ۇلتتىق ەكونوميكا ءمينيسترى 10 جىل بويى يپوتەكانى قالاي تولەگەنىن ايتتى
بۇل جايىندا ول پارلامەنت سەناتىندا جاستار جىلىن وتكىزۋ اياسىندا تۇرعان ماقساتتارعا ارنالعان دوڭگەلەك ۇستەل وتىرىسىندا ءمالىم ەتتى، دەپ حابارلايدى قازاقپارات.
«وتكەن جىلى يپوتەكالىق نەسيە بويىنشا 10 جىلدىق تولەم مەرزىمىن اياقتادىم، ياعني 2008 -جىلى نەسيەنى العان بولاتىنمىن. بۇل تولەم ايتارلىقتاي اۋىرتپالىق تۇسىرەتىنىن بىلەمىن. وسى ورايدا جاستارعا ءتيىستى ۇندەۋ جاساعىم كەلەدى. ۇنەمى ءوزىڭنىڭ مۇمكىندىگىڭە قاراي شامالاپ، ەسەپتەۋ جۇرگىزۋ كەرەك. بىزدە ارەندالىق باسپانا بار. ماسەلەن، ءبىز ءدىلىمىزدى ەسكەرە وتىرىپ، جەكە باسپانا الۋعا تىرىسامىز. بىرىنشىدەن، ادام باسپاناعا قاتتى بايلانىپ قالادى جانە تولەمنىڭ ورتا كەزىنە جەتكەندە ادام وسىدان پسيحولوگيالىق تۇرعىدا قالجىرايدى. ويتكەنى ءبىر ايداعى تابىستىڭ باسىم بولىگىن يپوتەكاعا بەرەسىز. سوندىقتان بۇعان باسقاشا كوزقاراس بولعان ءجون. ەڭبەك موبيلدىگىن ەسكەرە وتىرىپ، ياعني بۇگىن اتىراۋدا بولساڭ، ەرتەڭ پاۆلوداردا، كەيىننەن الماتىعا قونىستانۋىڭ مۇمكىن. بۇل رەتتە ارەندالىق باسپاناعا باسقاشا كوزقاراس قالىپتاستىرۋ كەرەك»، - دەدى تيمۋر سۇلەيمەنوۆ.
ونىڭ پايىمىنشا، باسپانا ماسەلەسىندە تەك يپوتەكاعا قاراۋدىڭ رەتى جوق.
«يپوتەكانى مۇمكىندىگىنشە ارزانداتۋعا بولادى. الايدا قارىز العان ادامدار وزدەرىنىڭ مۇمكىندىكتەرىن دۇرىس ەسەپتەي الماي، كەيىننەن قيىن جاعدايعا تاپ بولۋى ىقتيمال»، - دەدى مينيستر.