گۋدزونداعى تاڭعاجايىپ: 10 جىل بۇرىنعى وقيعا ىزىمەن
اۋە كەمەسىندە 150 جولاۋشى مەن 5 ەكيپاج مۇشەسى بار. «اپات ايتىپ كەلمەيدى» دەگەندەي، ولاردى بىرەر مينۋتتان كەيىن نە كۇتىپ تۇرعانى بەلگىسىز ەدى.. . ۇشاق اۋەگە ءساتتى كوتەرىلەدى. 975 مەتر بيىكتىككە جەتكەندە كەنەتتەن كانادالىق قاراشاقازداردىڭ ءبىر توبىنا سوقتىعىسادى. Airbus اۋە كەمەسىنىڭ ەكى قوزعالتقىشى دا ىستەن شىعادى.. .
كاپيتان ساللي چەسلي ساللەنبەرگەر جىلدام شەشىم قابىلداۋى كەرەك. جاقىن ماڭداعى اۋەجايلاردىڭ بىرىنە قونۋ تۋرالى بۇيرىق كەلگەنمەن، كەش كورىنەدى. ناتيجەسىندە ۇشقىش گۋدزون وزەنىنە قوندىرۋ جايلى شەشىم قابىلدايدى. ۇشاق الەمدەگى ەڭ قاۋىپسىز ترانسپورت ءتۇرى سانالاتىنى راس. ءبىراق كوكتە اۋە كەمەسى ىستەن شىققان جاعدايدا ونى باسقارۋ وڭاي ەمەس. اپاتقا ۇشىراپ بۇكىل جولاۋشىلارى امان قالعان وقيعا كەمدە- كەم. سونداي- اق ۇشاقتى سۋ بەتىنە قوندىرۋ قاۋىپتى شەشىمدەردىڭ ءبىرى. الەمدىك اۆياتسيا تاريحىندا جولاۋشىلار ۇشاعىن سۋ بەتىنە قوندىرعان وقيعالار نەكەن- ساياق. كوپشىلىگى قايعىلى وقيعالارمەن اياقتالعان. تەك 1963 -جىلدىڭ 21 - تامىزىندا بولعان نيەۆاداعى تاڭعاجايىپ وقيعا بار. كەڭەستىك ت ۋ-124 ۇشاعى تالليننەن ماسكەۋگە باعىت العان. ۇشاق اپاتتى جاعدايدا قونۋعا تۋرا كەلەدى. ۇشاق كومانديرى ۆيكتور موستوۆوي نيەۆاعا قوندىرۋدى ۇيعارادى. كوپىرلەردى سوقپاي، اسقان شەبەرلىكپەن ۇشاقتى سۋ بەتىنە ءساتتى قوندىرادى. بۇل ەرلىكتى 46 جىلدان كەيىن چەسلي ساللەنبەرگەر قايتالادى. باستاپقىدا كاپيتان نيۋ- يورك اۋەجايىنا قايتا بۇرىلۋ جايىن ويلايدى. كەيىننەن جاقىن ماڭداعى تەتەربوروعا (اۋەجاي) قونۋدى جوسپارلايدى. ءبىراق ۇشاق اسا بيىككە كوتەرىلمەگەندىكتەن گۋدزونعا قونۋدان باسقا امال قالمايدى. قۇلديلاي ۇشىپ كەلە جاتقان ۇشاقتى كورگەن جۇرتتىڭ زارە- قۇتى قالمايدى. 2001 -جىلعى لاڭكەستىك ارەكەت سەكىلدى جاعداي ما دەپ شوشىنادى. Airbus A320-214 قۇلديلاعان قالپى گۋدزوندى باۋىرلاي قۇلايدى. ءبىر ءسات كوزدەن عايىپ بولىپ، قايتا سۋ بەتىنە شىعادى. جاعدايدى باقىلاۋدا ۇستاعان قۇتقارۋ قىزمەتى ۇشاقتاعىلاردى قۇتقارۋعا بىردەن كىرىسەدى.
چەسلي ساللەنبەرگەر ۇشاقتى ءساتتى قوندىرىپ، ءوزى سوڭعى بولىپ شىعادى. 5 ادام اۋىر جاراقات العانى بولماسا، بارلىعى امان قالادى. كەيىننەن كاپيتان مەن ونىڭ كومەكشىسى دجەفري سكايلزعا ايىپ تاعىلىپ، سۋعا قوندىرۋ جايلى قاۋىپتى شەشىم قابىلداعاندارى ءۇشىن جاۋاپقا دا تارتىلادى. الايدا بۇلار سەكىلدى تاجىريبە جۇزىندە بىردە- ءبىر ۇشقىش ناتيجەنى قايتالاي المايدى. قورىتىندىسىندا ەكى ۇشقىشقا تاعىلعان ايىپ الىنىپ، ەلدىڭ ماقتانىشىنا اينالادى. اپاتقا ۇشىراعان Airbus A320-214 ۇشاعى ودان كەيىن اۋەگە كوتەرىلمەگەن. قازىرگى تاڭدا شارلوتتاداعى «كاروليناس» مۋزەيىنە قويىلعان. ونداعى ەڭ تانىمال جادىگەرلەردىڭ ءبىرى. چەسلي ساللەنبەرگەر كوپتەگەن امەريكالىق باعدارلامالارعا قاتىسىپ، ەلدەگى اتاقتى تۇلعالاردىڭ بىرىنە اينالدى. ال اپاتتان امان قالعان جاندار وعان العىسىن ايتۋدان جالىققان ەمەس. جىل سايىن جينالىپ تا تۇرادى. بۇل وقيعاعا 7 جىل وتكەننەن كەيىن «گۋدزونداعى تاڭعاجايىپ» دەگەن فيلم دە شىقتى. باستى ءرولدى ايگىلى اكتەر توم حەنكس سومدادى.
Massaget.kz