا تۇسپەك.

نان ونىمدەرى

ناندى مۇزداتقىشتا تورتتەن التى ايعا دەيىن ساقتاۋعا بولادى. ەندەشە، كەز كەلگەن نان ونىمدەرىن دە جىلى جەردە كوگەرىپ كەتپەۋى ءۇشىن مۇزداتقىشقا سالىڭىز.

 

دەرەككوزى: syrlasu.kz