قازاقستاندا ۇستالعان قىرعىز دەپۋتاتى 10 جىلعا سوتتالدى

None
None
الماتى. قازاقپارات - الماتى قالالىق قىلمىستىق ىستەر جونىندەگى مامانداندىرىلعان اۋدانارالىق سوتىندا ارنايى وپەراتسيا بارىسىندا ۇستالعان قىرعىزستان جوگوركۋ كەنەشىنىڭ بۇرىنعى دەپۋتاتى داميربەك اسىلبەك ۇلىنا قاتىستى سوت ۇكىمى شىقتى، دەپ حابارلايدى قازاقپارات ءتىلشىسى.

داميربەك اسىلبەك ۇلىمەن بىرگە تاعى 11 ادامعا ەكونوميكالىق كونتراباندا جاسادى دەگەن ايىپ تاعىلعان بولاتىن.

سۋديا باقىتحان باكىربايەۆ داميربەك اسىلبەكۋۋلىن ق ر قك 264-بابىنىڭ 1-بولىگى، 234-بابىنىڭ 3-بولىگى بويىنشا ايىپتى دەپ تاۋىپ، 10 جىلعا باس بوستاندىعىنان ايىرۋ تۋرالى ۇكىم شىعاردى. سونىمەن قاتار، ونىڭ الداعى 5 جىل قازاقستان شەكاراسىنان وتۋىنە تىيىم سالىندى.

ەسكە سالايىق، اعىمداعى جىلدىڭ اقپان ايىندا ق ر باس پروكۋراتۋراسى، ق ر ۇلتتىق قاۋىپسىزدىك كوميتەتى جانە سىبايلاس جەمقورلىققا قارسى ءىس-قيمىل ۇلتتىق بيۋروسى الماتى، جامبىل، وڭتۇستىك قازاقستان وبلىستارى مەن الماتى قالاسىندا ارنايى وپەراتسيا وتكىزىپ، 30 دان استام ادامدى ۇستاعان.

ولاردىڭ اراسىندا كەدەن ورگانى، شەكارا قىزمەتىنىڭ لاۋازىمدى تۇلعالارى، بروكەرلەر، دەلدالدار، سونداي-اق ۇيىمداسقان قىلمىستىق توپ مۇشەلەرى بار. ۇشەۋى - قىرعىزستان ازاماتى. ونىڭ ءبىرى - قىرعىزستان جوگوركۋ كەنەشىنىڭ دەپۋتاتى داميربەك اسىلبەك ۇلى بولاتىن. كەيىن انىقتالعانداي، داميربەك اسىلبەك ۇلىنىڭ قازاقستان ازاماتتىعى بار.

بۇل رەتتە سوتتالۋشىنىڭ ءوزى قىرعىزستان ازاماتى ەكەنىن اتاپ وتۋدە. ونى قاماۋدا ۇستاۋ مەرزىمى بۇعان دەيىن 8 ايعا سوزىلعان بولاتىن.

ءمالىم بولعانداي، ۇيىمداسقان ترانسۇلتتىق توپ 2017 -جىلعى 1 -جەلتوقساننان 2018 -جىلعى 15 -اقپانعا دەيىن ءىرى جانە اسا ءىرى كولەمدەگى حالىق تۇتىناتىن تاۋارلاردى (جالپى قۇنى 407558653 تەڭگە) كونتراباندا جولىمەن ق ح ر-دان قىرعىزستان ارقىلى قازاقستان رەسپۋبليكاسىنا بىرنەشە مارتە جەتكىزگەن. سالدارىنان ە ا ە و بيۋدجەتىنە 99015094,2 تەڭگە سوماسىندا كەدەندىك باج سالىقتارى مەن مىندەتتى تولەمدەر تۇسپەي قالعان. وسى ارقىلى ە ا ە و-عا قاتىسۋشى ەلدەرگە اسا ءىرى سومادا ەكونوميكالىق زالال كەلدى. ءىس ماتەريالدارىنا قاراعاندا، قىلمىستىق توپقا باسشىلىق جاساعان داميربەك اسىلبەك ۇلى ونىڭ مۇشەلەرىنىڭ اربىرىنە ناقتى تاپسىرمالار بەرىپ وتىرعان.

سوڭعى جاڭالىقتار