قازاقستاندىق سپورتشى 10 جىلدان كەيىن وليمپيادانىڭ «التىنىن» الدى
ۇلتتىق وليمپيادا كوميتەتىنىڭ حابارلاۋىنشا، بۇل جونىندە ح و ك- تان بۇگىن رەسمي حابارلاما كەلگەن.
اتاپ ايتقاندا، زىلتەمىرشى اللا ۆاجەنينا مەن اننا نۇرمۇحامبەتوۆا جانە جەڭىل اتلەت ولگا رىپاكوۆاعا بىرنەشە جىلعا سوزىلعان تەكسەرۋدەن سوڭ وليمپيادا مەدالدارى بەرىلەدى.
حالىقارالىق وليمپيادا كوميتەتى مەن سپورتتىق اربيتراجدى سوتتىڭ تارتىپتىك كوميسسياسى 2008-جىلى بەيجىڭدە وتكەن جازعى وليمپيادا ويىندارىندا اۋىر اتلەتيكادان 75 كەلى سالماقتا ءبىرىنشى ورىن يەلەنگەن قىتايلىق لەي تساونىڭ سپورتتان شەتتەتىلگەنىن حابارلايدى. سول سەبەپتى حالىقارالىق اۋىر اتلەتيكا فەدەراتسياسىنىڭ قايتا تەكسەرۋىنەن سوڭ قازاقستاندىق اللا ۆاجەنينا بەيجىڭ وليمپياداسىنىڭ التىن جۇلدەگەرى دەپ تانىلدى.
سونىمەن قاتار، 2008-جىلعى بەيجىڭ وليمپياداسىندا ءۇش قارعىپ سەكىرۋدەن ءتورتىنشى ورىن يەلەنگەن ولگا رىپاكوۆا سپورتشىلار دوپينگ-سىناماسىن قايتا تەكسەرگەن سوڭ وليمپيادانىڭ كۇمىس جۇلدەگەرى دەپ تانىلدى. ح و ك پەن CAS تارتىپتىك كوميسسياسى رەسەيلىك تاتيانا لەبەديەۆا مەن گرەكيالىق حريسوپيا ديەۆيتسيدى سپورتتان شەتتەتتى.
2012-جىلعى لوندون وليمپياداسىندا اۋىر اتلەتيكادان 69 كەلى سالماق دارەجەسىندە 5-ورىن يەلەنگەن قازاقستاندىق اننا نۇرمۇحامبەتوۆا وليمپيادانىڭ قولا جۇلدەگەرى دەپ تانىلدى. مۇنداي شەشىمگە تارتىپتىك كوميسسيا وليمپيادا ويىندارىندا تيىسىنشە ەكىنشى جانە ءۇشىنشى ورىن يەلەنگەن مارينا شكەرمانكوۆا مەن دينا سازانوۆەتستى سپورتتان شەتتەتكەن سوڭ قابىلدادى.
وسىلايشا اللا ۆاجەنينا 2008-جىلعى وليمپيادا ويىندارىنىڭ چەمپيونى، ولگا رىپاكوۆا بەيجىڭ وليمپياداسىنىڭ كۇمىس جۇلدەگەرى جانە اننا نۇرمۇحامبەتوۆا لوندون وليمپياداسىنىڭ قولا جۇلدەگەرى اتاندى.
ح و ك مەدالدى تابىستاۋ ۋاقىتى مەن ورنىن سپورتشىلاردىڭ وزدەرى تاڭدايتىنىن جەتكىزدى. ايتالىق، بۇدان بۇرىن دەنيس ۋلانوۆ ريو وليمپياداسىنىڭ قولا مەدالىن اشحابادتا وتكەن الەم چەمپيوناتىندا العان بولاتىن.
اۆتور: ەلجان ەرالى